DIŽA' CHAWE' DA' BZOJ MARKOS
1
Da' bchaḻj Ẕwa, bennen' bezóe' benách ka' nis
(Mt. 3:1‑12; Lk. 3:1‑9, 15‑17; Jn. 1:19‑28)
Ki wzó ḻaw diža' chawen' kan nak che Jesús, Benne' Criston', Ẕi'n Dios.
Goken kan bzoj Isaías, bennen' bchaḻje' ḻo wláz Dios ža ni'te, da' wnná Dios nich yeyón chawen' yichj ḻáẕdo'gak benách ka' nich si' ḻo ná'gake' Benne' Criston'. Ki wnné':
Bwia nga. Žseḻa'a benne' wbás chia', benne' nežwe' ka Le'.
Ḻe' wpé'e nez gan tio'.
Yenle chi'i to benne' nnie' zižje latje dach, na' nne':
“Le soa ban ḻaže' dan' za' X̱anžon' gan nníta'le.
Le yebéj ḻi nez las gan tie'.”
Ki goken dan' bḻa' Ẕwa latje dach, na' bchaḻje' nich yezoagak benách ka' nis, benne' ka' yeyát ḻáže'gake' nich yenít ḻaw Dios ḻégake' che doḻa' da' zej nbage'e. Bžojgak benne' zan yógo'te yež ka' gan nbab Judea, na' ḻezka' ḻo yež Jerusalén, na' jake' gan zoa Ẕwan', na' Ẕwan' bezóe' ḻégake' nis ḻo yego Jordán, benne' ka' bex̱óalapgake' doḻa' da' zej nbage'e.
Gokw Ẕwan' laže' dan' nžaben yicha' ẕa bia yix̱e', na' to bayw yid nžejen ḻi'e. Bdawe' biche' zo ka', na' we'je' bžina' che bezdo' ka'. Bchaḻj Ẕwan', na' wnné':
—Za' to benne' te na'a, bennen' napže' yeḻa' wnná bia' ka neda'. Bi naka' neda' zi yechwa', nich kweja' ẕele'. Neda' žezóa' ḻe'e nis, dan' ẕḻoe'elen nzi' ḻo na'le x̱tiža' Dios, san Ḻe' gone' da' ẕḻoé'ezele yeḻa' žezóa nis ni, dan' wchize' ḻe'e Dios Be' La'y, dan' wḻoe'elen nzi' ḻo na' Dios ḻe'e.
Žezóa Jesús nis
(Mt. 3:13‑17; Lk. 3:21‑22)
Kate' ža na' bžoj Jesusen' yež Nasaret gan nbab Galilea, na' Ẕwan' bezóe' Ḻe' nis ḻo yego Jordán. 10 Kate' bežój Jesusen' ḻo nisen', ḻa' na'ze bḻe'ele' beyaljw ya'abá, na' žetj Dios Be' La'y. Ẕnne'e ka to plomdo', na' bedjsóaḻene' Ḻe'. 11 Benle chi'i Benne' ẕchaḻje' ya'abá, na' wnné':
—Le' nako' Ẕi'na'. Nži'ila' Le', na' žaz ḻaža'a Le'.
Žénele da' x̱iwe' gonen ga baga' Jesús doḻa'
(Mt. 4:1‑11; Lk. 4:1‑13)
12 Naž Dios Be' La'y bchi'e Jesusen' de chgi' ḻo latje dach. 13 Wzóa Jesusen' latje dachen' chopḻalj ža, na' gónele da' x̱iwe' gonen ga baga' Jesusen' doḻa'. Wzóa Jesusen' gan zej nnita' bia yix̱e' ka', bia želdaba' ya'ado'. Wbás che ya'abá ka' gókḻengake' Jesusen', na' bwáwgake' Ḻe'.
Jesús žsedle' benách ka' gan nbab Galilea
(Mt. 4:12‑17; Lk. 4:14‑15)
14 Wdé bséjwgake' Ẕwa liž ya, wyéj Jesusen' gan nbab Galilea. Bchaḻje' diža' chawen' dan' zan' ḻo na' Dios. 15 Ki wnné':
—Ba bžin ža. Za' yedjnná bia' Dios nga. Le yeyát ḻaže', na' le chejḻé' diža' chawe' ni.
Žḻiž Jesús tape benne' wẕén bel
(Mt. 4:18‑22; Lk. 5:1‑11)
16 Kate' ne ẕde Jesusen' žoa'a nisdo' che gan nbab Galilea, bḻe'ele' Smon, na' Ndres, benne' biche' Smon na'. Zej nake' benne' wẕén bel ka', na' želzaḻe' yix̱jw bel chégake' ḻaw nisen'. 17 Jesusen' bḻiže' ḻégake', na' wnné':
—Le gonḻen neda' tẕen, na' gona' ga yedjwa'le benách ka' chia', gonle kan žonle kate' ẕzenle bel ka'.
