1 Tedib gob mdobte Jesús mtoteꞌd Xaꞌ re men ro nittoꞌ nde bro toz men mdyop lo Xaꞌ, yaja ngwap Jesús lo ti bark jwanꞌ nzo'b lo nit nde tya mdob Xaꞌ, leꞌ reta men nzi ro yux. 2 Nde kon di's nabix mblo' Xa' lo re men na'r toz jwan', nde mblo' Xa' lo men jwan' xa naka yalte'd chan' Xaꞌ:

3 —Pto nza go': Ngo ti mbi mbroꞌ ndalo bin mbis. 4 Nde senꞌ ndogo xaꞌ bin, nzo mbis ngob ro ned, zyasa mbyeꞌd mbyin nde mda mbyina. 5 Tipla mbis ngob xij ke tenꞌ ngenta bro yo jwanꞌ nasa naban toz mblyena, 6 per senꞌ lo mbla toz be, mbolꞌ la tak nangenta loxa nde mbiza. 7 Tipla mbis ngob xij yis; nde mas mxyen yis, mtowꞌ yis yek neꞌy nde tamod sa nandopta lo neꞌy. 8 Leꞌ tipla mbis jwanꞌ ngob lo yobeꞌb, mblyena, mxyen na nde nawe mdob lo neꞌy, choy mdaꞌ galbsiꞌ mbis axta songal mbis nde nzoy mdaꞌ axta tib ayoꞌ mbis kad tiba.

9 Zyasa nchab Jesús lo xaꞌ:

—¡Goꞌ jwanꞌ ndob nzanꞌ par gona, bin goꞌy!

10 Senꞌ mbyanꞌ thipta Jesús, re xaꞌ jwanꞌ ngete nke xis Jesús nde kon re tib sen xinꞌ teꞌd Jesús, mnabdiꞌs xaꞌ lo Jesús nyenꞌ xamod nak di's nabix jwanꞌ ta mdej Xaꞌ. 11 Nde nchab Jesus lo xa':

—Lo goꞌ ngoxkan Dios re diꞌs naga's jwanꞌ nak yalnyebeꞌ chanꞌ Dios; le' lo re men jwanꞌ ngete xisa, nab di's nabix tej men re jwanꞌ lo xaꞌ. 12 Sa te'nye ngwiꞌ xaꞌ per nawiꞌd xaꞌy, tenye nchon xaꞌ per na'yenta xaꞌy; sa na'syed xgab xaꞌ lo Dios nde natonꞌta Dios xken xaꞌ.

13 Nde nchab Jesús lo xaꞌ:

—¿Cho naꞌyenta goꞌ di's nabix reꞌ? ¿Xomodka yen goꞌ masra' re di's nabix sa? 14 Xaꞌ jwanꞌ ngobin mbis, xa' ya nak xaꞌ ngobin xkiꞌs Dios. 15 Nde re men jwan' nak xaja mbis nzo bin ro ned: nzobin xki's Dios lazo' xa', per sen' mne mbin xa'y, zyaga nde Maxuꞌ, nde nkib Maxuꞌ xkiꞌs Dios jwan' nzobin lazoꞌ xaꞌ. 16 Taga' re men jwan' nak xaja mbis nzobin xij ke: re xa' re' sen' nchon xaꞌ xkiꞌs Dios, zyaga nale toz ncho lazoꞌ xaꞌ nkayaꞌ xa'y, 17 per na'ngenta lox xkiꞌs Dios lazoꞌ xaꞌ, nak xaꞌ men plata wiz, tak senꞌ nde yalti lo xaꞌ o nchubla men xaꞌ xke chanꞌ xkiꞌs Dios, zyaga ndlaꞌ xaꞌ xkiꞌs Dios. 18 Re xa' re' nak xaja mbis jwan ngobin xij yis. Men ya, nchon xaꞌ xkiꞌs Dios, 19 per ndyen toz xa' re jwanꞌ lo izyo nde ntokil'la xa' ak rik xa' nde ndyablaꞌs xaꞌ masra' jwanꞌ, reta jwanꞌ reꞌ ndyay lazoꞌ xaꞌ nde ntolu'xa xkiꞌs Dios. 20 Le' re men jwan' nak xaja mbis ngobin lo yo beꞌb: re xa' re' nchon xaꞌ xkiꞌs Dios nde ndli lazo' xaꞌy, nak xaꞌ xaja mbis bin jwanꞌ nawe ndob lonꞌ nde bro toz jwanꞌ ndaꞌy, choy ndaꞌ galbsiꞌ mbis, axta songal mbis nde axta por ayoꞌ mbis ndaꞌ kad thiba.

