15
Jwanꞌ ndli nchak beow men
(Mr. 7:1-23)
1 Zyasa mbike pla xaꞌ fariseo nde kon pla maestr nchak ley mbroꞌ Jerusalen nchab lo Jesús:
2 —¿Kwan liy sa re xin'te'd la nanxobyekta xaꞌ mod gox, jwanꞌ ndli re xaꞌ gox pola? Nanad xaꞌ xa ndabloy, senꞌ ncha xaꞌ. 3 Nde Jesús mkab lo re xaꞌ ya:
—¿Mbay kwan ndliy noga goꞌ naꞌnxobyekta ley chanꞌ Dios, lo ndli goꞌ re mod gox jwanꞌ ndono goꞌ? 4 Tak Dios mnabeꞌ: "Bxobyek xud la nde xnaꞌa, nde xanya men jwanꞌ nixinꞌ xis xud naꞌ o xis xnaꞌn, xaꞌ ya gaj." 5 Per goꞌ mbez, tez xanya men gab lo xud naꞌ o lo xnanꞌ: "Nalid na gan laston la, tak reta jwanꞌ ngenon mdayalanay lo Dios." 6 Nde xaꞌ ta gaba, nandabloda laꞌsto xaꞌ xud xaꞌ o xnaꞌ xaꞌ. Tamod ngotal goꞌ yalnyebeꞌ chanꞌ Dios, sa li goꞌ mod gox ta ndono goꞌ. 7 ¡Goꞌ ba sa li nak men bxalꞌ nde men kwinꞌ! Galꞌka mni profet Isaías lo mdej goꞌ, nchab xaꞌ:
8 Re yez reꞌ, benꞌta ro xaꞌ mbez xaꞌ nxobyek xaꞌ na,
per lazoꞌ xaꞌ tij ndoy lon.
9 Ngen cho sinꞌ li diꞌs wen ni go lon, tak re jwanꞌ ndloꞌ xaꞌ,
benꞌta yalnyebe chanꞌ mena.
10 Zyasa mbrez Jesús re men toz nde nchab Xaꞌ:
—Bin goꞌ nde byen goꞌ jwanꞌ reꞌ: 11 Nanakta re jwanꞌ ncha men ndli nchak bew men, cheꞌla re diꞌs jwan ndryoꞌ ro men jwanꞌ na ndli nchak bew men.
12 Zyasa re xin'te'd Jesús mbike xaꞌ lo Jesús nde nchab xaꞌ:
—¿Cho mnea ke re xaꞌ fariseo ngwad xaꞌ diꞌs senꞌ mbin xaꞌ jwanꞌ mnia yaꞌ?
13 Leꞌ Jesús mkab nchab:
—Reta ya jwanꞌ namblobinta Xud na ndob lo beꞌ, ndablo yiꞌb dib loxa. 14 Blaꞌ goꞌ xaꞌ, tak xaja xaꞌ nkow lon' xaꞌ nde ngoꞌb kow xaꞌ ned lo tedib ned xaꞌ nkow lon'. Nde tez ti nkow lon' koꞌb xa' ned lo tedib xa' nkow lon', rop xaꞌ gab lenꞌ yeꞌr.
15 Zyasa Pedr nchab lo Jesús:
—Mbloxkan diꞌs nagan reꞌ lo náꞌ. 16 Nde Jesús mkab:
—¿Cho noga goꞌ naꞌyenta diꞌs ya?
17 ¿Cho naꞌnchenta goꞌ, reta jwanꞌ ncha men, nday lenꞌ men, nde tya nryoꞌtey lo nda men wan? 18 Per re jwanꞌ ndryoꞌ ro men, lenꞌ lazoꞌ men ndryoꞌy nde jwanꞌ na ndli sa nchalal men, men beow. 19 Tak lenꞌ lazoꞌ men ndryoꞌ re xgab narax, re yalguj men, re xaꞌ jwanꞌ ngetano xaꞌ jwanꞌ nanakta salꞌ xaꞌ, re xaꞌ ndli re ned jwanꞌ xkap senꞌ nchaxno xaꞌ ta xaꞌ*15:19 re xaꞌ ndobno tan nde rera ya xaꞌ lo civil, o re xaꞌ tib nchakno xaxaꞌla men. Re xaꞌ ndli re ned jwanꞌ xkap senꞌ ncaxnox men, re yalwanꞌ, re yalkeꞌjwals nde re yalnixin. 20 Reta jwanꞌ reꞌ nchak beow men, per ta nanad men xa ndabloy lo wa men nandlibeowte men.
