1 Wdé gok da' ki, X̱anžon' wžíe' yechonnḻalj chi benne' wsedle chie' ka', na' bseḻe'e chope wéjgake' nich chjake' zgá'alegake' ka Ḻe' yógo'te yež ẕen ka', na' yeždo' ka', gan za' tie' Ḻe'. 2 Gože' ḻégake':

—Da' li, deḻe'e žin chia', da' naken ka to yežlyó ẕen gan žon byenen ḻapa', san babze benne' wen žin chia' nníta'gake'. Che ḻen, le gáta'yoele Dios, Bennen' nake' X̱an yežlyón', seḻe'e benne' wen žin ka' gan nak yežlyó chien'. 3 Le chej na'a. Le wia, neda' žseḻa'a ḻe'e, na' nakle ka ẕila' ka' zjakba' ládjwgak beko' yix̱e' snia ka'. 4 Bi wa'le bzod mežw, na' kege yix̱jw yet, na' bi wa'le yetó kwe' ẕélele, na' bi žélele ḻo nez nich wcháḻjḻenle benách ka'. 5 Gáte'teze yo'o gan cho'ole, zga'ale nnale: “Da' ẕka'n chawe' yichj ḻáẕdo'žo gaken chegak benách nníta'gake' yo'o ni.” 6 Cha' zoa no benne' ga na', benne' ẕga'n chawe'e, da' ẕka'n chawe' yichj ḻáẕdo'žo da' nnablen gá'nḻenen ḻe', san cha' bi zoa no benne' ki ga na', da' ẕka'n chawen' da' nnablen gá'nḻenen ḻe'e. 7 Le ga'n ḻo yo'o gan cho'ole, na' le ye'j le gaw bi da' gónngake' ḻe'e, dan' žéḻkzele benne' wen žin da' gawe'. Bi tele to to yo'o. 8 Gáte'teze yež gan žinle, gan gápegake' ḻe'e ba la'ne, le ye'j le gaw bíte'teze da' gónngake' ḻe'e. 9 Le yeyón benne' yižwé' ka', benne' nníta'gake' ḻo yežen', na' le ye'-gake': “Ba bḻa' da' ẕnna bia' Dios gan zoale.” 10 Gáte'teze yež gan žinle, cha' bi gápegake' ḻe'e ba la'ne, le yežój ga na', na' le chejzé ḻo nez che yežen', na' nnale: 11 “Bix̱te yo che lažle, da' dan' labto' ẕchinnjton', na' naken da' ẕḻoe'elen nbága'le ẕia, san žaḻa' nnézlele da' ni. Ba bḻa' da' ẕnna bia' Dios ga zoale ni.” 12 Neda' žapa' ḻe'e, kate' žin ža chog Dios chegak benách ka', sáka'žegak benách ka' che yežen' ka sáka'gak benách ka' wnníta'gake' ḻo yež Sodoma, yežen' bchinnj Dios.

13 Ḻezka' wnná Jesusen':

—Da' nyáche'ḻe'e gaken chele ḻe'e, benách yež Korazín. Da' nyáche'ḻe'e gaken chele ḻe'e, benách yež Betsaida. Chela' gok ḻo yež Tiro, na' ḻo yež Sidón yeḻa' wak ẕen ka' ka da' ka' bena' gan zoale ḻe'e, ža ni'te yeyát ḻáže'gak benne' yež ka', na' wakw kwíngake' laže' ka'ze, na' kó'ogake' de yíchjgake', da' wḻoe'elen ba beyát ḻáže'gake'. 14 Che ḻen, kate' žin ža chog Dios chegak benách ka', sáka'žele ḻe'e ka sáka'gak benne' yež Tiro ka', na' benne' yež Sidón ka'. 15 Ḻe'e, benách ka' zoale ḻo yež Kapernaum. Gok chele kan wyeple gan cho'ogak benách ka' ya'abá che Dios. Na'a yetjle gan chejžo'ole latje choḻ chegak benne' gat ka'.

16 Naž Jesusen' gože' benne' wsedle chie' ka', na' wnné':

—No benne' ẕze nage' chele ḻe'e, ḻezka' ẕze nage' chia' neda', na' bennen' ẕka'ne' ḻe'e ka'ze, ḻezka' ẕka'ne' neda' ka'ze, na' bennen' ẕka'ne' neda' ka'ze, ḻezka' ẕka'ne' ka'ze X̱a', Bennen' bseḻe'e neda'.

17 Kate' chonnḻalj chi benne' ka' bseḻa' Jesusen' nich chejzéngekle' benách diža' chawen' bežíngake' gan zoe', na' wnnágake':

—X̱an, be' x̱iwe' ka' žóngaken kan ẕnnato' kate' ẕkonlto' žin lo'.

18 Jesusen' gože' ḻégake':

—Neda' bḻe'ela' da' x̱iwe', na' wbix̱en ẕan ya'abá kan žon yi' wzió', dan' žazen ḻo yo. 19 Le wia nga, neda' bdia' ḻo na'le yeḻa' wnná bia' nich gak góxwle bele snia ka', na' gox̱jní' ka', ḻen na'le, na' bi be gaken chele, na' nich wchinnjle yeḻa' wnná bia' che da' x̱iwe', dan' bi ẕḻe'elen žo'o chawe'. 20 Na'a, le yebél, kégeze dan' žongak be' x̱iwe' ka' kan ẕnnale, san dan' zej nyejw lale ya'abá che Dios.

