27
Jesuuz zam lo Pilato
Laab bzaꞌ yu la tuubaꞌ dzi, orzeꞌ de uz zub lo gal nu de yu bel ni de mbecy Israeel byatublaazh dey par nu go dey riidz ben lac mod gyicy dey par nu gat Jesuuz. Orzeꞌ pcyiig dey mi za nuy mi. Orzeꞌ bguꞌ dey mi yaa Poncio Pilato, yu nu riib ic por cuen ni gubier Rom.
Gut Judas
Na ornu Judas, yu nu bish cya ich Jesuuz, ornu gud lagy yu nu mnii dey nu gat Jesuuz, orzeꞌ brugyiꞌ nu rnii tooy nu nap zir benu cueꞌ ñlyuuy Jesuuz lo dey. Orzeꞌ bish cyay gua zeeñ yu gal rub tii tiñ plat zeꞌ lo de uz zub lo, nu lo de yu bel ni de mbecy Israeel. Orzeꞌ nay:
―Ya̱ shiñ bicya̱ nu nac nu bish cya̱ ich tub mbecy nu sac falt ni, nunu gashtal cut la dey yu ―nay.
Tees de yu zeꞌ nay rab yuy:
―Par nu nac nu ndeꞌ se la la nu ricy ñi ne̱ de̱ ya̱. ¡Ndeꞌ cuen ni ru! ―na dey rab yu Judas.
Orzeꞌ mneꞌ la Judas tiñ zeꞌ loliꞌ ni yuꞌ nu driib zily mbecy Ñgyoozh. Orzeꞌ bruuy zeꞌ yay. Orzeꞌ bzaab gyi̱y ub yu.
Orzeꞌ de uz zub lo pteꞌ dey dela tiñ zeꞌ. Orzeꞌ na dey:
―Wac zeeñ den tiñ ii nañ alcansi ni gun, gun tiñ ii bicy ñi nu gut mbecy ―na dey.
Orzeꞌ psaap dey riidz ben lac gyicy nu dey tiñ zeꞌ. Orzeꞌ wii dey tub nac yu nu la Yu ni Mbecy nu Rzaa Gyis. Orzeꞌ yu zeꞌ wii dey ñi nu tiñ zeꞌ, par nu gac ñii tub campyo̱o̱ nu cach dey de mbecy yad. Ndeꞌ nu gashtal tiem na, yu zeꞌ lañ Yu nu Guud nu Nac Reñ. Ni mod guc ñi par nu byuꞌ niñ gal nu mnii Jeremías, tub yu nu mnii por cuen ni Ñgyoozh, ornu nay:
Orzeꞌ gush dey gal rub tii tiñ plat zeꞌ,
pres nu mnii de mbecy Israeel nu cyish dey nu nac mi.
10 Orzeꞌ nu tiñ zeꞌ wii dey tub nac yu nu la Yu ni Mbecy nu Rzaa Gyis,
gal nu mnii Ñgyoozh lo̱ nu gyicya̱,
na Jeremías.
Jesuuz zum lo Pilato
11 Na Jesuuz zum lo yu nu riib ic por cuen ni gubier par nu cugyiꞌy lom. Orzeꞌ nay:
―¿A ru nac ru rey ni de mbecy Israeel? ―nay.
Orzeꞌ na Jesuuz:
―Laab ni gal nu ru mniir ―nam.
12 Orzeꞌ de uz zub lo zeꞌ gal nu de yu bel ni de mbecy Israeel brugyiꞌ driib dey cyi too Jesuuz, tees rila wanniim. 13 Orzeꞌ Pilato bdugyiꞌy lom tuubaꞌ tir:
―¿A wagyeñ ru de cyi nu driib dey toor? ―nay.
14 Tees Jesuuz ni tub riidz wanniim. Orzeꞌ Pilato, yu nu riib ic zeꞌ, tonaꞌ la za nu ic yu.
Mnii dey nu Jesuuz rlagy ñi gat mi
15 Na de ñaꞌn la, lat nu rzuꞌ saꞌ ni Pas, orzeꞌ yu nu riib ic zeꞌ, rlaay tub pres: ca ziꞌl na yu nu gnii mbecy nu dulaa. 16 Tees tiem zeꞌ ri tub mbecy nu la Barrabás pres. Yu zeꞌ dela mbecy yuꞌ lo dey yu par nu dzi coz ily bicy yu. 17 Orzeꞌ lat nu bi yuꞌ tublaazh de mbecy, orzeꞌ na Pilato rab yu dey:
―¿Ca na mbecy rlagy der nu gla̱a̱? ¿A gla̱a̱ Barrabás o ti gla̱a̱ Jesuuz, yu nu rnii der Mesías? ―nay.
