Hebreos
Gyicy nu gua lo de mbecy Israeel
1
Ñgyoozh rniim lo den nu nac Iꞌñ mi
Gulas mnii Ñgyoozh lo de gyitoo bel nu nac de yu nu mnii por cuen nim. Nunu zañ tir, nunu zañ mod mniim lo dey. Tees lat tiem nu yuꞌ den na, orzeꞌ rniim lo den nu nac Iꞌñ mi. Nunu nu nac Iꞌñ mi psaꞌ lagy mi gyishlombecy. Nunu bzum mi zeꞌ par nu gyiyeeñ dela coz yaam. Lo Iꞌñ mi zeꞌ gabe gyel lily nim, nunu gal nu na Ñgyoozh Uz mi niꞌ ziꞌl nam. Nunu laab Iꞌñ mi zeꞌ ricy mi nu ni mod yuꞌ dela coz. Ni ricy mi nu riidz nim nu dzi rcyiiñ. Na ornu blazh bdiib mi cyi de mbecy, orzeꞌ gusub mi zeꞌ nu zub mbecy nu gya zir zu par yaa bee Ñgyoozh gyibaa.
Iꞌñ Ñgyoozh zily zir nac mi gazeꞌ de anc
Orzeꞌ Iꞌñ mi zeꞌ nac mi tub biñ nu zily zir nac gazeꞌ de anc, nunu Ñgyoozh briic mi tub nu lam nu gya zir sac gazeꞌ de nu la anc. Gun Ñgyoozh rila wanniim lo ni tub la anc gal nu mniim lo Iꞌñ mi ornu nam:
Ru Iꞌña̱.
Dzi na ya̱ ne̱e̱ nu ru nac ru biñ nu nac Iꞌña̱,
nam. Niꞌ ziꞌl Ñgyoozh wansat mi ni tub anc mod nu bzat mi Iꞌñ mi ornu nam:
Ya̱ naca̱ Uz mi,
nunu mi zeꞌ nac mi Iꞌña̱,
nam. Ornu Ñgyoozh bzuu nez mi Iꞌñ mi nu gul loga nim nu biid mi gyishlombecy, orzeꞌ nam:
Dela anc rlagy ñi nu riib zily dey mi,
nam. Zeꞌ par de anc, i mod mniim:
Ya̱ bicya̱ nu anc ne̱ nay gal nu na bi.
Nac dey moz ne̱ nu na gal nu na lyush gyi,
nam. Tees lo Iꞌñ mi mniim:
Ñgyoozh, ru nac ru biñ nu gyub ic tub la.
Ru gyub ic ru mod nu seꞌñ.
Ru yet lagy ru nu ricy ru de coz nu laab ñi,
nunu wayet lagy ru nu gyicy ru de coz a̱ꞌ nap.
Ndeꞌ nu ya̱, Ñgyoozh nir, pcui̱ ru,
nunu bicya̱ nu zu cyit zir lagy ru gazeꞌ deꞌ zir mbecy,
nam. 10 Niꞌ ziꞌl Ñgyoozh bzat mi Iꞌñ mi ornu de yu nu mnii por cuen nim mnii dey lo Iꞌñ mi:
Shuaan de̱, ornu ru bzuub ru gyiꞌ gyishlombecy,
ru psaꞌ lagy ru ñii.
Nunu laab nu yaar psaꞌ lagy ru gyibaa.
11 Tees de nu ndeꞌ nit loñ,
tees ru ni ziꞌl zur.
De nu ndeꞌ gyaguush ñi gal nu ricy tub shab mbecy.
12 Orzeꞌ cuꞌ choow ru ñii,
nunu zur tuubaꞌ shab cub ru.
Tees ru ni ziꞌl nar tub la.
Orzeꞌ rila waded ni tiem nir,
na dey. 13 Ñgyoozh rila wanniim lo ni tub la anc gal nu mniim lo Iꞌñ mi ornu nam:
Bzub par yaa be̱e̱ gashtal gyicy la̱ nu gyub ic ru de losaꞌ yuur.
Rila wanniim ni mod lo ni tub la anc.
14 Orzeꞌ de anc, yu zeꞌ nac yu espiriit nu ricy yac nu de coz nu rnii Ñgyoozh. Nunu Ñgyoozh rzuu nez mi dey par nu locyuub yu de mbecy nu gruu mbañ.