3
Kan žaḻa' gakgak benne' ka' žape chí'igake' žo'o
1 Nak dot da' li dižan' dan' ẕnnan: “Cha' že' ḻaže' to benne' gake' benne' žape chi'e benách ka' che Benne' Criston', ẕdan ḻaže'e to žin chawe'.” 2 No benne' žape chi'e benách ka' che Benne' Criston':
Žon byenen bi soa no benne' gak bi da' nnie' chie'.
Žaḻa' soa toze ẕo'le.
Žaḻa' gake' ban ḻaže'.
Žaḻa' gake' dot ḻi ḻaže'.
Žaḻa' gake' gax̱jw ḻaže'.
Žaḻa' wi'e latje gan ga'ngak lježžo ka' žíngake' liže'.
Žaḻa' sáke'le' wsedle' benách ka'.
3 Bi žaḻa' gake' benne' že'je'.
Bi žaḻa' gake' benne' snia.
Bi žaḻa' dan ḻáže'ze' si'e mežw.
Žaḻa' gake' ži'i ḻaže'.
Žaḻa' gake' ẕen ḻaže'.
Žaḻa' gake' benne' bi ẕdan ḻaže'e yeḻa' gape.
4 Žaḻa' nna bi'e cháwe'do' benách ka' nníta'gake' liže'.
Ẕi'ne' ka' žaḻa' góngakbe' kan ẕnna x̱tiže'e.
Žaḻa' gápegakbe' x̱ágakben' ba la'ne.
5 (¿Nakx̱kze gak to benne' gape chi'e benách ka' che Dios cha' bi žak nna bi'e cháwe'do' benách ka' nníta'gake' liže'?) 6 Bi žaḻa' gake' benne' ḻa' wzó ḻawtie' nake' tẕen ḻen Benne' Criston', nich bi tetle wká'n ẕen kwine', na' bi gak chie' kan gok che da' x̱iwe', dan' bka'n ẕen kwinen, na' Dios bchoge' chen kwia yin'. 7 Benne' ka' bi zej nbábḻene' benách ka' che Benne' Criston', žaḻa' nne cháwe'gake' chie' nich bi soa no benne' wzóe' ḻe' cheḻa'ale, nich bi chejžeje' ḻo yeḻj che da' x̱iwe'.
Kan gakgak benne' ka' nzi' ḻo ná'gake' gákḻengake' žo'o
8 Ḻezka' benne' ka' nzi' ḻo ná'gake' gákḻengake' benách ka' che Benne' Criston':
Žaḻa' gákgake' dot ḻi ḻaže'.
Žaḻa' góngake' kan ẕnnágake'.
Žaḻa' gákgake' benne' bi že'j ka'.
Žaḻa' gákgake' benne' ka' bi ẕdángake' yeḻa' gape.
9 Žaḻa' gape chí'igake' da' žejḻe'žo che Benne' Criston'.
Žaḻa' gak dot chawe' yichj ḻáẕdo'gake'.
10 Žaḻa' si' bia'le ḻégake' zga'ale, na' naž si' ḻo ná'gake' gákgake' benne' ka' gákḻengake' benách ka' che Benne' Criston', cha' bi zoa no benne' gak bi da' nnie' chégake'. 11 Ḻezka', no'le che chégake' žaḻa' gákgake' dot ḻi ḻáže'gake', na' bi gákgake' benne' wenné che lježe'. Žaḻa' gákgake' ẕen ḻaže', na' gákgake' dot chawe' ḻo yógo'te da' žóngake'. 12 Benne' ka' nzi' ḻo ná'gake' gákḻengake' benách ka' che Benne' Criston':
Žaḻa' soa toze no'le che chégake'.
Žaḻa' nna biá'gake' binlo ẕí'ngake' ka', na' benne' ka' nníta'gake' lížgake' ka'.
13 Žon byenen gaken ki, dan' nzi' ḻo ná'gake' latje gan gápegak benách ka' x̱tíža'gake' ba la'ne, cha' žóngake' binlo žin da' žóngake' žákḻengake' benách ka' che Benne' Criston', na' gákgakže' benne' wechóg ḻaže' kate' ẕcháḻjgake' kan nak da' žejḻe'žo che Jesús, Benne' Criston'.
Da' bgache' che da' ẕka'n ẕenžo Dios
14 Ẕzoja' diža' ki chio' le', ḻa'kze žx̱en ḻaža'a yedjwía' le' bayente. 15 Cha' wžela', ẕzoja' da' ki chio' nich nnezlo' kan žaḻa' gono' ḻawgak benách ka' nníta'gake' liž Dios, benne' ka' zej nake' che Dios ban, na' zej nake' choch, na' ẕcháḻjgake' da' naken dot da' li. Zej nake' ka yag ka' da' žóx̱gaken yo'o, na' ka da' ka' žon chóchgaken ze'e. 16 Da' li, ẕenḻe'e nak da' bgache' che da' ẕka'n ẕenžo Dios, kan nyejw ḻe'e yiche da' ẕnnan:
Dios bḻoe'e ḻawe', na' goke' benách.
Gok bia' nake' chawe' dan' wyoé'e Dios Be' La'y.
Bḻé'egekle wbás ka' che ya'abá che Dios Ḻe'.
Wzé diža' kan nak chie' ḻawgak benách zi'to' ka'.
Bejḻe'gak benách ka' chie' Ḻe' ḻo yežlyó nga.
Dios bchise' Ḻe' ža'le gan nake' blo.