21 Noga nchab Jesús:

—¿Cho ndeno men xni sa towꞌ xaꞌ yek na'y kon ti xi beꞌ o ko xaꞌy xanꞌ lonꞌ? ¿Cho nanakta tob xaꞌy gap sa taꞌy xni? 22 Tak ngenta jwanꞌ nzo naga's na'ryoxo'bta, nek jwanꞌ nzo kaꞌslo, na'ryoxo'bta lo xni. 23 ¡Tez nzo goꞌ ndob nzanꞌ par gon goꞌy, bin goꞌy!

24 Nde noga nchab Jesús:

—Jwin bwi' go' jwan' mbin go'; tak xa nchix goꞌ nka men, taga' chi'x xa' ka goꞌ nde masra'y kayaꞌ goꞌ jwan' xa mbin go'. 25 Tak men ngenolay, kayaꞌ xa' masra'y; Nde men nangenoday, axta jwanꞌ lud ngeno xaꞌ yi'ba lo xaꞌ.

26 Noga nchab Jesús:

—Che' nak yalnyebeꞌ chanꞌ Dios, xa nak ti mbi' jwan' ngwalo bin mbis xis izyo, 27 nchat xaꞌ nde nchoche xa', yal' nde ndlyabe, leꞌ mbis nchas, nde ndoxena ana'nye xaꞌ xa ndoyaka. 28 Tak le'ga izyo ndli sa ndlyena, nerla ndryo'xoba nde nxyena, senꞌ lo mne mxyena zya ndryoꞌ do lo neꞌy, nde lo do sey ndryo'xob mbis. 29 Nde senꞌ ngol mbis, zyaga nthop xaꞌy, tak ngoxo'b be'y.

30 Noga nchab Jesús:

—¿Cho jwanꞌ thita nya kon yalnyebeꞌ chanꞌ Dios, o cho ti di's nabix thita lilal na'y? 31 Naka xa nak mbis mostaz, tak sen' li bin mena xis izyo, naka mbis mas bix lo reta mbis nzo xis izyo. 32 Per senꞌ ngo bin lay, nxyena, nde mas naroy lo reta ya bin nde nol' toz xoda, jwan' nasa re mbyin ntoyal ncho ma' xan' xkal na'y.

33 Na'r toz re di's nabix reꞌ ndloꞌ Jesús xkiꞌs Dios lo men, axaja nchen mena. 34 Nde napta di's nabix mdodiꞌs Jesús lo re men; benꞌ lo re xinꞌ teꞌd Xaꞌ ngoxkan Xaꞌ retay.

35 Le'ga wiz ya, senꞌ ndolala yalꞌ, Jesús nchab lo re xinꞌ teꞌd Xaꞌ:

—Ndanꞌ tedib lad ro nittoꞌ.

36 Nde mcha's xaꞌ reta men nzi tya, yaja mxen xa' bark, le' Jesús nzola lo bark nde xisa mdonke tipla bark jwanꞌ nzi tya. 37 Per mxyo'b mbi toz lo nit, nde axta lenꞌ bark nchoche bde, ndosey nzo nit. 38 Leꞌ Jesús naxyat xanꞌ bark, xis ti almwad; nde mbloꞌxkalꞌ xaꞌ Jesús, nchab xaꞌ:

—Maestr, ¿Cho na'ndlid la xgab ta ndolan' lenꞌ nit?

39 Nde ngoche Jesús, mbrez Xaꞌ lo mbi nde nchab Xaꞌ lo bde:

—¡Te'zta go'! ¡Xe bre goꞌ!

Nde gotab mbi nde retay xe mbrey.

40 Nde nchab Jesús lo xaꞌ:

—¿Cho kwan liy mzyeb toz goꞌ? ¿Cho na'ndlid lazoꞌ goꞌ Dios?

41 Zyasa mzeb toz lazo' xaꞌ, nde nchab xaꞌ lo ta xaꞌ:

—¿Cho Xaꞌ reꞌ, sa axta mbi nde nittoꞌ nxo'byeka Xaꞌ?