21 Ḻa' na'ze bebél Jesusen', zoaḻen Dios Be' La'y Ḻe', na' wnné':

—Ẕka'n ẕena' Le', X̱e, nako' X̱an ya'abá, na' X̱an yežlyó nga. Ki žona' dan' bkacho'o da' ki ḻawgak benne' ka' žákgake' da' ẕenḻe'e, na' ḻawgak benne' sina' ka', san bḻoe'elo' x̱kwide' ka' kan zej naken. Ka'kze gaken, X̱e, dan' ki žaz ḻažo'o Le'.

22 Naž wnné':

—Ba bde X̱a' yógo'te ḻo na'a. Bi zoa no benne' nnezle' no benne' nake' Ẕi'n Dios, san toze X̱ažo Dios nnezlen', na' bi zoa no benne' nnezle' no benne' nake' X̱ažo Dios, san toza' neda', Ẕi'ne', nnezlan', na' ḻezka' nnézgekle benne' ka' žénela' neda', Ẕi'ne', wḻoe'ela' ḻégake' X̱a'.

23 Naž Jesusen' bwie' benne' wsedle chie' ka', na' gože' ḻégake':

—Ba nez ẕen naken chegak benne' ka' ẕḻé'egekle' da' ẕḻé'elele ḻe'e, 24 dan' žapa' ḻe'e: benne' zan, benne' ka' bcháḻjgake' ḻo wláz Dios ḻen benne' wnná bia' ka', gónegekle' ḻé'egekle' da' ẕḻé'elele ḻe'e san bi bḻé'egeklen'. Gónegekle' yéngekle' da' žénlele ḻe'e, san bi béngeklen'.

25 Naž ḻa' wzó ža'te to benne' yodo' wsedle, na' nich si' bi'e Jesusen', wnnable' Ḻe', na' wnné':

—Benne' wsedle, ¿biẕe žaḻa' gona' nich gata' yeḻa' nban da' zejlí kanne chia'?

26 Jesusen' gože' ḻe':

—¿Žejni'ilo' da' nyejw ḻe'e yich, dan' bchi'le Moisés? ¿Nakx̱ x̱bab žono' le' dan' žoḻo'?

27 Beží'i bennen', na' wnné':

—Ki ẕnnan: “Bži'il X̱ano' Dios dot ḻažo'o, na' ḻen dot yichj ḻaẕdo'o, na' ḻen dot yeḻa' žon chio', na' ḻen dot yeḻa' žejní'il chio', na' ḻezka' žaḻa' ži'ilo' lježo' kan nži'il kwino'.”

28 Jesusen' gože' ḻe':

—Da' likze kan wnnó'. Ben ki, na' gata' yeḻa' nban na' chio'.

29 Dan' gónele bennen' yebéj chawe' kwine', gože' Jesusen':

—¿Noẕ benne' nake' lježa'?

30 Bechebe Jesusen', na' gože' ḻe':

—To benne' wzé'e ḻo yež Jerusalén, na' bdinne', zeje' yež Jerikó. Ḻo nezen' béx̱wgak benne' wbán ka' ḻe'. Btínnegake' ẕe', na' béngake' ḻe' we'. Naž bezá'gake' ga na', na' bká'ngake' ḻe' ba žatkze'. 31 Naž wdé to bx̱oz ḻo nezen'. Kate' bḻe'ele' bennen' žie' we', cheḻa'ale wdíe'. 32 Ḻezka' to benne' nbabe' ẕa'só Lebí, benne' ka' žóngake' žin che yodo', wdíe' ga na'. Kate' bḻe'ele' ḻe', ḻezka' wdíe' cheḻa'ale. 33 Ḻezka' to benne' nbabe' Samaria yoe'e nezen', na' bžine' gawze gan de bennen' žie' we'. Kate' bḻe'ele' ḻe', beyache' ḻáže'le' ḻe'. 34 Wbige'e gan die', na' bdebe' set, na' x̱is uba waḻ ḻo we' chie', na' bcheḻen' laže'. Naž bžie' ḻe' x̱kože' bia chie', na' bchi'e ḻe' ḻo yo'o gan želžín benne' ka' yó'ogake' nez, gan wdape chi'e ḻe'. 35 Yetó ža kate' ba ža'ní', katen' za' yezá' benne' Samaria na' ga na', wleje' laẕjwe' che chope ža, na' bka'nen' ḻo na' benne' x̱an yo'on', na' gože' ḻe': “Wdape chi'i benne' ni, na' cha' senžo' mežw, neda' yeyiẕjwan' le' kate' yeḻá'a.” 36 Na'a, ¿nakx̱ x̱bab žono' le'? ¿Nole benne' chonne ki goke' ljež bennen' bengak benne' wbán ka' ḻe' ẕia?

37 Bechebe benne' yodo' wsedlen', na' gože' Jesusen':

—Bennen' beyache' ḻáže'le' ḻe'.

Naž Jesusen' gože' ḻe':

—Wyéj na'a, na' ben ki.

38 Naž Jesusen' beyoé'e nez, na' bžine' to yeždo' gan zoa to no'le lie' Marta, na' no'len' bchi'e Ḻe' liže'. 39 Martan' zoa no'le bile' lie' Lia, na' Lian' wži'e x̱ni'a Jesusen', na' bze nage' x̱tiže'e. 40 Martan' wžé' zedle' dan' žónḻi'e žin. Wbige'e gan zoa Jesusen', na' gože' Ḻe':

—X̱an, ¿bi žeyache' ḻáže'lo' neda' dan' bka'n bi' bila' ni neda', na' toza' žona' žin? Gož-be' gákḻenbe' neda'.

41 Bechebe Jesusen', na' gože' ḻe':

—Marta, Marta, že' zedlo', na' da' zan da' že' ḻažo'o žonon'. 42 Toze da' žon byenen gonžon, na' Lia ni wžebe' dan' nakže chawe', na' dan' wžebe' bi yegá'n.