1 Nde thita ngok Saulo kon re xa' jwan' mbluj Esteb.

Len' wiz ya jwanꞌ toz mdobte mchubla xaꞌ re men ndli lazonꞌ Jesús, jwanꞌ nzi yez Jerusalén; nde mbryaꞌs reta xaꞌ dib lo xyon Judea nde lo xyon Samaria, benꞌta re apósta mbyanꞌ. 2 Nde pla xaꞌ jwanꞌ nxoꞌbyek toz Dios, ngwa kaꞌs xaꞌ Esteb nde jwanꞌ toz mbinꞌno xaꞌ Esteb. 3 Mbay le' Saulo nchubla reta men ndli lazonꞌ Jesús, ndlya xaꞌ reta liz men, ngoꞌbnyo xaꞌ mbiꞌ nde ngol, nde nkeꞌ lizyiꞌb xaꞌ reta men ya.*8:3 Hch. 22:4-5; 26:9-11.

4 Mbay leꞌ re xaꞌ ta mbryaꞌsa, nda xaꞌ reta yez ndatej xaꞌ diꞌs wen chanꞌ Jesucrist lo re men. 5 Zyasa mdola Blib nda xa' yez Samaria, tya mdobte mdej xaꞌ xkiꞌs Jesucrist lo re men. 6 Nde thita ngok reta men, ntonza toz xaꞌ re jwanꞌ mdej Blib, nchon xaꞌ nde ngwiꞌ xaꞌ re yalnaro ro ndli Blib. 7 Tak bro toz re xaꞌ jwanꞌ nzo mbi narax lazonꞌ mbi yek xaꞌ nde re mbi naraxa anta mbez yaja ndyroꞌtey; nde bro toz re xaꞌ jwanꞌ naꞌakta tye nde re xaꞌ ngoꞌb ninꞌ mdyan' xaꞌ 8 Jwanꞌ nasa nale toz ngo lazoꞌ re men yez ya.

9 Per tya nzo ti mbiꞌ ndole Simón, xaꞌ reꞌ ndala ndli xa' yalmxí nde kon jwan'na nkwinꞌno xaꞌ re men nzi Samaria, nxyal' xa' xaga ti xa' ro toza. 10 Nde ntonza toz reta men xkiꞌs mbiꞌ ya, axta re xa' ntak lo yez nde re men tata ba, mbez xaꞌ:

—Jwan' re nak yalne ro chanꞌ Dios.

11 Nde ntonza toz men xkiꞌs mbiꞌ ya, tak ndala ngetetokan xaꞌ re men kon re yalmxí jwanꞌ ndli xaꞌ. 12 Per senꞌ lo mbli lazoꞌ re men diꞌs wen lo yalnyebeꞌ chanꞌ Dios nde lo le Jesucrist jwanꞌ ndej Blib, zyasa ngol nde mbi' mbro'le. 13 Noga yub Simón mbli lazoꞌ xa' Jesús nde senꞌ mbro'le Simón, thiblaꞌ mdonke xaꞌ xis Blib, nde nzoyen xaꞌ ngwiꞌ xaꞌ re yalnaro nde yalbzye jwanꞌ ndli Blib.

14 Senꞌ mbin re apóst jwan' nzi Jerusalén, ke re men lo xyon Samaria mbli lazo' xa' xkiꞌs Dios, zyasa mtelꞌ xaꞌ Pedr kon Juan yez ya. 15 Rop xaꞌ reꞌ, senꞌ ngotu xaꞌ tya, mnaꞌb xaꞌ lo Dios por re men ya, sa kayaꞌ xaꞌ Mbi Nayon. 16 Tak nek thib xaꞌ nzi tya teraꞌ yatu Mbi Nayon yek xa'; benꞌta mbro'le xaꞌ lo le Jesús. 17 Zyasa Pedr nde Juan mxoꞌb yaꞌ xaꞌ yek re men ya, nde mkayaꞌ xaꞌ Mbi Nayon.

18 Lo sen' mbwi' Simón, ke lo mxo'bya' apóst yek re men sa nkayaꞌ men Mbi Nayon, zyasa mta'b simón tmi lo xa', 19 nchab Simón:

—Noga lon pta' goꞌ yalnyebeꞌ ba, sa choja men jwan' xoꞌb yaꞌn yek na' kayaꞌ xaꞌ Mbi Nayon.

20 Zyasa nchab Pedr lo Simón:

—Watobyaj kon tmin la, tak ndlia xgab kon tmi tiꞌa yalnyebeꞌ jwanꞌ ndaꞌlas Dios! 21 Naꞌndaꞌblod la nde naꞌnsalꞌta lu lia sinꞌ reꞌ, tak nagalꞌta nak lazoꞌa lo Dios.†8:21 Sal. 78:37. 22 Bse' xgab la nde blaꞌ jwan' narax nak la, nde mnaꞌb lo Dios teꞌ tonꞌ Xaꞌ xgab narax ta ndlia ba; 23 tak ngwiꞌn jwanꞌ toz nzo naxí lazoꞌa nde lo ya' jwanꞌ narax nkedo'a.

