Diꞌs wen chanꞌ Jesucrist jwanꞌ mkeꞌ Luk
1
Ye's mkeꞌ Luk lo Teoj
1 Naꞌrla xaꞌ mchal naxut mkeꞌ xa' lo ye's, re jwanꞌ lipa ngok nde xata ngokpey xij naꞌ. 2 Ta xata mbwiꞌ xaꞌ xa mdobtey, tata mbloꞌ xaꞌy lonꞌ nde mke xaꞌ sinꞌ mdej xaꞌ xkiꞌs Dios lo men. 3 Jwanꞌ nasa nogaꞌ na jwin mnabdiꞌs na a xata ngokpa reta jwanꞌ reꞌ lo xa mdobtey nde lo ngolo jwin mnabdiꞌs nay, ngwiꞌn wen naka keꞌ ney lo ye's xata ngokpay, sa tel' nay loa Teoj xa' ntak toz, 4 sa jwin yoloa re jwanꞌ li ta mte'd la.
Thi anj ndej gal Juan
5 Senꞌ ngok Herodes rey lo xyon Judea, ngo thi nglweyꞌ ndole Zacarias, xaꞌ nzo lo grup nglweyꞌ Abias. Leꞌ ngol xaꞌ ndole Elisabet nde noga ngol nde lo bin Aaron. 6 Nde rop xaꞌ galꞌ nak lo Dios, nxoꞌbyek xaꞌ xkiꞌs Dios dib nzo lazoꞌ xaꞌ nde re jwanꞌ nyebeꞌ Dios. 7 Per ngenta xinꞌ xaꞌ, tak Elizabeth xa' nij xa' nde ngoxla ropta xaꞌ.
8 Thib wiz senꞌ mdinꞌ re xaꞌ nak grup nglweyꞌ chanꞌ Zacarias li xaꞌ sinꞌ lo Dios len' yodoꞌ. 9 nde mod chanꞌ re nglweyꞌ nak ndlibe' xa' nyenꞌ cho ndinꞌ na, nde mdinꞌ Zacarias yote xaꞌ ten' nayon lenꞌ yodoꞌ chanꞌ Dios sa tolꞌ xaꞌ xtarak lo Dios. 10 nde hor jwan' nchol xtarak, reta men toz tir nzi le, nzi todiꞌsno xaꞌ Dios. 11 Zyasa mbroꞌto thi anj chanꞌ Dios lo Zacarias, ndoli lad ban tenꞌ ndoyol xtarak. 12 Senꞌ mbwiꞌ Zacarias anj, nzoyen xa' nde mzyeb xa'. 13 Le' anj nchab:
—Zacarias, naꞌzyebta la, tak Dios mbinla jwanꞌ mnaꞌb la lo Dios, nde xaꞌ got la Elisabet tyan thi mbed biꞌ nde tob lea or Juan. 14 Nde nale toz yo lazoꞌa nde lyen la nde nale toz yo lazoꞌ bro men senꞌ gal or, 15 tak le' or ak thi xa' ntak toz lo Dios. Nde naꞌgud or nit bin nekla nit xtus, ben' tera gal or Mbi Nayon chanꞌ Dios nyebeꞌla lazoꞌ or. 16 Nde li or sa bro men Israel bere xa' lo Dios xa', Xa' Nyebe' lo xa'. 17 Nde or, yate lo Xaꞌ Nyebeꞌ, kon xbi nde yalne chanꞌ Profet Elías, sa nabeꞌz kwe re xud mdyen' kon mdyen', nde sa teꞌd re men ndli jwanꞌ narax, xoꞌbyek xaꞌ xkiꞌs Dios. Tamod sa tosaꞌ or re men yez Dios, sa kaya' re men Xa' Nyebe'.
18 Zacarias mnabdiꞌs lo anj:
—¿Xamod mnen ke li jwanꞌ reꞌ? Tak na ngoxla na nde xaꞌ got na no xaꞌ ngoxla xaꞌ.
19 Leꞌ anj mkab:
—Na nak Gabriel, nde ndlin sinꞌ lo Dios; Xaꞌ mtelꞌ na sa todiꞌsnon la, tej na diꞌs wen chanꞌ Xaꞌ loa. 20 Per naya, ta nandlid lazoꞌa jwanꞌ nin loa, yanꞌ ngup la, nde naꞌgakta nia axta wiz ak reta jwanꞌ reꞌ.
21 Laja re men nzi le ngembed xa' Zacarias nde ndli xa' xgab kwan liy ndolen' toz Zacarias ten' nayon len' yodo'. 22 Senꞌ mbroꞌte Zacarias tya, naꞌgakta ni xa', zyasa mbyen re men ke ti jwanꞌ mbroꞌto lo xaꞌ ten' nayon lenꞌ yodoꞌ, nde benꞌta señ ndli xaꞌ lo men, tak mbyan' ngup xa'.
