1 Teoj xa' ntak toz,*1:1 Lc. 1:1-4. yeꞌs ner jwanꞌ mkeꞌn loa, tya mdej na re jwanꞌ mdobte mbli Jesús nde re jwanꞌ mbloꞌ Xaꞌ, 2 axta kebeꞌ mzin wiz ngwap Jesús lo beꞌ. Sen' ngol be' yap Jesús, kon Mbi Nayon mnabe' Jesús re jwanꞌ ndablo li re xaꞌ nak apóst Xa', men jwan' mblía Xaꞌ. 3 Nde sen' ngujla Jesús, xisa mbroꞌto naban Xaꞌ lo re men nak apóst Xaꞌ, naꞌr toz mod mbloꞌ Jesús liga naban Xaꞌ. Lenꞌ choꞌ wiz mbroꞌto Xaꞌ lo re men nak apóst Xaꞌ, nde mdej Xaꞌ re jwanꞌ nak yalnyebeꞌ chanꞌ Dios.

4 Ti gob sen' thita nzi re xa', zya mnabeꞌ Jesús lo re xaꞌ sa naꞌryoꞌd xaꞌ yez Jerusalén. Nchab Jesús lo re xa':

—Bled go' sa kaya' go' jwanꞌ mkeꞌyek Xud na' Dios,†1:4 Lc. 24:49. re jwanꞌ xa mdejla na lo goꞌ. 5 Tak Juan, liga benꞌta lenꞌ nit mblole xaꞌ men, per goꞌ lenꞌ ti plata wiz ryoꞌle goꞌ kon Mbi Nayon.‡1:5 Mt. 3:11; Mr. 1:8; Lc. 3:16; Jn. 1:33.

6 Zyasa re xaꞌ jwanꞌ nzidop tya mnabdiꞌs xaꞌ lo Jesús, nchab xaꞌ:

—Xaꞌ Nyebeꞌ, ¿Cho naya ngoxoꞌb beꞌ si'rea yalnyebeꞌ lo yez Israel tedib gob?

7 Leꞌ Jesús mkab lo xaꞌ:

—Naꞌndiꞌnta goꞌ nye goꞌ cho beꞌ nde cho wiza, benꞌta Xud na' mney tak Xaꞌ ngeno yalnyebeꞌ li Xaꞌy. 8 Per kayaꞌ go' yalne, senꞌ dib ben' go' ke' Mbi Nayon nde yatej goꞌ xkiꞌs na yez Jerusalén, dib lo xyon Judea nde lo xyon Samaria nde axta ploja mdib izyo.§1:8 Mt. 28:19; Mr. 16:15; Lc. 24:47-48.

9 Senꞌ mne nchab Jesús re jwanꞌ reꞌ, nzi wiꞌta re men ngwap Jesús lo beꞌ, mbro' ti xkow mdapa dib Jesús, nde naꞌngwi'tra' xaꞌ Jesús.*1:9 Mr. 16:19; Lc. 24:50-51. 10 Nde laj nziwi' gal' re xaꞌ lo beꞌ xa ndoyap Jesús, zya gax cho re xaꞌ mbroꞌto chop mbiꞌ†1:10 Rop xaꞌ biꞌ reꞌ nak Ang chanꞌ Dios dib xa' nok lar nakis, 11 rop mbiꞌ ya nchab lo re xaꞌ:

—Mbiꞌ lo xyon Galilea, ¿Cho kwan liy ngwiꞌ goꞌ lo beꞌ? Leꞌga Jesús ta mbroꞌ xij goꞌ reꞌ, ta xa ndya Xaꞌ lo beꞌ, taxa bere Xaꞌ tedib gob.

