1 De mbecy fariseo güeñ dey nu zigy zir de mbecy nu za ca ich Jesuuz, gazeꞌ de yu nu za ca ich Waa. Nunu rbic zir mi nu zu nis mbecy gazeꞌ Waa. 2 Mas walab ub la Jesuuz driib nis mi mbecy, sinu de yu nu rsyaꞌ lom rbic dey nu zu nis mbecy. 3 Na ornu gud lagy Jesuuz de nu ndeꞌ, orzeꞌ bruum lo yu ni Judea, orzeꞌ yam par de lo yu ni Galilea.

4 Na zeꞌ nu yam rlagy ñi nu ded mi lo de yu ni Samaria. 5 Orzeꞌ bruꞌñam tub gyedz nu la Sicar nu ri lo yu ni Samaria. Gyedz zeꞌ gare ga ri tub nac yu nu briic Jacob ni iꞌñ yu See. 6 Lugaar zeꞌ zub zo nu rnii dey, “Zo ni Jacob.” Zeꞌ gusub Jesuuz nu rzu lagy mi gun gutsiñ mi nu tuñ bzam nez. Ndeꞌ tub or widoo. 7-8 Orzeꞌ de yu nu rsyaꞌ lom bzeeñ dey mi. Orzeꞌ za dey lat gyedz nu za zii dey coz nu gow yu. Orzeꞌ bruꞌña tub biñ mñaa Samaria, bruꞌñam ruꞌ zo zeꞌ nu za gyiim nis. Orzeꞌ na Jesuuz rab mi biñ mñaa zeꞌ:

―Doo ñuu nis nir do̱ꞌ ―nam.

9 Orzeꞌ na biñ mñaa zeꞌ rab mi Jesuuz:

―Ru nac ru tub mbecy Israeel. Zeꞌ ya̱ naca̱ tub biñ mñaa Samaria. Orzeꞌ ¿lagu rgyiiñ ru nis goꞌr lo̱? ―nam.

Gun de mbecy Israeel wagac gyicy dey ni tub la coz nu mbecy Samaria, gun a̱ꞌ nap yuꞌ dey.

10 Orzeꞌ na gaꞌ Jesuuz rab mi biñ mñaa zeꞌ:

―Bi bicy na nu ru gad lagy ru la na coz nu rbic Ñgyoozh, nunu bicy na nu gad lagy ru cyu nac ya̱, nu rdiña̱ nis do̱ꞌ lor, orzeꞌ ru cyiñ ru nis lo̱ ya̱ goꞌr. Orzeꞌ ya̱ rica̱ nis nu rbic gyel mbañ nu rishli nu goꞌr.

11 Orzeꞌ biñ mñaa Samaria zeꞌ nam rab mi Jesuuz:

―Zeꞌ ru, ni a̱ꞌ nur la nu par nu cor nis, gun zo ii gyi ri nis nañ ñi. Zeꞌ ru, ¿ca cor nis nu cuic gyel mbañ zeꞌ ne̱? 12 Gyitoo bel ne̱ de̱ Jacob bzeeñ mi zo ii ne̱ de̱ ya̱. Nunu laab ii goꞌm nis gal nu de iꞌñ mi nu de bañcyug nim. ¿Walab gaal lily zir na ru gazeꞌ gyitoo bel ne̱ de̱ zeꞌ? ―na biñ mñaa zeꞌ.

13 Orzeꞌ na Jesuuz:

―Dela de mbecy nu goꞌ nis ii, wayeca nu cuigy zir dey nis. 14 Zeꞌ de mbecy nu goꞌ nis nu ya̱ grica̱, de mbecy zeꞌ rila wabigyaꞌ dey nis. Gun nis nu ya̱ grica̱, ndeꞌ gyicy ñi nu gyac nañ lardoo dey gal na tub zeꞌ nu driib nis. Nis zeꞌ gyicy ñi nu cui mbañ dey tub la ―nam.

15 Orzeꞌ na biñ mñaa zeꞌ rab mi Jesuuz:

―Beni, orzeꞌ cuic ru nis zeꞌ do̱ꞌ gun cueꞌ gaꞌ nu cuigya̱ꞌ ñii nunu cueꞌ gaꞌ gyap gyi̱i̱ ñii ii ―na biñ mñaa zeꞌ.

16 Orzeꞌ na gaꞌ Jesuuz:

―Yaa, ya te ñgyeer, nunu cyid nur yu ii ―na Jesuuz.

17 Orzeꞌ na gaꞌ biñ mña̱a̱ zeꞌ:

―Sac ñgye̱e̱ ya̱ ―nam.

Orzeꞌ na gaꞌ Jesuuz:

―Ru gaal rishli rniir nu sac ñgyeer, 18 Gun bi bzu gaay ñgyeer. Zeꞌ yu nu zu gaꞌ na, yu zeꞌ walab ñgyeer. Ru rishli mniir lo̱ nu sac ñgyeer ―nam.