23 Senꞌ ngoxob wiz mne rsinꞌ Zacarias len' yodoꞌ, ndya xaꞌ liz xaꞌ. 24 Tudla ndate, Elisabet ngol xa' mkelo xinꞌ na', nde nandroꞌd ngol liz ngol dib gayꞌ mbeꞌ nde mbli ngol xgab: 25 "Wen toz nak Dios lon, mkib Xa' yantho ndyak na, na'wi'naraxtra' men na ta na'yod xin' na."
Thi anj ndej gal Jesus
26 Senꞌ ngoxo'b xop mbeꞌ ndo xa' yistan, Dios mtelꞌ anj Gabriel thi yez ndole Nazaret jwanꞌ nax lo xyon Galilea, 27 tenꞌ nzo thi mzaꞌ yenꞌ ndole Mari, jwanꞌ tera gaxno mbiꞌ, jwan' nak di'sla selyaꞌ kon thi xaꞌ biꞌ ndole Jose, jwanꞌ nde lo bin rey David. 28 Nde ngote anj ten' ndo mzaꞌ, mni anj dyux lo mzaꞌ nchab anj:
—¡Maa Mari, wen toz ngwiꞌ Dios la! Mbli leyꞌ Dios la xij re ngol nde ndono Dios la.
29 Per senꞌ mbin Mari jwanꞌ nchab anj nyaga nzoyen Mari, mbli Mari xgab, kwan ta mbez anj. 30 Zyasa nchab anj lo Mari:
—Naꞌzyebta la Mari, tak wen toz ngwiꞌ Dios la. 31 Nde naya kelo xinꞌ la nde kaa thi mbed biꞌ nde tob lea or Jesus. 32 Nde or ak thi xaꞌ ntak toz, nde ryoꞌ le or Xinꞌ Dios ro, nde Dios Xaꞌ Nyebeꞌ ta' ten' mnebe' rey David nyebe' or, lo bin David tenꞌ nde or. 33 Sa nyebeꞌ or lo reta men Israel thibtane, nde yalnyebeꞌ chanꞌ or naꞌluxtay.
34 Zyasa mnabdiꞌs Mari lo anj:
—¿Xamod ak jwanꞌ reꞌ tak tera tobnon mbiꞌ?
35 Zyasa mkab anj lo Mari:
—Mbi Nayon yeꞌd xis la, nde yalne chanꞌ Dios ro ba lya xis la xaja xkala. Jwanꞌ nasa or gal loa, nayon or, nde Xinꞌ Dios ko'le men or. 36 Mbay na noga Elisabet xa' taa ka thi mbed, tenye ngoxla xaꞌ, nde naya ndola xaꞌ xop mbeꞌ lo yis tan, xaꞌ jwanꞌ mbez men nak xa' nij. 37 Tak par Dios na'ngyenta nekthib jwan' na'akta li Dios.
38 Zyasa nchab Mari:
—Ncheꞌ ndon, lin rsinꞌ Dios na, li Dios kon na xata nea lon.
Ngolo jwan'na, ndya anj.
Mari ngwatna Elisabet
39 Nde lenꞌ wiz ya mken Mari, ngwa Mari thi yez nax lo yiꞌ xyon Judea, 40 senꞌ mzin Mari liz Zacarias, mni Mari dyux lo Elisabet. 41 Lo senꞌ mbin Elisabet dyux mni Mari, mbwin mbed lenꞌ Elisabet, nde mde' Mbi Nayon chanꞌ Dios xa'. 42 Zyasa ne mni xa' nchab xaꞌ:
—¡Mbli leyꞌ Dios la xij re ngol, nde mbli leyꞌ Dios xinꞌ la. 43 ¿Cho nak na sa ndetna xnaꞌ Xaꞌ Nyebe' lon, na? 44 Nde leꞌ mbin na mnia dyux lon, mbwin mbed lenꞌ na, tak leꞌka nale ngo lazoꞌ or. 45 Nabe'z toz ndaa, tak mbli lazoꞌa xkiꞌs Dios, nde ak reta jwanꞌ ne Dios loa.
46 Zyasa nchab Mari:
Dib nzo lazoꞌn nin diꞌs wen lo Dios,
47 nde xbin na nale toz nzo lazo'n lo Dios, Xaꞌ li sa lya'n.
48 Nde mblí Xa' na sa li rsinꞌ Xaꞌ na,
teꞌnye nanakta na xaꞌ ntak nde naya dib tyemp gab reta men nzo lo izyo, Dios mbli ley' xa'.
49 Tak Dios ta ngeno dib yalne, mbli yalnaro toz lon,
nayon nak le Dios.
50 Nde Dios thibla' ndlat lazonꞌ reta men jwanꞌ nzeb lazon' Dios.
51 Naro nak re jwanꞌ ndli Dios kon yalne chanꞌ Dios,
nde mcha's Dios re xa' nchak naro.
52 Mkib Dios yalnyebeꞌ lo re rey nchak naro,
nde mbli naro Dios re xaꞌ nadoꞌ nak.
53 Re xaꞌ ndyak win mdaꞌ Dios bro jwan' lo xaꞌ,
Le' re xaꞌ ngeno bro jwanꞌ, tatanya xa' mse're Dios xaꞌ.
