1 Ptelaꞌs lo re men jwanꞌ ndli lazonꞌ Dios, sa xobyek xa' re xaꞌ nyebeꞌ lo izyo reꞌ nde re xaꞌ nak sinꞌ lo yez,*3:1 Ro 13.1-7; 1 Ti 2.1-4; 1 P 2.13-17. gon men diꞌs nde thibla tyosaꞌ men li men yalwen. 2 Naꞌninaraxta xaꞌ xis nek tib men, nakwaꞌnta xaꞌ yalbyo, cheꞌla nabeꞌz li xaꞌ nde nadoꞌ ak xaꞌ lo reta men.

3 Tak pola noga naꞌ ngok na' men ne yek naꞌ; men nanchonta diꞌs, mkete taꞌb naꞌ, mblayon' lo re jwanꞌ narax ndyablaꞌs belꞌ naꞌ nde re jwanꞌ narax mbroꞌ lazonꞌ, mban naꞌ lo re jwanꞌ narax nde narax nda lazonꞌ mbwinꞌ re jwanꞌ ngeno ta men naꞌ, mbyiꞌno men naꞌ nde tagaꞌ mbyiꞌnonꞌ xaꞌ. 4 Per senꞌ mbroꞌto yalwen chanꞌ Dios Xaꞌ ntolanꞌ, nde yalkeꞌ lazoꞌ chanꞌ Xaꞌ lo reta men, 5 mtolaꞌ Xaꞌ naꞌ, nde nanaktey por re yalwen mblinꞌ, cheꞌla mbli Xaꞌy tak mblat lazoꞌ Xaꞌ naꞌ, mtombi Xa' na' sa mbli Xaꞌ ngol nakub naꞌ nde mdaꞌ Xaꞌ ti yalnaban kub lonꞌ por Mbi Nayon. 6 Mbi Nayon jwanꞌ namkalaꞌsta Xa' mdaꞌ Xa' lon' por Jesucrist, Xaꞌ ntolaꞌ men, 7 sa ngolo mblilal Xaꞌ naꞌ men gal' por yalwen chan' Xa', kaya' na' jwanꞌ ndinꞌ naꞌ, jwanꞌ nak yalnaban adiꞌ jwanꞌ ngembed naꞌ.

8 Diꞌs gal'pa jwanꞌ reꞌ, nde jwan' re' ncholas na thiblaꞌ tej lay, sa reta men jwanꞌ ndli lazonꞌ Dios chal xa' li xa' nab yalwen. Reta jwanꞌ reꞌ wen toz naka nde sinꞌ toz ndliy lo re men. 9 Naꞌlyad la lo re diꞌs bxey ngencho sinꞌ ndli, lo re bin chanꞌ re men gox tenꞌ nde xaꞌ, plo nziyo xaꞌ nde plo kap mbesno xaꞌ ta xaꞌ xa ryoxkan ley chanꞌ Moisés. Tak reta kwent ya nandaktey nde ngencho sinꞌ ndliy.

10 Men ndli nchak rol men lenꞌ yodoꞌ, brez yek xaꞌ nde tez ndala chop son gob ndobez la yek xaꞌ nde naꞌgonta xaꞌ diꞌs, bloꞌte xaꞌ, 11 tak mnea la re men ta ndliya mdya'bla xaꞌ, nde leꞌga re jwanꞌ narax ndli xaꞌ naka yalke lo xaꞌ.

12 Senꞌ tel na Artemas o Tíquico loa, ken la yeꞌd twiꞌa na yez Nicópolis, tak tya mblila na xgab yanꞌ na, beꞌ jwanꞌ xyob yop. 13 Blaꞌsto Zenas xaꞌ ngoxkan ley nde noga blaꞌsto Apolos axta ploja nya lia gan sa keno xaꞌ re jwanꞌ nakinꞌ xaꞌ ned nda xaꞌ. 14 Nde re wes yodoꞌ teꞌd xaꞌ li xaꞌ jwanꞌ wen nde taga lasꞌto xaꞌ men senꞌ kwan ndache men, sa tamod loꞌ liga ndoxobyek xaꞌ Dios.

15 Reta xaꞌ nzinon ncheꞌ ntelꞌ xaꞌ dyux loa. Pta' dyux naꞌ lo re xaꞌ ndli lazonꞌ Dios jwanꞌ nke lazonꞌ náꞌ. Dios li leyꞌ reta goꞌ kon yalwen chanꞌ Xaꞌ. Ta aka.