7
De yu nu zub sey cyuga
1 Despuees ni de nu ndeꞌ, orzeꞌ bzaaca̱ tap anc zu tub gay zaꞌ tap la scyiñ ni gyishlombecy. Orzeꞌ de yu zeꞌ bicy dey nu cuez zaꞌ tap la bi ni gyishlombecy, gun orzeꞌ cueꞌ nu gruuñ lo nisyudoo, ni lo yu. Ni lo ni tub la yag waruuñ. 2 Orzeꞌ bzaaca̱ tub anc yad yu par zeꞌ nu driib doo. Yu zeꞌ nuuy tub gyiib nu nac sey ni Ñgyoozh mbañ. Orzeꞌ anc zeꞌ ye la brish ti nuy de tap anc zeꞌ, como bi guud rishbeey ni dey nu ted ziy lo yu gal nu lo nisyudoo. 3 Orzeꞌ nay rab yu dey:
―¡Cueꞌ ted zir lo yu, ni lo nisyudoo, ni lat de yag, gashtal gzuub la̱ de̱ sey cyuga de mbecy nu ricy coz nu rlagy Ñgyoozh! ―nay.
4 Orzeꞌ güeña̱ nu rnii tub mbecy nu la be la tant mbecy de yu nu gzub sey cyuga zeꞌ. Orzeꞌ ndeꞌ tub gaynal zub cyuu zub tap miily dey. De yu zeꞌ bruuy lat dela nez mbecy Israeel. 5 Orzeꞌ trocyup miily de mbecy Israeel nu bruu lat nez Judá, de yu zeꞌ bzub sey cyuga dey. Zeꞌ trocyupaꞌ miily de yu nu bruu lat nez Rubén. Zeꞌ trocyupaꞌ miily de yu nu bruu lat nez Gad. 6 Zeꞌ trocyupaꞌ miily de yu nu bruu lat nez Aser. Zeꞌ trocyupaꞌ miily de yu nu bruu lat nez Neftalí. Zeꞌ trocyupaꞌ miily de yu nu bruu lat nez Manasés. 7 Zeꞌ trocyupaꞌ miily de yu nu bruu lat nez Simeón. Zeꞌ trocyupaꞌ miily de yu nu bruu lat nez Leví. Zeꞌ trocyupaꞌ miily de yu nu bruu lat nez Isacar. 8 Zeꞌ trocyupaꞌ miily de yu nu bruu lat nez Zabulón. Zeꞌ trocyupaꞌ miily de yu nu bruu lat nez See. Zeꞌ trocyupaꞌ miily de yu nu bruu lat nez Benjamiing.
Tub nac mbecy zigy nu zu negy cacy
9 Despuees ni de nu ndeꞌ, orzeꞌ bgüi̱i̱, nunu bzaaca̱ nu yuꞌ tub nac mbecy zigy tonaꞌ la. Par nu tantaꞌ zigy dey, ni wagacaꞌ dulab dey. Orzeꞌ de yu zeꞌ bruuy lat de lo la nac mbecy. Bruu dey lat de lo la nez mbecy. Bruu dey lat de mbecy nu rnii de lo la riidz. Nunu mas gashtal lat dela mbecy bruu dey. Orzeꞌ bzu dey par lo yashily zeꞌ, nunu par lo biñ nu nac Shily zeꞌ. Zu dey negy cacy duñ, nunu zu yaa dey yaa yagyiñ. 10 Orzeꞌ ye la rbish ti dey. Orzeꞌ na dey:
¡Ñgyoozh, biñ nu zub lo yashily zeꞌ, nac mi biñ nu rboo mbañ de mbecy!
¡Niꞌ ziꞌl biñ nu nac Shily nac mi biñ nu rboo mbañ de mbecy!
11 Orzeꞌ dela de anc yuꞌy dub yub la zeꞌ nu zu yashily zeꞌ, gal nu zeꞌ nu yuꞌ de yu bel zeꞌ, gal nu zeꞌ nu yuꞌ tap de mbecy mbañ zeꞌ. Orzeꞌ wes saa tiily dey gal lo yu la par zeꞌ nu zu yashily zeꞌ. Orzeꞌ briib zily dey Ñgyoozh. 12 Orzeꞌ na dey:
¡Laab ni gac ñii!
Yad ñi ni Ñgyoozh ni den nu gyed gyel mbecy nim.
Yad ñi nim nu dugyim gyel lily.
Yad ñi nim nu gad lagy mi dela coz.
Yad ñi nim nu gyash mi de gras nu gric den nim.
Yad ñi nim nu ca lagy den lom.
Yad ñi nim nu gac gyicy mi dela coz.
Yad ñi nim nu nac mi biñ fert.
Dela nu ndeꞌ yad ñi ni Ñgyoozh ni den dub laa tiem par lo.
¡Laab ni gac ñii!,
na dey.
13 Orzeꞌ tub de yu bel zeꞌ bdugyiꞌy lo̱. Orzeꞌ nay:
―¿Cyu mbecy, de yu nu zu negy cacy duñ? ¿Nunu ca bruu dey? ―nay.
14 Orzeꞌ ya̱ mne̱e̱ loy:
―Ru rad lagy ru ca bruu dey ―mne̱e̱.
Orzeꞌ nay rab yu ya̱:
―De yu re yu nu bruu lugaar zeꞌ nu tonaꞌ la deet guc. De yu re yu nu gu shab, nunu bicy caacy dey ñi lo reñ biñ nu nac Shily.
15 Ndeꞌ nu yuꞌ dey zeꞌ nu zu yashily nu riib ic Ñgyoozh.
Dzi rel la ricy dey coz nu rlagy mi nañ yuꞌ nim.
Orzeꞌ biñ nu zub lo yashily zeꞌ rsoow mi too dey
par nu cueꞌ nu shiñ gzac yu,
gun yuꞌ dey zeꞌ nu zum.
16 Zeꞌ wazac zi gaꞌ dey nu gyan yu.
Ni nis wabigyaꞌ dey.
Ni ba wachuu gaꞌñ cuerp ni dey.
Ni nu zig wayicy seedaꞌñ dey.
17 Gun biñ nu nac Shily nu zu gazel zeꞌ nu zu yashily zeꞌ,
mi zeꞌ gñam dey gal nu rña mbecy Shily niy.
Orzeꞌ cha num dey zeꞌ nu driib nis, nis nu rbic gyel mbañ.
Orzeꞌ Ñgyoozh cuiigy mi dela nis nu druu urlo dey
―nay.