1 Lenꞌ re wiz ya, senꞌ jwanꞌ toz ndoya'r re men ndli lazonꞌ Jesús, zyasa re xaꞌ ni diꞌs gryeg mbrezno xaꞌ re xaꞌ ni diꞌs hebreo nchab xaꞌ, leꞌ re ngol nguj salꞌ naꞌ, xaꞌ jwanꞌ ni diꞌs gryeg naꞌndokayaꞌd xaꞌ jwanꞌ nakinꞌ xaꞌ re wiz jwan' xa ndabloy. 2 Zyasa re thibsen apóst mthopbe xaꞌ reta men ta ndli lazoꞌn Jesús nde nchab xaꞌ:

—Naleꞌda naka laꞌ náꞌ na'tejtra' náꞌ xkiꞌs Dios, sa benꞌ wi' náꞌ jwanꞌ nakinꞌ re men. 3 Jwanꞌ nasa re go' wes na, ptan na, pkwanꞌ goꞌ gaz mbiꞌ xij reꞌ, xaꞌ jwanꞌ wen nzoꞌb xkiꞌs naꞌ, dib xaꞌ mdeꞌ Mbi Nayon nde nchen xaꞌ, lo xaꞌ ya tayaꞌ náꞌ sinꞌ reꞌ. 4 Sa leꞌ náꞌ thibka todiꞌsno náꞌ Dios nde tej náꞌ xkiꞌs Dios lo re men.

5 Zyasa mbroꞌ lazoꞌ reta men diꞌs ya, nde mblí xaꞌ Esteb, mbiꞌ ndli toz lazonꞌ Dios nde xa' mdeꞌ Mbi Nayon, tya mblí xaꞌ Blib, Prokoro, Nicanor, Timón, Parmen, nde Lax, xaꞌ yez Antioquía, xaꞌ jwanꞌ ngolal xaꞌ judí. 6 Zyasa ngwano xaꞌ re gaz mbiꞌ reꞌ lo re apóst, sa mnaꞌb xaꞌ lo Dios nde mxoꞌb xa' yaꞌ xaꞌ yek re gaz mbiꞌ ya.

7 Leꞌ xkiꞌs Dios masraꞌ ndoraꞌsa nde taja ndoyaꞌr re men jwan' ndli lazonꞌ Jesús yez Jerusalén; noga naꞌr re xaꞌ nak ngwleyꞌ mxobyek xaꞌ mblipa lazoꞌ xaꞌ Jesús.

8 Nde Esteb, nak xaꞌ men mdeꞌ yalwen nde yalnyebeꞌ chanꞌ Dios, sa ndli xaꞌ re yalnaro toz nde yalbsye' xij re men yez. 9 Zyasa pla xaꞌ jwan' ndye yo ten' ndyop re xa' Israel jwan' ndole Mos Mblyaꞌ, nde pla xa' jwan' mbroꞌ yez Ciren, yez Alejandria, lo xyon Cilicia nde lo xyon Asia, re xaꞌ ya jwinka ngwa xaꞌ kwent kon Esteb. 10 Per naꞌndlid xaꞌ gan lo Esteb, tak Esteb ndyodiꞌs kon yalnchak ndaꞌ Mbi Nayon lo xaꞌ. 11 Zyasa mdi'x xaꞌ mka pla men, sa gab men ke mbin xaꞌ mni xin Esteb xis Moisés nde xis Dios. 12 Nde tamod mtoxol xaꞌ reta mayez, re xaꞌ nak sinꞌ lo men judí nde re xaꞌ jwanꞌ nak maestr ndloꞌ ley xkiꞌs Dios, mbla xa' xis Esteb nde mxen xaꞌ Esteb nde mbeꞌ xaꞌ xaꞌ lo xaꞌ nak sinꞌ ro lo yez xa'. 13 Nde mkwanꞌ xaꞌ pla men kwinꞌ jwan' nchab:

—Mbiꞌ reꞌ thiblaꞌ ni xin xaꞌ xis yodoꞌ nayon reꞌ nde xis ley chanꞌ Dios, 14 noga nchon náꞌ ndej xaꞌ, leꞌ Jesús Xaꞌ yez Nazaret lux Xaꞌ yodoꞌ reꞌ nde tseꞌ Xaꞌ mod gox jwanꞌ mtanꞌno Moisés naꞌ.

15 Zyasa reta xaꞌ nak sinꞌ ro lo yez jwanꞌ nzi ndob tya senꞌ mbwiꞌ xaꞌ lo Esteb, mbwiꞌ xaꞌ xaja nya lo ti anj nya lo Esteb.