19 Ornu biñ mñaa zeꞌ güeñ mi nu ndeꞌ, orzeꞌ nam rab mi Jesuuz:

―Na bet laga̱ cuen nu ru nac ru tub biñ nu rnii por cuen ni Ñgyoozh. 20 De gyitoo bel ne̱ de̱, de biñ Samaria, briib zily dem Ñgyoozh too bicy ii. Zeꞌ de ru rnii der nu gal Jerusaleeng rlagy ñi nu riib zily mbecy Ñgyoozh, rnii der ―na biñ mñaa zeꞌ.

21 Orzeꞌ na Jesuuz rab mi biñ mñaa zeꞌ:

―Biñ mñaa, guña ñuu lagy riidz nu rne̱e̱. Shuub tub dzi nu de mbecy griib zily dey Ñgyoozh, uz den. Orzeꞌ walagyaꞌñ nu cyid dey too bicy ii, ni nu gya dey Jerusaleeng. 22 De ru mbecy Samaria wagad lagy der la na biñ nu driib zily ru. Tees de̱ ya̱ mbecy Israeel rad lagy de̱ la na biñ nu driib zily de̱, gun lat de mbecy Israeel gruu mod par nu gruu mbañ mbecy. 23 Tees shuub dzi, nunu na la ndeꞌ ornu de mbecy nu rishli gaal griib zily Ñgyoozh uz na gyicy dey ñi tub mod nu rishli, mod nu rlagy Espiriit Yon ni Ñgyoozh, gun ndeꞌ mod nu rlagy Ñgyoozh uz na. Ndeꞌ mod nu rlagy mi nu gyicy de yu nu griib zily mi. 24 Gun Ñgyoozh nac mi Espiriit, nunu de yu nu griib zily mi rlagy ñi nu gyicy dey ñi tub mod nu rishli, tub mod nu rlagy Espiriit Yon nim ―nam.

25 Orzeꞌ na biñ mñaa zeꞌ rab mi Jesuuz:

―Rad lagya̱ nu cyid Mesías, biñ nu pcui Ñgyoozh nu co mbañ mi den. Laab mi zeꞌ lam Crisht. Ornu mi zeꞌ cyid mi, orzeꞌ shaal mi dela coz lo̱ de̱ ―nam.

26 Orzeꞌ na gaꞌ Jesuuz:

―Mi zeꞌ nac ya̱, biñ nu rnii nu ru na la ―nam.

27 Laab or la zeꞌ bri de yu nu rsyaꞌ lom. Orzeꞌ za nu la ic dey nu Jesuuz rom riidz nu tub biñ mñaa. Tees ni tub la dey wancuic yu baloor nu ngugyiꞌy lo biñ mñaa zeꞌ la coz rlagy mi, o nu ngugyiꞌ dey lo Jesuuz ben lagu ro num biñ mñaa zeꞌ riidz. 28 Orzeꞌ biñ mñaa zeꞌ bzeeñ ga lam reꞌ nim. Yam lat gyedz. Orzeꞌ nam rab mi de mbecy:

29 ―Da der gun cha güiir tub biñ gyeey nu mniim dela coz nu bicya̱. ¿Ben a chii la a walab mi zeꞌ Mesías? ―na biñ mñaa zeꞌ.

30 Orzeꞌ bruu de mbecy lat gyedz zeꞌ za dey lo Jesuuz. 31 Lat nu ya biñ mñaa zeꞌ, orzeꞌ de yu nu rsyaꞌ lo Jesuuz rnishbaa dey lom nu gow mi gyit. Orzeꞌ na dey:

―Masht, bdow mas ñuu miꞌ ―na dey.

32 Orzeꞌ nam rab mi dey:

―Ya̱ ricy cupa̱ coz nu da̱w. Tees de ru wagad lagy der la coz ndeꞌ ―nam.

33 Orzeꞌ de yu nu rsyaꞌ lom brugyiꞌ rgugyiꞌ dey lo losaꞌy. Orzeꞌ na dey:

―¿Walab gaal bi biid nu ca na mbecy coz nu gow mi? ―na dey.

34 Orzeꞌ na gaꞌ Jesuuz rab mi dey:

―Ornu gyicya̱ coz nu rlagy Ñgyoozh, biñ nu bzuu nez ya̱, nunu ornu gzaꞌ lo̱ riiñ nim, orzeꞌ ndeꞌ nañ gal na de coz nu da̱w. 35 De ru mbish tub riidz nu rnii der: “Gabee ricy falt ruꞌ tap beey par nu teꞌn cosech”, rnii der. Zeꞌ ya̱ rne̱e̱ lo der nu güiir lo de mbecy nu yad ii. Na dey gal nu na tub nac gyel. Güii la nañ. Bi guc niñ nu dudeꞌ cosech, gun bi zu lily dey nañ lardooy nu gyicy cup dey consuel lo̱ ―na Jesuuz―.