12 Zyasa mbroꞌ xaꞌ yek kox ndole Olib sa mbere xaꞌ yez Jerusalén tedib gob (mde xaꞌ jwan' xapka ndaꞌ ley diꞌs ndye men lenꞌ wiz jwanꞌ ndryoꞌxkwen men). 13 Senꞌ mzin re xaꞌ lenꞌ yez, zya ngwap xaꞌ lenꞌ yo xtaꞌ gap tenꞌ mbed xaꞌ nde tya mdyop re xaꞌ reꞌ: Pedr, Jakob, Juan, Ndres, Blib, Max, Bartol, Mateo, Jakob xinꞌ Alfeo, Simón xaꞌ cananist‡1:13 Re xaꞌ zelot, nak tib ned men jwanꞌ ncholaꞌs toz xa' tolaꞌ xaꞌ re men las xaꞌ jwanꞌ nak Israel lo yaꞌ re xaꞌ Rom., nde Judas wes Jakob.§1:13 Mt. 10:2-4; Mr. 3:16-19; Lc. 6:14-16. 14 Reta xaꞌ reꞌ thiblaꞌ ndyop xaꞌ sa thita ndyodiꞌsno xaꞌ Dios nde nyaꞌb xaꞌ lo Dios, xija nzo tipla ngol nde noga Marí xnaꞌ Jesús nde kon re wes Jesús.

15 Lenꞌ wiz ya, Pedr mdoli xij reta wes nzi tya (tak tya nziga te' thib ayoꞌ nzo thib galka men), nde nchab Pedr lo re xaꞌ:

16 —Re go' mbi', wes na, ndabloga ak jwanꞌ ngeni lo xkiꞌs Dios, diꞌs jwanꞌ mtob Mbi Nayon ro rey David, senꞌ lo mdej David Judas, xaꞌ jwanꞌ mdoꞌb ned lo re men ta mxen Jesús. 17 Tak Judas ngok ti xaꞌ ngo xij náꞌ nde no xaꞌ ngok sinꞌ lo jwanꞌ reꞌ. 18 Leꞌ tmi jwanꞌ mzenaꞌ xaꞌ lo yalnaraxa, tmi ya mxiꞌ xaꞌ tible izyo, tya ngob tathoꞌ xaꞌ nde ngoskiꞌ xaꞌ axta mbroꞌche re xtiꞌ xaꞌ. 19 Lo ta mbin reta men yez Jerusalén jwanꞌ ngok, jwanꞌ nasa izyo ya xki's xa' ndoley, "Acéldama", diꞌs ya nak: "Izyo ren".*1:19 Mt. 27:3-8. 20 Tak ta ngeni lo yeꞌs chanꞌ Salmo, jwanꞌ nchab:

21 Jwanꞌ nasa nakin'ka xij na' reꞌ kon' ti mbiꞌ jwanꞌ mdo kon naꞌ lo dipta mketenꞌ kon Jesús Xaꞌ Nyebeꞌ. 22 Xata mdobtey senꞌ mblole Juan Jesús§1:22 Mt. 3:16; Mr. 1:9; Lc. 3:21. nde axta wiz jwanꞌ ngwap Jesús lo beꞌ,*1:22 Mr. 16:19; Lc. 24:51. ti mbiꞌ ya konꞌ sa laꞌsto xa náꞌ tej xaꞌ liga mbroꞌxban Jesús.

23 Zyasa mbloꞌya' xaꞌ chop mbiꞌ, tib xaꞌ ndole José, xaꞌ ndolegaꞌ Barsabás o Just ni men xaꞌ nde tedib xaꞌ ndole Matí. 24 Zyasa mnaꞌb xaꞌ lo Dios, nchab xaꞌ:

—Xaꞌ Nyebeꞌ, lu nzolo lazoꞌ reta men, bloꞌ lo náꞌ nyenꞌ xanya tib rop mbi' reꞌ mblía, 25 sa xaꞌ ya kayaꞌ rsinꞌ Judas nde ak xaꞌ men jwanꞌ telꞌ la, tej xkiꞌs la, sinꞌ jwanꞌ mblaꞌ Judas por yalke jwan' mbli xaꞌ, nde nda xaꞌ tenꞌ nsal' xa' ya xaꞌ.

26 Zyasa mblibeꞌ xaꞌ rop mbiꞌ ya, nde ngobeꞌ Matíy, nde mbla Matí xij re siꞌbthib xaꞌ jwanꞌ nak apóst.