Kitsy nii kwë lo meñ Israel
1
Lëë Dios pxaal xiñ biidnee lo meñ
1 Tiemp, ndaly vuelt ni ndaly mod kwnee Dios lo pxusykoltoo no worñee pxaal xaa profet. 2 Lëë natiemp lëë Dios pxaal xiñ sëëdnee lo no. Por lëë xaa psaa Dios kislyu ni lëë gaa xaa byaani kchë nii psaa Dios. 3 Lëë xaa nak xkyalntson Dios ni sinakpee Dios nak xaa. Con xtiits sye xaa xñabey xaa kchë nii no lo kislyu. Loxsye ptsily xaa xtol no lëë xaa kwsob kwi Dios nëzli.
Mastre non Xiñ Dios lo angly
4 Mastre non Xiñ Dios lo angly, por mastre nroob kyalwnabey nii kwaa xaa que nii kwaa angly. 5 Por ni tu lo angly karty këb Dios:
Xiñaa nakoo,
naa bnetsy kyalmbañ lool natse.
Ni karty kaa këb Dios lo angly nii lëë Dios kak pxosy angly, ni karty këb xaa nii lëë angly kak xiñ xaa.
6 Per tsiñee lëë Dios pxaal xiñ lo kislyu, chëb xaa:
No nii kchësy xangly Dios ksoxib lo xiñ xaa.
7 Lëë tsiñee xseety xaa angly, xñee xaa:
Nak xangly Dios sinak me, ni nak xaa nii xkyë tsiiñ lo xaa sinak bëly.
8 Per tsiñee lëë xiñ xaa chakyety, xñee xaa:
Iip kyaldy xkyalwnabeyoo, Dios,
tu xaa nii chuñ kyalxtisy nakoo.
9 Pkëstyool kyalbuen ni pixladzyoo kyalmal.
Por ngo nii lëë Dios kwle lii ni mastre nroob kyalwle nii bneetsy Dios lool que nii pteedy xaa lo xcombañeeroo.
10 Ni lëë gak Dios xñee:
Lii psaa kislyu ni lii psaa kpaa destye klo.
11 Stedy kchë cos,
per lii tejtyoo.
Kchësy cos kozh si chozh ladx,
12 aan lëëw kxeechoo si xyeech ladx, ni lëëw ktsëël si xtsyëë ladx.
Per lëë lii ktsyëëdyoo ni iip kejtyoo.
13 Ni tu lo angly karty këb Dios:
Kwsob kwin nëzli,
axte nii tsitsiñ tse nii kñabeyoo lo kchë meñ nii xlëë lool.
14 Kyalbini nii xkyë tsiiñ lo Dios nak angly. Lëë Dios xaal angly par kuñ xaa yudar meñ nii telaa lo tol.