18 Ni mniiy gun nap gud lagy yu nu nac gyel rasaap lagy, ndeꞌ nu bguꞌ dey Jesuuz yaay.
19 Na lat nu gusub Pilato lugaar zeꞌ nu dri beey cyi, orzeꞌ bzeed mñaay tub raso̱o̱ loy. Orzeꞌ nam: “Cueꞌ neꞌ ic ru lat asunt ni mbecy nu sac falt ni zeꞌ, gun che tonaꞌ la shiñ bguu pcaala̱ nu nac mi zeꞌ”, na mñaay.
20 Tees de uz zub lo zeꞌ gal nu de yu bel zeꞌ pcuugy dey lardoo de mbecy zigy nu cyiñ dey nu glaa Pilato Barrabás. Orzeꞌ cyiñ dey nu gat Jesuuz. 21 Tees ornu ni bicy dey, orzeꞌ Pilato, yu nu riib ic zeꞌ, orzeꞌ bdugyiꞌy lo dey tuubaꞌ tir. Orzeꞌ nay:
―¿Ca na dey lo cyup yu rlagy der nu gla̱a̱ yu? ―nay.
Orzeꞌ na de mbecy:
―¡Barrabás! ―na dey.
22 Orzeꞌ na gaꞌ Pilato:
―Zeꞌ ¿la coz rlagy der nu gyicya̱ du̱ Jesuuz, yu nu rnii der Mesías? ―nay.
Orzeꞌ dela dey mniiy:
―¡Cut ruy lo cruuz! ―na dey.
23 Orzeꞌ na gaꞌ Pilato:
―¿La ñuu coz a̱ꞌ nap bicy yu? ―nay.
Tees dzi zir bish ti dey. Orzeꞌ na dey:
―¡Cut ruy lo cruuz! ―na dey.
24 Na ornu Pilato gud lagy yu nu wayicy yu gan, sinu de mbecy zigy bi yuꞌ la dey nu gyicy yu coz deet, orzeꞌ mniiy lo tub mbecy nu cha gyiiy nis par nu naay lo rgüii la dela mbecy. Orzeꞌ nay:
―Ya̱ sac falt ne̱. Benu cut der mbecy nap ii, ndeꞌ falt ni de ru ―nay.
25 Orzeꞌ na gaꞌ de mbecy zigy:
―Nu gat yu zeꞌ, ndeꞌ cuen ne̱ de̱ ya̱, gal nu ni de nez de̱ nu gruu zac par lo ―na dey.
26 Orzeꞌ Pilato blaay Barrabás nu nac de riidz nu mnii de mbecy. Orzeꞌ bicy yu mandaar nu gaaz dey Jesuuz. Orzeꞌ bguꞌy mi yaa dey par nu caa dey mi lo cruuz.
27 Orzeꞌ de soldad gua nu dey mi nañ yuꞌ zeꞌ nu riib ic de gubier. Orzeꞌ dela soldad nu yuꞌ zeꞌ byatublaazh dey lom. 28 Orzeꞌ bloo dey shab mi. Orzeꞌ bzuu dey mi tub negy ña. 29 Gazeꞌ nu bel dey ya gyech. Bzaa dey tub coron nu bri dey toom. Orzeꞌ bzuu dey tub yagyi yaa beem. Orzeꞌ gusu tib dey lom. Nunu brugyiꞌ rguu bdzaa dey mi. Orzeꞌ na dey:
―Shnu ru, rey ni de mbecy Israeel ―na dey.
30 Orzeꞌ brugyiꞌ rco yeñ dey lom. Orzeꞌ bloo dey yag nu zu yaam zeꞌ, nunu brugyiꞌ rshet dey ñi toom. 31 Ornu blazh bguu bdzaa dey mi, orzeꞌ bloo dey negy ña zeꞌ yeñ mi. Orzeꞌ bzuu dey mi laab shab mi. Orzeꞌ za nu dey mi par nu caay mi lo cruuz.
