Yeꞌs jwanꞌ mkeꞌ xaꞌ lo re xaꞌ
HEBREO
1
Xinꞌ Dios mblirsinꞌ Dios sa mni Xaꞌ lo men
1 Axta pol toza, naꞌr tozla gob nde naꞌr toz mod mni Dios lo re xaꞌ gox lonꞌ ngo pola nde mblirsinꞌ Xaꞌ re profet lo mni Xaꞌ, 2 per naya, lenꞌ re wiz lulka reꞌ, Dios mblirsinꞌ Xinꞌ Xaꞌ lo mni Xaꞌ lonꞌ. Xinꞌ Xaꞌ mblirsinꞌ Xaꞌ sa mdoxkwaꞌ reta jwanꞌ nzi lo beꞌ nde lo izyo nde lo Xinꞌ Xaꞌ mdayaꞌ Xaꞌ retey. 3 Xinꞌ Dios nak xni nde yalnaro jwanꞌ nak Dios, nde Xaꞌ ndloꞌ dibto jwanꞌ nak Dios, nde kon yalne chanꞌ xkiꞌs Xaꞌ ndenkeꞌ Xaꞌ reta jwanꞌ. Nde ngolo mtombi Xaꞌ naꞌ lo xken naꞌ, seraꞌ mdob Xaꞌ lad ban Dios lo beꞌ, 4 jwanꞌ nasa mas ntak le Xaꞌ lo re anj, tak yalnyebeꞌ jwanꞌ mkayaꞌ Xaꞌ mas naroy ke lo re anj.
Mas ntak Xinꞌ Dios lo re anj
5 Tak nek thib gob nanchabta Dios lo thi anj:
“Lu nak Xinꞌ na,
na mbli sa nzoa naya,1:5 Sal. 2:7.”
nekla nchab Dios lo thi anj:
“Na ak Xud la,
nde lu ak xinꞌ na.*1:5 2 Samuel 7:14 ”
6 Mbay lo mtelꞌ Dios Xinꞌ ner Dios lo izyo, nchab Dios:
“Reta goꞌ anj chanꞌ Dios ptoxub goꞌ lo Xaꞌ.†1:6 Dt 32:43”
7 Nde lo ndej Dios re anj, nchab Dios:
“Dios ndli sa re anj Xaꞌ nak xaja mbi ba,
Nde re anj jwanꞌ ndli sinꞌ lo Dios nak xaja bela.‡1:7 Sal. 104:4”
8 Per lo ndej Dios Xinꞌ Dios, nchab Xaꞌ:
Dios, dib adiꞌ nyebeꞌa,
Nde galꞌ tir nyebeꞌa.
9 Ndyen la re jwanꞌ galꞌ nde ngiꞌnoa jwanꞌ narax,
Jwanꞌ nasa Dios jwanꞌ ta nak Dios la mpchub Xaꞌ aseit yek la,
mas mblo nale Xaꞌ lazoꞌa, ke lo temas xaꞌ.§1:9 Sal. 45:6,7
10 Nde nchabaꞌ Dios lo Xinꞌ Xaꞌ:
Lu Xaꞌ Nyebeꞌ, senꞌ mdobte ner reta jwanꞌ, mdoxkwaꞌa izyo,
nde yub la mdoxkwaꞌ be ba.
11 Reta jwanꞌ ná tluxa, per lu thipka naban la.
Retey, xaja nchaꞌx lara gaxa;
12 xaja nkiꞌs men lara kiꞌsley,
ta xa ntseꞌ men lara ta tseꞌley.
Per lu, nanzyeꞌt la,
nde lu, naꞌluxta la.*1:12 Sal.102:25-27
13 Mbay, ¿cho lo thi anja nchab Dios:
Ptob lad ban na,
axta kebeꞌ yix na re xaꞌ ngiꞌnoa, sa xaꞌ ak jwanꞌ tyob nia?†1:13 Sal. 110:1
14 Tak reta anj nak xbi jwanꞌ benꞌta ndli sinꞌ lo Dios, nde Dios ntelꞌ xaꞌ sa laꞌsto xaꞌ reta men jwanꞌ kayaꞌ yalnaban adiꞌ.