1 Senꞌ tera' gal ni pask, mnela Jesus mzingaxla hor sa ridnda'b Xa' lo izyo re' ndya Xaꞌ lo Xud Xaꞌ. Nde xa mkeꞌ lazoꞌ Xa' re men nak xinꞌ teꞌd Xaꞌ jwan' nzi lo izyo, taxa mkeꞌ lazoꞌ Xa' xaꞌ axta kebe' ngoloy.

2 Lo senꞌ nzi yarsyeꞌ re xaꞌ, kom le' maxu' mtobla lazoꞌ Judas Iscariot, xinꞌ Simón, sa tayaꞌ xa' Jesus. 3 Mnela Jesus leꞌ Xud Xaꞌ mdayaꞌla reta jwanꞌ lo yaꞌ Xaꞌ, tak lo Dios mbroꞌ Xa' nde lo Dios ndya Xaꞌ, 4 zya ngotoli Xa' lo rsye, mkib Xaꞌ lar nzoꞌb xis Xaꞌ nde mxen Xaꞌ ti tway mbo Xaꞌy rlanꞌ Xaꞌ. 5 Zyaga mblo Xaꞌ nit lenꞌ ti xyej, nde mdobte mtach Xaꞌ ni re xinꞌ teꞌd Xaꞌ, nde mkwiꞌz Xaꞌy kon tway jwanꞌ nago rlanꞌ Xaꞌ.

6 Zyasa nde Jesus lo Simón Pedr, nde nchab Pedr lo Xaꞌ:

—Xaꞌ Nyebeꞌ, ¿Lu tach nin?

7 Mkab Jesus nde nchab Xa':

— Jwanꞌ ta ngelin reꞌ, pa yen lay naya, tyen lay tsow'xa.

8 Pedr nchab:

—Pa ta tir na diꞌs tach la nin.

Jesus mkab lo Pedr:

—Tez naꞌtachta na nia, naꞌakta la men na.

9 Leꞌ Pedr nchab lo Xa':

—¡Xa Nyebeꞌ, nanakta benꞌta nin, noga yaꞌn nde yek nay.

10 Jesus nchab:

—Xaꞌ jwanꞌ ngodla, benꞌta ni xaꞌ nakinꞌ yach, tak nambila dib xaꞌ; Nde goꞌ, nambila goꞌ, teꞌnye naꞌnakta re goꞌy.

11 Tak mnela Xa' cho jwan' tayaꞌ , jwanꞌ nasa nchab Xa': “Naꞌnakta re goꞌ nambi”.

12 Senꞌ ngolo mtach Jesus ni re xinꞌ teꞌd Jesus, mxen Xaꞌ lar jwanꞌ nxyobka xis Xaꞌ nde mbere Xaꞌ ro mes tedib gob nde nchab Xaꞌ lo re xinꞌ teꞌd Xaꞌ:

—¿Cho mbyen goꞌ jwanꞌ ta mblin reꞌ? 13 Goꞌ, mbez lon, Maestr nde Xaꞌ Nyebeꞌ, wen ta mbez goꞌ, tak liga nak nay. 14 Na nak Xaꞌ Nyebeꞌ nde Maestr, mtach na ni goꞌ, noga goꞌ ndablo tagaꞌ tach goꞌ ni ta goꞌ. 15 Tak mbloꞌa ney lo goꞌ, jwanꞌ nasa ta xa mblin, taga' bli goꞌ.*13:15 Lc. 22:27. 16 Gal' di's nipa na lo go', ti mosa nanakta xa' mas naro lo xwan' xa', nekla ti xaꞌ ndye mandad naxa'da mas naro lo xa' jwan' mtelꞌ xaꞌ.†13:16 Mt. 10:24; Lc. 6:40; Jn. 15:20. 17 Tez mne goꞌ reta jwanꞌ reꞌ, wen toz tir nda goꞌ tez li goꞌy.

18 ’Naꞌndotejta na re goꞌ, mnela na xanya goꞌ mblin. Per nakinꞌka ak jwanꞌ nchab lo xkiꞌs Dios: “Xaꞌ ta ncha pan kon na, xaꞌ ya tayaꞌ na.”‡13:18 Sal. 41:9. 19 Nal teraꞌ aka tej nay lo goꞌ, sa senꞌ lo ngoka, li lazoꞌ goꞌ, ke Na Nak. 20 Gal' di's nipa na lo goꞌ, men kayaꞌ xaꞌ jwanꞌ tel na, na ngekayaꞌ xaꞌ, nde leꞌ xaꞌ jwanꞌ nkayaꞌ na, ngekayaꞌ xaꞌ Xaꞌ jwanꞌ mtelꞌ na.§13:20 Mt. 10:40; Mr. 9:37; Lc. 9:48; 10:16.