Pcaa dey Jesuuz lo cruuz
32 Orzeꞌ nez nu za dey bdzeel yu tub mbecy Cirene, yu nu la Simo̱o̱. Orzeꞌ por fers la pcaa dey yu nu cha nuy cruuz ni Jesuuz. 33 Orzeꞌ bruꞌña dey tub lugaar nu la Gólgota. Ndeꞌ tub riidz nu yaruuñ: Lugaar ni cyug too añ. 34 Gazeꞌ nu briic dey ñup urbyay nu yuꞌ can nu tub lo coz lya nu goꞌm. Tees ornu bicy mi preb ñi, orzeꞌ wangalagy mi goꞌm ñii.
35 Orzeꞌ pcaa dey mi lo cruuz. Orzeꞌ de soldad bloo dey cuen ben ca na dey dugyiy tub ga shab mi. 36 Despuees ni de nu ndeꞌ, orzeꞌ gusub dey nu rñay mi. 37 Orzeꞌ par too cruuz nu pcaa dey mi, pcaa dey tub gyicy cyim nu rniiñ de falt nim. Orzeꞌ rniiñ: “Yu ii Jesuuz, rey ni de mbecy Israeel”, rniiñ.
38 Orzeꞌ niꞌ ziꞌl pcaa dey cyup gubaan lo cruuz cuit mi: tub yu par yaa beem, zeꞌ tuubaꞌy par yaa reg mi. 39 Orzeꞌ de mbecy nu rded lom rgyib la ic dey nu gyel rgubdzaa, nunu rab zi dey mi. 40 Orzeꞌ na dey:
―Ru mniir nu nit lor yuꞌ nu driib zily mbecy Ñgyoozh, nunu nañ chon dzi mniir nu shes sur ñii. ¡Na bloo mbañ ub ru na! Benu rishli nac ru iꞌñ Ñgyoozh. ¡Bet lo cruuz! ―na dey.
41 Niꞌ ziꞌl de uz zub lo, nu de yu nu rlyuu leey ni Ñgyoozh, nu de yu bel ni de mbecy Israeel bgubdzaa dey mi.
42 Orzeꞌ na dey:
―Bloo mbañ yu reñaꞌ mbecy, tees ub yu wagac co mbañ yu. Nunu nac yu rey ni de mbecy Israeel. Zeꞌ benu gyet yu lo cruuz, orzeꞌ cheña lagy den niy. 43 Bicy cup yu consuel lo Ñgyoozh. Na rlagy ñi co mbañ Ñgyoozh yu benu rishli yet lagy mi mod nu bicy yu, gun rniiy nu nac yu iꞌñ mi ―na dey.
44 Orzeꞌ niꞌ ziꞌl de gubaan nu ca num lo cruuz brugyiꞌ nu rgubdzaa dey mi.
Gut Jesuuz
45 Orzeꞌ tub or widoo bet cow dutuub la lo yu gal tub gyiib chon or gudze, gazeꞌ nu bzu yaa. 46 Gazeꞌ nu or zeꞌ ye brish ti Jesuuz. Orzeꞌ nam:
―Elí, Elí, ¿lema sabactani? ―nam.
Riidz zeꞌ yaruuñ: “Ñgyoozh ne̱, Ñgyoozh ne̱, ¿lagu bzaan ru ya̱?”
47 Orzeꞌ la be mbecy nu yuꞌ zeꞌ, ornu güeñ dey nu brish tim, orzeꞌ na dey:
―Yu re rbedz yu Elías, yu nu mnii por cuen ni Ñgyoozh ―na dey.
48 Orzeꞌ lueg la tub mbecy gush yu carer gua gyiiy tub coz nu chayoꞌ nis. Orzeꞌ psal yuñ lo ñup zii ni urbyay. Gazeꞌ nu bzuub yuñ lo tub yagyi. Briic yuñ goꞌm. 49 Tees deꞌ zir mbecy na dey:
―Blez güiin, ben a cyid Elías nu co mbañ yuy ―na dey.