24 Zyasa mkab Simón, nchab xa':

—Mnaꞌb goꞌ por na lo Xaꞌ Nyebeꞌ, sa na'tyakta na nek thib jwanꞌ ta ndej goꞌ ba.

25 Leꞌ rop apóst, senꞌ mne mda' xa' kwent nde sen' mne mdodiꞌs xaꞌ xkiꞌs Dios, zya mbere xaꞌ yez Jerusalén, nde naꞌr toz re yez jwanꞌ nzi lo xyon Samaria mbri'd xa' mdej xaꞌ diꞌs wen chanꞌ Jesucrist.

26 Senꞌ ngolo jwanꞌna, ti anj chanꞌ Xaꞌ Nyebeꞌ nchab lo Blib:

—Ptosaꞌ nde wa ned la, ned izyo nagán jwanꞌ ndryoꞌ yez Jerusalén nde nzina yez Gaza.

27 Zya mdosaꞌ Blib nda xaꞌ. Nde ned ngosiꞌb Blib ti mbiꞌ eunuk‡8:27 eunuk Nso son ned eunuk, tib ned xaꞌ nak nchalno xaꞌ naꞌkad xaꞌ ngol, tedib ned xaꞌ ndryoꞌ xkon xaꞌ nde tedib ned xaꞌ ta ndli xaꞌ sa li xaꞌ sinꞌ lo Dios. yez Etyope xaꞌ, mbiꞌ reꞌ ntobzaꞌ tmi chanꞌ ti rey got, Candace lo xyon Etyope, leꞌ mbiꞌ ya ngwa taꞌ dyux lo Dios yez Jerusalén, 28 senꞌ mbere mbiꞌ, ndob xaꞌ lo karret xaꞌ, ndob lab xaꞌ yeꞌs mkeꞌ profet Isaías. 29 Zyasa nchab Mbi Nayon lo Blib:

—Wa nde bike gax cho karret ba.

30 Senꞌ mbike Blib gax cho karret, zya mbin Blib leꞌ mbiꞌ ya ngelab yeꞌs jwanꞌ mkeꞌ profet Isaías; zyasa mnabdiꞌs Blib lo xaꞌ, nchab Blib:

—¿Cho nchen la jwanꞌ ngelab la?

31 Leꞌ mbiꞌ nchab:

—¿Xomod yen nay ta naꞌngenta cho koxkana lon?

Nde mnaꞌb xa' lo Blib yap Blib lo karret sa tyob Blib cho xaꞌ.

32 Leꞌ lo xkiꞌs Dios tenꞌ ngelab xaꞌ, che' nchaba:

34 Leꞌ xaꞌ ta nak eunuka mna'bdiꞌs xaꞌ lo Blib, nchab xaꞌ:

—Nyaꞌb na loa, ptej lon ¿Cho xaꞌ ta ndej profet ncheꞌ; cho leꞌga profeta o nzo cho tedib xaꞌy?

35 Zyasa leꞌga tenꞌ ta ngelab xaꞌ ya, tya mxen Blib nde mdej Blib diꞌs wen chanꞌ Jesucrist lo xaꞌ. 36 Laj ndo rop xaꞌ ned mzin xaꞌ tenꞌ nzi nit nde nchab xaꞌ lo Blib:

—¡Ncheꞌ nzo nit! ¿Cho nzo kwan nka diꞌs sa ryoꞌlen?

37 Leꞌ Blib nchab:

—Tez dib nzo lazoꞌa ndli lazoꞌa Jesucrist, toyala.

Leꞌ xaꞌ nak eunuka mkab:

—Ndli lazoꞌn Jesucrist nak Xinꞌ Dios.

38 Zyasa mnabeꞌ xaꞌ mblatob karret, mbla rop xaꞌ nde nda xaꞌ lenꞌ nit nde mblo'le Blib xaꞌ. 39 Senꞌ mbroꞌte xaꞌ lenꞌ nit, leꞌ Mbi Nayon chanꞌ Xaꞌ Nyebeꞌ mbliy mtiꞌ Blib, leꞌ xaꞌ nak eunuk naꞌngwiꞌtra xaꞌ Blib, nde nale nzo lazoꞌ xaꞌ nda xaꞌ xned xaꞌ. 40 Leꞌ Blib mbroꞌto yez Azoto, nde a xa ndarid Blib re yez taja ndatej Blib diꞌs wen chanꞌ Jesucrist lo re men, axta kebeꞌ mzin xaꞌ yez Cesarea.