19
1 Loxsye ngo lëën biñ nii nguiedzy xñee meñ leñ kpaa. Nyoo nii ndaly meñ, xñee meñ:
¡Skizh Tat Tios!
Lëë xDios no xteelaa ni lëë xaa xñabey ni lëë xaa jkaa skizh,
2 por chuñ xaa kyalxtisy sinak nii no kako.
Nli nii kyalxtisy chuuñtsyey xaa,
por lëë xaa psaksi kyedzy yox nii tir beeñ tol, porñee ndaly meñ nii nche lo kislyu pkaay xtolo.
Singo mod lëë Dios bnab cuent low por xkyalkuty kchë xaa nii bniladzy xtiits xaa.
3 Lëë meñ go kwnee stub chëb:
—¡Skizh Tat Tios! Iip kyaldy tsëp kox nii tsek kyedzy ko kpaa.
4 Leñ yulyey sob Tat Tios tsiñee lëë ksa kalyptap xaa kol ni lëë ksa tap ma nii tyub lady sob mëlo kujkiitsy kë axte lyu ni ptee skizh xñee:
—¡Nliw! ¡Skizh Tat Tios!
5 Tsigo lëë lëë tu xaa kwnee leñ yulyey chëb:
Kol ktee skizh lo xDios no kchësy to,
nikxe xaa wiñ do, nikxe gaa xaa kol do,
kchësy to siñee xsoob to xtiits xaa ni xsal do xaa.
Xkyalwtsiilña Mëkwxiily
6 Biñaa gaa tsiy tubtsoon meñ. Nako sinak xbi nis nii xchingaa tu chu kyo ni nako sinak xbi nkwsiy aan xñee meñ:
¡Skizh Tat Tios! Por lëë xaa bislo xkyalwnabey xaa.
Lëë xDios no nak xaa nii mastre xñabey.
7 Kol tsoo kle no,
ni kol tsoo ko nguiool no styoo no parñee ktee no skizh lo xaa.
Por lëë wor kutsiñ nii lëë Mëkwxiily ktsiilña.
Lëë tsiil xaa tse so mbës.
8 Lëë Dios ptee tiits nii kakw me ladx nyë ni xpibëly,
por ladx ko chakw meñ nii mbañ sinak xñabey Dios.
9 Lëë angly në lon:
—Pkëë: “Dichos meñ nii koktsyetsy tsi lo xkyalwtsiilña Mëkwxiily.”
Aan lëë gak xaa në lon:
—Nli nii xtiits Dios nrii.
10 Lëën psoxib lo angly ko, per lëë xaa në lon:
—Ksoxibtyoo lon, por xtiitsak Dios xsobaa sinakak nii xsooblo, ni nakaa sinak kchë betsyoo nii xsoob xtiits Jesús. Psoxib lo Dios.
Lëë tiits nii biidni Jesús xsaabini kchë meñ nii xluuy xtiits Dios.
Xaa nii sob lady cabay rusy
11 Lëë kpaa byaly, aan lëën kon tu cabay rusy. Xaa nii chon tiits ni xñee tiitsli lë xaa nii sob lady ma. Singo lë xaa porñee ngui chuñ xaa kyalxtisy ni chuñ xaa tily sinak nii no kako. 12 Xpibëly mëlo xaa sinak xpibëly bëly ni sob ndaly coron kik xaa ni kë blalan tiits chex xaa aan xaktyee lëë xaa nan pe xñeew. 13 Nakw xaa tu ladx nii xña cheñ aan lë xaa xtiits Dios. 14 Kchë soldad nii no leñ kpaa nal xitsy xaa. Ladx nguitsy ni nyë nakw xaa nii nonsyke lady cabay rusy sob xaa. 15 Sob tu spad ndox chuw xaa, parñee kiswee xaa meñ nii nche lo kislyu, ni lëë xaa kñabey sinak xñabey tu xaa ntseeb. Lëë xaa kuñ kyalxtisy sinak tu xaa nii xkitsy xkyee uv con niy, ni lëë xaa ktee meñ castigw nii kxaal Dios nii xñabey por tir xlëë Dios. 16 Ni kë lo kodx xaa nii lëë xaa nak rey nii mastre non ni lëë xaa mastre xñabey.
17 Loxsye ngo lëën kon nii lëë tu angly so lo ngbidz, xkwetsy xaa kchë mguiñ nii xoobe leñ kpaa xñee xaa:
—Kol të ni kol ktyop tsiin kiid to lo xixtsee Dios, 18 parñee kaw do xpëël rey, ni xpëël kchë xaa nii xñabey lo soldad ni xpëël kchë xaa ndaan, ni xpëël cabay ni xpëël xaa nii xsyob lady ma, ni xpëël kchë meñ nii no xpixwan ni xpëël meñ nii kindy xpixwan. Kol të kaw do xpëël xaa wiñ ni xpëël xaa kol.
19 Lëë ma tox ni lëë kchë xaa nii xñabey lo kislyu pkaal lsa ksa xsoldad parñee ktily xaa ksa xaa xaa nii sob lady cabay ni xsoldad xaa go. 20 Lëë ma tox ni lëë ma wnee xuuy nii beeñ kyalntson pkaa. Por kchë kyalntson nii beeñtsyey ma wnee xuuy go pkëëti ma meñ parñee klaa meñ tsobey meñ ni ksoxib meñ lo ximdyo ma tox ko. Mbañ ma tox ko ni ma wnee xuuy go, byab ma lo ki nii noyek con kyo nii lë azufre. 21 Aan lëë kchë meñ nii ngab lo ma tox ko kuty conspad nii sob chuw xaa nii sob lady cabay, aan kchësy mguiñ byëly taw xpëël kchësy meñ kuty ko.