50 Orzeꞌ tuubaꞌ tir ye brish tim. Orzeꞌ gut mi. 51 Orzeꞌ laab or zeꞌ negy nu zaab gyeroꞌ ni lugaar yon nañ yuꞌ nu driib zily mbecy Ñgyoozh pshala lañ gaal zi nu gush ñi gal ic lañ nu gal lo yu la. Nunu briib duru. Nunu de gyitaꞌ bet rich ñi. 52 Nunu de baa ni añ byaal ruꞌñ. Nunu zigy mbecy ni Ñgyoozh nu bi gut byabañ dey. 53 Orzeꞌ bruu dey gyerbaa niy. Na despuees, ornu byabañ Jesuuz, orzeꞌ bya dey Jerusaleeng, gyedz ni Ñgyoozh. Orzeꞌ zeꞌ zigy mbecy bzaac dey de yu zeꞌ.
54 Na ornu bzaac yu nu riib ic de soldad gal nu deꞌ zir soldad nu briib duru zeꞌ nu dela deꞌ zir coz nu guc, orzeꞌ gudzib dey. Orzeꞌ na dey:
―¡Rishli gaal biñ ii guc mi iꞌñ Ñgyoozh! ―na dey.
55 Orzeꞌ zet yuꞌ zigy biñ mñaa. Rgüii dem lo Jesuuz. Laab de mi zeꞌ biñ nu gua ca ich Jesuuz nese nu gusam Galilea, nunu blocyuub dem Jesuuz. 56 Lat de biñ mñaa zeꞌ ri Li nu bruu tub gyedz nu la Magadán, nu tuubaꞌ Li, ñaa Santiag nu See, nu ñaa de iꞌñ Zebedeo.
Pcach dey Jesuuz
57 Na or bi yecheñ, orzeꞌ bruꞌña See, tub mbecy guaniꞌñ nu bruu Arimatea. Niꞌ yu zeꞌ nac yu tub yu nu rsyaꞌ lo Jesuuz. 58 Orzeꞌ guay lo Pilato, nu bdiiñ yu cuerp ni Jesuuz loy. Orzeꞌ Pilato mniiy nu cuic dey cuerp ni Jesuuz ni See. 59 Orzeꞌ gush yu cuerp nim, nunu ptiish yuñ tub sab cacy fin. 60 Orzeꞌ gua riy mi nañ tub gyerbaa cub ni ub yu. Gyerbaa zeꞌ sa bicy yu mandaar nu bduuñ dey ñi nañ gyitaꞌ. Orzeꞌ psoow yu ruꞌñ nu tub gyitaꞌ ily. Orzeꞌ yay. 61 Tees Li nu bruu Magadán, nu tuubaꞌ Li gucua dem ruꞌ baa zeꞌ.
Mña dey gyerbaa ni Jesuuz
62 Na or bzaꞌ yu tuubaꞌ dzi, laab ndeꞌ dzi nu rzu lagy mbecy, orzeꞌ de uz zub lo, nu de mbecy fariseo gua dey lo Pilato. 63 Orzeꞌ na dey:
―Shi Pilato, byezaꞌ lagy de̱ nu lat nu gabee mbañ mbecy rguu zeꞌ, orzeꞌ nay: “Ornu bi bzaꞌ chon dzi nu guta̱, orzeꞌ gyabaña̱”, nay. 64 Ndeꞌ nu ne̱e̱ lor nu gyicy ru mandaar lo de mbecy nu cha ña dey ruꞌ baa niy gashtal shuub la dzi chon, gun nis ruꞌña de yu nu rsyaꞌ loy rel. Orzeꞌ co dze dey cuerp niy. Gazeꞌ nu nii dey lo mbecy nu byabañ yu. Orzeꞌ benu ni gac nu nac gyel rguu zeꞌ, orzeꞌ shiñ zir gruuñ gazeꞌ gyel rguu nu mnii Jesuuz nu loga ―na dey.
65 Orzeꞌ na Pilato:
―Gac cha nu der de soldad nu gña dey. Gua der nu gyicy segur ru ruꞌ baa niy. Ca na la benu gac ―nay.
66 Orzeꞌ bruu dey zay. Nunu bicy segur dey ruꞌ baa. Orzeꞌ pcaa dey beey lo gyitaꞌ nu rsoow ruꞌ gyerbaa zeꞌ. Nunu bzeeñ dey soldad zeꞌ nu rña dey.