1 Tej náꞌ lo goꞌ jwanꞌ nzola xata mdobte nera, jwanꞌ mbin náꞌ, jwanꞌ mbwiꞌ lo náꞌ, jwanꞌ mne náꞌ nde kon yaꞌ náꞌ mbwal náꞌ jwanꞌ nak Diꞌs ndaꞌ yalnaban. 2 Tak leꞌ yalnaban mbroꞌtoy lo men nde mbwiꞌ náꞌy, nde ndaꞌ náꞌ kwent chanꞌ naꞌy nde ndej náꞌ leꞌy nak yalnaban adiꞌ, leꞌy ndo kon Xud naꞌ Dios nde mbroꞌtoy lo náꞌ. 3 Jwanꞌ mbwiꞌ náꞌ nde mbin náꞌ, jwanꞌ naxa ndotej náꞌ lo goꞌ, sa thita gak naꞌ, nde lipa thita gak naꞌ kon Xud naꞌ Dios nde kon xinꞌ Xaꞌ Jesucrist. 4 Jwanꞌ reꞌ ngekeꞌ náꞌ lo goꞌ, sa thiptane yo nale lazoꞌ reta naꞌ.

5 Jwanꞌ reꞌ nak jwanꞌ mbin náꞌ mdej Jesucrist lo náꞌ nde jwanꞌ naga ndeja náꞌ lo goꞌ: Dios nak xni, nde naꞌndonod Xaꞌ nek lud yalꞌkow. 6 Tez gab naꞌ, thita nak naꞌ kon Xaꞌ, nde ngetenꞌ lo yalꞌkow, nkwinꞌ naꞌ nde naꞌngelid naꞌ jwanꞌ galꞌpa. 7 Per tez ngetenꞌ lo xni, ta xa ndo Dios lo xni, zyasa thita gak reta naꞌ, nde ren chanꞌ Xinꞌ Xaꞌ Jesús, tombiy naꞌ lo reta xken naꞌ.

8 Tez gab naꞌ naꞌngenod naꞌ yalke, leꞌga lazonꞌ nge kwinꞌnonꞌ, nde nandlid naꞌ jwanꞌ galꞌ. 9 Per tez xobdol naꞌ reta xken naꞌ lo Dios, mnega naꞌ leꞌ Dios nak Xaꞌ galꞌ, tonꞌ Xaꞌ reta xken naꞌ nde tombi Xaꞌ naꞌ lo reta jwanꞌ narax mblinꞌ. 10 Tez gab naꞌ, tera linꞌ yalke, zyasa ndlilal naꞌ Dios Xaꞌ kwinꞌ, tak teraꞌ lipa lazonꞌ xkiꞌs Xaꞌ.