21 Ngolo mni Jesus jwanꞌ re', nabil toz ngo lazoꞌ Xaꞌ, nde galꞌ mdej Xaꞌ, nchab Xaꞌ:

—Gal' di's nipa na lo goꞌ, thib goꞌ ba tayaꞌ na.

22 Zyasa re xinꞌ teꞌd Jesus anta mbwiꞌ lo ta xaꞌ, naꞌnyed xaꞌ cho ndotej Jesus. 23 Leꞌ ti xinꞌ teꞌd Xa', xaꞌ jwanꞌ nkeꞌ toz lazoꞌ Jesus, xaꞌ ya nzobke' cho Jesus. 24 Lo xaꞌ re', mbli Simón Pedr señ sa nyabdiꞌs xaꞌ lo Jesus nyenꞌ cho ta ndej Jesus. 25 Zyasa xa' ya, nzobke' xa' gax cho Jesus, nchab xaꞌ:

—Xaꞌ Nyebeꞌ, ¿choy?

26 Mkab Jesus:

—Lo xa' jwan' tan pan ta gaz na reꞌ, xaꞌ yay.

Nde mbwaz Xa' pan, mdaꞌ Xaꞌy lo Judas Iscariot xinꞌ Simón. 27 Nde ngolo mda Judas ti bro pan, mbla Maxuꞌ xa'. Zyasa nchab Jesus lo xa':

—Jwanꞌ ta lia ba, pkenka bliy.

28 Per nek thib xaꞌ ta nzo'b ro mesa naꞌngyenta xaꞌ kwan liy ta nchab Jesus. 29 Tak pla xaꞌ mbli xgab, tak leꞌ Judas nak xaꞌ ndentsaꞌ tmi, jwan' nasa ta nchab Jesus lo Judas: Yati'a jwanꞌ nakinꞌ na' lo ni o ya taꞌa lud tmi ka re men ndyak yalti. 30 Senꞌ ngolo ta mda Judas pan, zyaga nda xa' nde mblala yal'.

31 Senꞌ lo mbro'te Judas, nchab Jesus:

—Naya ndoroxo'b yalnaro chanꞌ Xinꞌ Mbiꞌ, nde Dios ak naro kon jwan' li Xinꞌ Xaꞌ. 32 Tez Dios ak naro kon jwan' li Xin' Xa', noga Dios li naro Dios Xaꞌ, nde mbyénla li Xaꞌy. 33 Xinꞌ bix na, ben' ndon tud kon goꞌ. Kwanꞌ goꞌ na, per xa nchabka na lo re xaꞌ judí, taga nin lo goꞌ naya: Plo tenꞌ ndan, naꞌlid goꞌ gan tye goꞌ.*13:33 Jn 7:34. 34 Tib yalnyebeꞌ kub tan lo goꞌ: Pkeꞌ lazoꞌ goꞌ ta goꞌ.†13:34 Jn. 15:12, 17:1 Jn. 3:23, 2 Jn. 5. Ta, xa mkeꞌ lazoꞌn goꞌ, tagaꞌ pkeꞌ lazoꞌ goꞌ ta goꞌ. 35 Kon jwan' re' yolo reta men goꞌ ke go' nak xinꞌ teꞌd na, tez keꞌ lazoꞌ goꞌ ta goꞌ.

36 Le' Simón Pedr mnabdi's lo Jesus:

—Xaꞌ Nyebeꞌ, ¿Plo ndaa?

Jesus mkab lo xa':

—Plo tenꞌ ndan, naꞌlit la gan tyea xis na naya, per tonkea xis na yoloxaba.

37 Leꞌ Pedr nchab:

—Xaꞌ Nyebeꞌ, ¿Cho kwan liy sa naꞌnyeda tyonkeꞌn xis la naya? ¡Toyal na axta gaj na por lu!

38 Leꞌ Jesus mkab:

—¿Nyea lin la gaj la por na? Gal' di's nipa na loa, na'golta ngidte', tezka na'kala'sta lu na tson gob.