Ti ngol yez Canaan liga ndli lazonꞌ Jesús
(Mr. 7:24-30)
21 Nde tya mbroꞌ Jesús nda Xaꞌ lo xyon Tiro nde lo xyon Sidón. 22 Nde tya mbroꞌ ti ngol jwanꞌ nde lo xyon Canaan mbesyaj nde lo Jesús nchab:
—¡Señor, Xaꞌ nde lo bin David, blat lazoꞌa na! Xinꞌ got na jwanꞌ toz nalat ndyak, tak jwanꞌ toz ngetati ti mbi narax or.
23 Per Jesús naꞌnkapta lo ngol. Zyasa re xin'te'd Jesús mbike gax nde mnab xaꞌ lo Jesús nchab xaꞌ:
—Bloned xaꞌ ya xaꞌ, taja mbesyaj xaꞌ nde xaꞌ xis naꞌ. 24 Zyasa mkab Jesús:
—Dios mtelꞌ na benta lo re xaꞌ Israel jwanꞌ ngetetab xaja mbakxilꞌla. 25 Per leꞌ ngol mbike gax lo Jesús nde mdoxub ngol nchab ngol:
—¡Blaston Señor! 26 Leꞌ Jesús nchab:
Nawenta naka kib men jwanꞌ ncha mdyenꞌ nde taꞌ mena lo re mbak.
27 Nde ngol nchab:
—Taga naka, Señor, per axta re mbak ncha re kos nchab ro mes xwanꞌ maꞌ.
28 Zyasa leꞌ Jesús nchab lo ngol:
—¡Ngot, lu sa liga ndli toz lazoꞌa! Re jwanꞌ ncholaꞌs la aka xa ncholaꞌs la.
Nde hor yaga mdyanꞌ mzaꞌ xinꞌ ngol.
Jesús ntodanꞌ bro toz men yis
29 Jesús mbroꞌ tya nde nda Xaꞌ nde mzi xaꞌ ro nittoꞌ Galilea, nde mdoke Xaꞌ axta yek yiꞌ nde mdob Xaꞌ tya. 30 Nde men toz tolo mzin lo Xaꞌ, nde ndeno men re xaꞌ ngob nin†15:30 bde xaꞌ biꞌx, re xaꞌ syeg, re xaꞌ ngup, re xaꞌ nayiz yanꞌ, nde re men jwanꞌ xaxaꞌ yis ndyak. Mblek xaꞌ re xaꞌ ya lo Jesús nde Jesús mtodanꞌ re xaꞌ. 31 Nde nzoyen re men, senꞌ mbwiꞌ xaꞌ re xaꞌ ngup ndodiꞌs, re xaꞌ nayiz yanꞌ mdyanꞌ, re xaꞌ renk ndye, nde re xaꞌ nglwe ngwiꞌ. Zyasa ndobte xaꞌ mbli naro xaꞌ Dios chanꞌ xaꞌ Israel.
Jesús mdaꞌ jwanꞌ mda thap mil mbiꞌ
(Mr. 8:1-10)
32 Zyasa Jesús mbrez re xin'te'd naꞌ, nde nchab Jesús lo xaꞌ:
—Ndlat lazoꞌn re men, tak ndala son wiz ta nzi xaꞌ lon reꞌ, nde nangenod xaꞌ jwanꞌ wa xaꞌ. Nancholasta na goned na re xaꞌ tata win xaꞌ, ndaga nax keꞌ mbiy yek xaꞌ ned.
33 Nde re xin'te'd Jesús nchab:
—Per ¿plo ya xiꞌ náꞌ jwanꞌ wa reta men toz reꞌ nde nagan cheꞌ?
34 Leꞌ Jesús mnab diꞌs:
—¿Pla pan ngeno goꞌ?
Leꞌ re xaꞌ mkab:
—Gas pan nde chopson mbel bix.
35 Zyasa Jesús mnibeꞌ mdob reta men izyo, 36 nde mxen Jesús re gas pan nde re mbel nde mdaꞌ Xaꞌ dyux lo Dios. Xisa mblirol Xaꞌ pan kon mbel nde mdaꞌ Xaꞌy lo re xin'te'd Xaꞌ, nde re xin'te'd Xaꞌ mdiꞌda lo reta men. 37 Nde mda re men axta kebeꞌ mze lenꞌ xaꞌ. Nde tata mthop xaꞌ gas chokwid re jwanꞌ mbroꞌxob. 38 Lo reta xaꞌ jwanꞌ mda nak, thap mil xaꞌ biꞌ, nde namblabta xaꞌ re ngol nde reta or bix. 39 Ngolo mni Jesus lo re men, leꞌ Jesús ndya, ngwap Jesús lo bark nda xaꞌ lo xyon xaꞌ Magdala.