36 ’Gun de yu nu cha teꞌ cosech zeꞌ, bi gyad iy, nunu cosech nu rteꞌ dey zeꞌ, ndeꞌ de mbecy par nu cui mbañ dey tub la, gun orzeꞌ de yu nu rnuuz, gal nu de yu nu rteꞌ tublaazh la gyet lagy dey. 37 Nii tub riidz nu rishli nu rnii mbecy: “Tub yu rnuuz yu. Zeꞌ tuubaꞌy rteꞌy.” 38 Ya̱ bzuu neza̱ der nu gua teꞌr lat tub nac gyel zeꞌ nu wangyicy la der riiñ. Zeꞌ reñaꞌ dey bicy yu riiñ lat gyel zeꞌ. Zeꞌ de ru byash der cosech nu nac riiñ nu bicy reñaꞌ dey ―nam rab mi de yu nu rsyaꞌ lom.

39 Na, tonaꞌ la zigy de mbecy Samaria nu yuꞌ gyedz zeꞌ bicy cup dey consuel lo Jesuuz nu nac nu mnii biñ mñaa zeꞌ lo dey. Orzeꞌ nam: “Mi zeꞌ mniim lo̱ dela coz nu bicya̱”, nam. 40 Na ornu bruꞌña de mbecy Samaria lom, orzeꞌ mnishbaa dey lom nu gyiyeeñ mi num dey. Orzeꞌ byeeñ num dey cyup dzi. 41 Orzeꞌ zigy zir mbecy bicy cup dey consuel lo Jesuuz nu nac de riidz nu mniim. 42 Orzeꞌ na dey rab yu biñ mñaa zeꞌ:

―Na ricy cup de̱ consuel lo Jesuuz walab nu nac riidz nu mnii ziꞌl ru, sinu nu nac nu güeñ gyidag la de̱. Nunu rishli gud lagy de̱ nu mi ii nac mi biñ nu co mbañ de mbecy nu yuꞌ gyishlombecy ―na dey rab yu biñ mñaa zeꞌ.

43 Na ornu bded ni cyup dzi zeꞌ, orzeꞌ bruu Jesuuz Samaria nu yam par lo de yu ni Galilea. 44 Gun laab ub mi mniim nu tub yu nu rnii por cuen ni Ñgyoozh waca lagy de mbecy ledz yu loy, nam. 45 Na ornu brim lo de yu ni Galilea, orzeꞌ de mbecy nu yuꞌ de lugaar zeꞌ nap bicy nu dey mi, gun bi bya dey saꞌ ni Pas Jerusaleeng. Ndeꞌ bi bzaac dey de coz nu bicy mi lat saꞌ zeꞌ.

46 Orzeꞌ Jesuuz bish cyam zam Caná, tub gyedz nu ri lo yu ni Galilea. Laab lugaar zeꞌ nu bicy mi nu byac nis ñup ni urbyay. Na zu tub mbecy nu zu riiñ ni gubier. Zeꞌ iꞌñ yu mbish rat yu Capernaum. 47 Yu zeꞌ, ornu güeñ yu nu bruum Judea nu brim Galilea, orzeꞌ guay mnishbaay lom nu cham yuꞌy nu gyicy yac mi iꞌñ yu, gun bi zuu lay nu gat yu. 48 Orzeꞌ Jesuuz nam rab mi yu nu zu riiñ zeꞌ:

―De ru wagyicy cup der consuel lo̱ benu wazac der muesht o nusuriidz ―nam.

49 Orzeꞌ na yu nu zu riiñ zeꞌ rab yu Jesuuz:

―Jesuuz, yaa chan gun nis gat iꞌña̱ ―nay.

50 Orzeꞌ na Jesuuz rab mi yu:

―Yaa la gun iꞌñ ru mbañ yu ―nam.

Orzeꞌ mbecy zeꞌ guña lagy yu de riidz nu mnii Jesuuz. Orzeꞌ yay. 51 Na nez nu yay, orzeꞌ gua cheel de moz niy yu. Orzeꞌ na dey:

―¡Iꞌñ ru mbañ yu! ―na dey.

52 Orzeꞌ bdugyiꞌy lo dey ben la or brugyiꞌ nu zesu nap lagy iꞌñ yu. Orzeꞌ na dey rab yuy:

―Naag, tub gyiib tub or gudze, orzeꞌ bruu zig yu ―na dey.

53 Orzeꞌ byezaꞌ lagy yu nu laab or zeꞌ mnii Jesuuz loy. Ornu nam: “Iꞌñ ru gruu mbañ yu”, nam.

Orzeꞌ bicy cup dey consuel lom nu dela famil niy.

54 Ndeꞌ nusuriidz cyup nu bicy Jesuuz despuees nu bruum lo yu nu la Judea ornu zam par lo de yu ni Galilea.