1 Mbrid xop wiz, xaꞌta mbeꞌ Jesús Pedr, Jakobo kon Juan wes Jakobo, nda xaꞌ thi yek yiꞌ ro; 2 nde tya mzyeꞌ nya Jesús lo re xaꞌ. Lo Jesús anta ndlyabel nya xaja wisa, xab Xaꞌ ngok nakis anta ndlyabel nya. 3 Nde ta nzi wiꞌ xaꞌ xaj mbroꞌto Moisés kon Elías, ndotadiꞌsno xaꞌ Jesús. 4 Zyasa Pedr nchab lo Jesús:

—Señor, ¡lejka nzi náꞌ ncheꞌ ya! Tez cholaꞌs la toxkwaꞌ náꞌ son ramad: tiba kaa, tiba ka Moisés nde tediba ka Elías.

5 Laja benꞌ ndotodiꞌs Pedr, ti xkow anta ndlyabel nya*17:5 Benꞌ ndotodiꞌs Pedr, ti xkow xni mtowꞌ yek xaꞌ, nde xij xkowa mbyen ti bi jwanꞌ nchab: mkota re xaꞌ nde xij xkowa mbyen ti bi nchab:

—Xaꞌ re nak Xinꞌ na jwanꞌ nkeꞌ toz lazoꞌn, nde nale toz nzo lazoꞌn ngwiꞌn Xaꞌ. Bin goꞌ diꞌs ro Xaꞌ.

6 Lo mbin xin'te'd Jesús jwanꞌ na, mdoxub xaꞌ axta mdinꞌ lo xaꞌ izyo nde mzyeb toz xaꞌ 7 Zyasa Jesús mbike lo xaꞌ nde mbwal Jesús xaꞌ nde nchab Jesús lo xaꞌ:

—Ptoli goꞌ, naꞌzyebta goꞌ. 8 Nde senꞌ mblit xaꞌ lo xaꞌ, ngen cho nak benꞌta tib Jesús ndo.

9 Lo senꞌ ndela re xaꞌ mbroꞌ xaꞌ yiꞌ ya, Jesús mnibeꞌ lo re xaꞌ, nchab Jesús:

—Naꞌngecho lo tej goꞌ jwanꞌ ta mbwiꞌ goꞌ, axta kebeꞌ ryoxban Xinꞌ Mbiꞌ xij re xaꞌ nguj.

10 Zyasa re xin'te'd Jesús mnabdiꞌs xaꞌ lo Jesús:

—¿Kwan li sa, mbez re maestr nchak ley, ndablo Elías ner yeꞌd?

11 Jesús mkab:

—Ligay, Elías ner yeꞌd, nde xaꞌ naxut tanꞌ re jwanꞌ. 12 Per na nin lo goꞌ, Elías ya mbyed la nde re xaꞌ naꞌndlid lazoꞌ xaꞌ Elías, cheꞌla mblino xaꞌ xaꞌ xa nchalas xaꞌ, nde taga' Xinꞌ Mbiꞌ ndoja li no Xaꞌ xaꞌ.

13 Zyara sa mbyen re xin'te'd Jesús, leꞌ Xaꞌ ndotej Juan Bautist.

14 Senꞌ mzin xaꞌ tenꞌ nzi re men, mbike ti xaꞌ biꞌ gax lo Jesús, nde mdoxub xaꞌ nchab xaꞌ:

15 —Señor, blat lazoꞌa xinꞌ na, tak leꞌr nkeꞌ mbiy chonꞌ, nde senꞌ nkeꞌ mbiy chor ne toz tir ndyak or, tak nar toz gob nchab or lo ki nde nar toz gob nchab or lo nit. 16 Mben or lo xin'te'd la per nandlid xaꞌ gan ntodanꞌ xaꞌ or.

17 Jesús mkab:

—¡Men naꞌndlid lazonꞌ Dios nde men xkap! ¿Axta polpa tonoraꞌ na goꞌ? ¿Axta polpa xek na goꞌ? Deꞌno goꞌ or ncheꞌ ya.

18 Zyasa Jesús mbrezno xaꞌ mbiꞌ narax†17:18 mxeꞌ, sa mbrotey lazoꞌ mbyo, nde hor yaga mdyanꞌ mbyo.

19 Xisa re xin'te'd Jesús xaꞌta ndodiꞌsno xaꞌ Jesús nde mnabdiꞌs xaꞌ:

—¿Kwan liy sa naꞌndlit náꞌ gan ngote náꞌ mbi naraxa?

20 Leꞌ Jesús nchab lo xaꞌ:

—Tak lud toz ndli lazoꞌ goꞌ Dios. Lipa nin lo goꞌ, tez liga ndli lazoꞌ goꞌ Dios masa lud xapa ti mbis mostaza, gab goꞌ lo ti yiꞌba bike gwa tiblad, nde yiꞌ ya bikey nday tiblad. Nde nek tib jwanꞌ nagan ngenta par goꞌ. 21 Per par ryoꞌte mbi narax reꞌ, ndablo nya'b men na lo Dios nde li men yalse sa ryoꞌ tey.

22 Laja naxte re xaꞌ lo xyon xaꞌ Galilea, Jesús nchab: Leꞌ Xinꞌ Mbiꞌ tayaꞌ xaꞌ lo yaꞌ re men, 23 nde kuj men Xaꞌ, nde lenꞌ mbyon wiz ryoxban Xaꞌ. Senꞌ lo mbin re xin'te'd Jesús jwanꞌ na, nabil toz ngo lazoꞌ re xaꞌ.

24 Senꞌ mzin Jesús kon re xin'te'd Xaꞌ yez Capernaum, zyasa ngwa xaꞌ jwanꞌ nyaꞌb tmi chanꞌ yodoꞌ lo Pedr nde nchab xaꞌ:

—¿Cho nangixta Xaꞌ nak maestr la tmi chanꞌ yodoꞌ?

25 Leꞌ Pedr mkab:

—Ngix Xaꞌy.

Nde senꞌ ngote Pedr lenꞌ yo, ner Jesús mni nchab:

—¿Xa ngwiꞌa Simón? ¿Cho lo nyab re xaꞌ jwanꞌ nak sinꞌ lo izyo re tmi low, cho lo ta las xaꞌy o lo re xaꞌ tiblada?

26 Pedr mkab:

—Lo re xaꞌ tiblada.

Jesús nchab:

—Nde re tablas xaꞌ nanakinꞌta kix xaꞌ. 27 Per sa nanid xaꞌ xis naꞌ, wa god mbel ro nit, nde blobi yis bow lo nit nde mbel ner jwanꞌ yoga, mxen maꞌ nde senꞌ xalꞌ la ro maꞌ tya zyal ti tmi, mxen tmi ya kix la chanꞌ na nde chanꞌ la.