54 Dios mblasto xaꞌ Israel xa' ndli sin' lo Dios,
nde nanchajta yek Dios ndlat lazoꞌ Dios xaꞌ,
55 ta xa thibtane mda' Xa' xki's Xa' lo re xa' gox lon' pola,
lo Abraham nde lo re xa' nde lo bin Abraham.
56 Nde ngo Mari mer son mbeꞌ liz Elisabet, seraꞌ ndya Mari liz Mari.
Ngol Juan jwan' ngole men
57 Senꞌ ngoxob be' gal xinꞌ Elisabet, thi mbed biꞌ ngol lo xaꞌ. 58 Lo mbin reta men nzo gax liz xaꞌ nde re ta xaꞌ plopa yalwen mbli Dios mblat lazoꞌ Dios xaꞌ, ngwatna re men xaꞌ nde nale toz ngo lazoꞌ reta men kon xaꞌ. 59 Nde senꞌ ngoxo'b xon wiz ngol mbed, mbeꞌ xaꞌ or sa tob xaꞌ beꞌ lad or, tenꞌ nadan lad men biꞌba, nde ncholaꞌs xaꞌ kole xaꞌ or Zacarias xa ndole xud or. 60 Per xnaꞌ mbed nchab:
—Naꞌryoꞌled mbed tamod, leꞌ mbed ryoꞌle Juan.
61 Zyasa nchab xaꞌ:
—¿Kwan liy? Ngen cho ta ndole Juan.
62 Zyasa kon señ mnabdiꞌs xaꞌ lo xud mbed, sa tej xaꞌ xamod nchola's xa' ryoꞌle mbed. 63 Le' xud mbed mna'b thi ble tab, nde mkeꞌ xaꞌ lo tab: "Mbed ndole Juan." Nde reta men nzoyen toz xaꞌ. 64 Nde hor yaga taxa ngok mni Zacarias tedib gob, nde mdaꞌ Zacarias dyux lo Dios. 65 Nde reta xaꞌ jwanꞌ nzo gax liz Zacarias jwanꞌ toz nzoyen xaꞌ, nde mbrya's jwanꞌ na reta yez jwanꞌ nzi lo yiꞌ lo xyon Judea. 66 Nde reta xaꞌ jwanꞌ mbin jwanꞌ na mbli xaꞌ xgab:
—¿Cho kwan ak mbed reꞌ senꞌ xyen or?
Tak ndloꞌpa ndo yalwen chanꞌ Dios kon or.
Zacarias mdej re diꞌs nchab Dios lo xaꞌ
67 Zyasa Zacarias xud mbed, mde' Mbi Nayon xa' nde mdej xaꞌ re jwanꞌ ak, nchab xaꞌ:
68 ¡Naro toz nak Dios, chanꞌ re naꞌ, xa' Israel,
tak mbyedtna Xaꞌ naꞌ nde mtolaꞌ Xaꞌ naꞌ, naꞌ jwanꞌ nak men yez Xaꞌ!
69 Mtelꞌ Dios thi or jwanꞌ ngeno bro toz yalne, sa tolaꞌ or naꞌ,
Thi or jwanꞌ nde lo bin rey David xaꞌ jwanꞌ mbli sinꞌ lo Dios,
70 ta xa nchab Dios lo re profet nayon Dios ngo pola.
71 Tolaꞌ Dios naꞌ lo re xaꞌ ndli jwanꞌ narax nde lo re xaꞌ nayi' lon'.
72 Nde tagaꞌ mdaꞌ Xaꞌ xkiꞌs Xaꞌ lyat lazoꞌ Xaꞌ reta xaꞌ gox lonꞌ,
nde li Xaꞌ jwanꞌ nchab Xaꞌ lo re xaꞌ gox lonꞌ.
73 Re jwanꞌ mdaꞌ Dios xkiꞌs Dios li Dios lo Abraham xaꞌ gox lonꞌ:
74 Ke Dios tolanꞌ lo yaꞌ re xaꞌ ndebeyonon',
sa naꞌzyebta naꞌ linꞌ sinꞌ lo Dios.
75 Nayon nde galꞌ ketenꞌ lo Dios reta wiz naban naꞌ.
76 Nde lu xinꞌ lud na, ryoꞌlea profet Dios ro,
tak lu kwiblo lo Xa' Nyebe', sa xalꞌ la ned rid Xaꞌ.
77 Sa tej la lo reta men yez Dios, Dios tonꞌ xken xaꞌ nde tolaꞌ Dios xaꞌ.
78 Tak Dios naꞌ, jwanꞌ toz mblat lazoꞌ Xaꞌ men,
mtelꞌ Xaꞌ thi Xaꞌ nak xaja thi xni wiza lo naꞌ.
79 Sa toxni Xaꞌ lo reta men ngete lo yalꞌ kow,
nde we Xaꞌ men lo ned nzo yalnabeꞌz.
80 Nde or luda ndoxen or, nde taja ndoxen yalnchak chan' or, nde ngo or re izyo nagan axta wiz senꞌ mbro' to or lo men Israel.