1 ¿Ca druu de gyel yuu, gal nu de gyel deet nu yuꞌ lat der? Druuñ lat de coz a̱ꞌ nap nu ricy gyel yuu nañ lardoo der. 2 Rlagy der nu gad la coz nir, tees wagad ñi ni der. Orzeꞌ rzu lily der nu cut ru losaꞌr. Rzaab lagy der la coz, tees wagad ñi ni der. Orzeꞌ rucoo der, nunu rtub su losaꞌ der. Wagad coz nu rlagy der, gun wacyiiñ der ñii lo Ñgyoozh. 3 Nunu mas rgyiiñ der ñii lo Ñgyoozh, tees wagyicy mi gal nu rnii der lom, gun rgyiiñ ton der. Rgyiiñ der coz nu yet ziꞌl lagy der. 4 ¡A̱ mbecy wagyicy paa! ¿A wagad lagy der nu benu yet lagy ru de coz a̱ꞌ nap nu ricy mbecy ni gyishlombecy, orzeꞌ yac losaꞌ yuu der Ñgyoozh? Cyu ziꞌl mbecy nu rlagy gac amig ni de coz ni gyishlombecy, yac losaꞌ yuuy Ñgyoozh. 5 ¿Walab gaal rnii too der nu se la la sac riidz ni Ñgyoozh zeꞌ nu rniiñ: “Ñgyoozh tonaꞌ la rcam espiriit nu brim nañ lardoo den, nunu se par ub ziꞌl mi rlagy mi ñii”, rniiñ? 6 Tees Ñgyoozh faboor ily zir ricy num de ub na gal nu rniiñ lat de riidz nim: “Ñgyoozh zam contr ni de mbecy leꞌ, tees ricy mi faboor num de yu nu ricy gyel gyidz ni”, rniiñ. 7 Orzeꞌ “O” mnii der ni Ñgyoozh. Gua der contr ni nuras, gun orzeꞌ ruu chuy lo der. 8 Bechaꞌ der lo Ñgyoozh. Orzeꞌ Ñgyoozh gyechaꞌ gaꞌm lo der. Gal nu ricy der ornu rgyiib ru yaar, ni bdiib der de coz cyi nu ricy ru, de ru mbecy cyi. ¡Bicy der nu gyacaacy lardoor, de ru mbecy nu ricy cyup ic! 9 ¡Bicy shni der! ¡Bzu der rishsulagy! ¡Biiñ der! ¡Lugaar nu gyigy der, orzeꞌ biiñ der! ¡Lugaar nu yet lagy der, bicy shni der! 10 Bicy gyidz der ub ru lo Ñgyoozh, gun orzeꞌ gyicy mi nu gyac der mbecy nu gya zu.

11 Der bicy na, tub ga la der walagy ñi nu nii zi der ni losaꞌr. Nunu walagy ñi nu nii der nu yuꞌ falt niy. Yu nu rnii zi ni bicy o yu nu rnii nu yuꞌ falt ni bicy, orzeꞌ yu zeꞌ rnii ziy ni leey ni Ñgyoozh, nunu rniiy nu yuꞌ falt niñ, gun wacsuub gyidag yu niñ. Benu rniiy nu yuꞌ falt ni leey, orzeꞌ yu zeꞌ walab tub yu nu rzuub gyidag niñ, sinu tub yu nu rnii nu yuꞌ falt niñ. 12 Tees tub zi Ñgyoozh briic mi leey, nunu tub zi lam gac niim nu yuꞌ falt ni den. Tub zi lam gac co mbañ mi, nunu tub zi lam gac nit lom. Zeꞌ de ru, ¿cyu guc ru par nu niir nu yuꞌ falt ni losaꞌr?

13 Na bzuub gyidag der ne̱, de ru mbecy nu rnii: “Dzi na o ina chan ca na gyedz. Zeꞌ cyiiñ den tub ñaꞌn. Gyicy den dalje̱z. Gyicy den gan tiñ”, rnii der. 14 Tees wagad lagy der la coz zac ru ina. De ru na der gal nu na za nu taꞌ baa. Nañ tub miiñ ziꞌl gruu zac ñi nunu nañ tub miiñaꞌ ziꞌl bi mniit ñi. 15 Coz nu rlagy ñi nu nii der, orzeꞌ i niir: “Benu Shuaan den rlagy mi, orzeꞌ cui mbañ na. Orzeꞌ gyicy na nii o nde”, nii der. 16 Tees na ricy der gyel leꞌ nir, nunu rnii der nu dzi coz ily ricy ru. Ndeꞌ rila a̱ꞌ nap nu ni mod rnii der. 17 Mbecy nu rad lagy nu gyicy coz nap, zeꞌ wagyicy yu, yu zeꞌ ricy yu cyi.