18 Ḻa' bká'ntegake' yix̱jw ka' chégake', na' jákḻene' Jesusen'.
19 Wdé Jesusen' yeláte'do' na'le, gan bḻe'ele' Jakob ḻen Ẕwa, benne' ka' zej nake' ẕi'n Sebedeo, na' nníta'gake' ḻo barkw chégake' gan žeyágake' yix̱jw bel ka' chégake'. 20 Jesusen' ḻa' bḻižtie' ḻégake', na' bká'ngake' Sebedeon', x̱ágake', gan zóaḻene' benne' wen žin chie' ka' ḻo barkwn', na' jákḻene' Jesusen'.
To benne' yoe'e be' x̱iwe'
(Lk. 4:31‑37)
21 Bžin Jesusen' ḻen benne' ka' žónḻengake' Ḻe' tẕen yež Kapernaum. Kate' gok ža la'y chegak benne' judío ka', wyó'o Jesusen' yo'o gan ẕdobgak benne' judío ka' nich yéngekle' x̱tiža' Dios, na' wzó ḻawe' žsedle' benne' ka' zej ndobe' ga na'. 22 Bebángekle' kan žsedle Jesusen', dan' žsedle' kan žon to benne' nzi' ḻo ne'e yeḻa' wnná bia', na' kege kan žongak benne' yodo' wsedle ka'. 23 Ḻezka' wzóa to benne' yoe'e be' x̱iwe' ḻo yo'o gan zej ndobe', na' wžéžeyi'e, 24 na' wnné':
—¿Biẕ nbága'to' chio', Jesús, benne' Nasaret? ¿Zo'o nich wžía yi'o neto'? Nónbi'a Le'. Nako' Benne' La'y che Dios.
25 Naž Jesusen' wdiḻen', na' wnné':
—Wzóa žize, na' bežój ḻo bennen'.
26 Naž be' x̱iwen' wžibe sisen bennen', na' wžéžeya'an zižje, na' ḻa' bežojten. 27 Bebán ḻáže'gak yógo'te benne' ka' nníta'gake' ga na', na' wnnábgekle' ljéžgake' toe' yetóe', na' wnnágake':
—¿Biẕkze da' ni? ¿Žsedle' to da' kobe? Ḻen yeḻa' wnná bia' ẕchi'le' be' x̱iwe' ka', na' žóngaken kan ẕnne'.
28 Ḻa' wzete diža' che yeḻa' wak che Jesusen', na' béngekle benách ka' dot gan nbab Galilean' kan nak chie'.
Žeyón Jesús x̱na' ẕo'le Bedw
(Mt. 8:14‑15; Lk. 4:38‑39)
29 Naž bežój Jesusen' ḻo yo'o gan ẕdobgak benne' judío ka' nich yéngekle' x̱tiža' Dios, na' ḻa' wyéjḻentie' Jakob, na' Ẕwa, na' bžíngake' ližgak Smon, na' Ndres. 30 De x̱na' ẕo'le Bedw, bennen' lie' Smon, ḻo yo'on', na' yoe'e da' ḻa. Ḻa' belzéntele' Jesusen' kan žak che no'len'. 31 Naž wbiga' Jesusen', na' bex̱we' ne'e, na' bechise' ḻe'. Ḻa' bežojte da' ḻa da' yoe'en, na' bsí'ni'e da' bdáwgake'.
Žeyón Jesús benne' yižwé' zan
(Mt. 8:16‑17; Lk. 4:40‑41)
32 Kate' za' žaḻe, kate' za' wžén wbíž, ḻa' bžíntegak benne' ka' zej noe'e benne' yižwé' ka' gan zoa Jesusen', na' ḻezka' benne' ka' zej yoe'e be' x̱iwe' ka'. 33 Yógo'te benne' yež ka' bdóbdi'igake' kwit yo'o gan yo'o Jesusen'. 34 Ḻe' beyone' benne' yižwé' zan, benne' ka' zej de'e yižwé' zan che chégake'. Ḻezka' bebeje' be' x̱iwe' zan, be' ka' zej yo'o benne' ka'. Bi bi'e latje nnegak be' x̱iwe' ka' dan' zej nonbian' Ḻe' No nake'.
Ẕchaḻj Jesús gan nbab Galilea
(Lk. 4:42‑44)
35 Zildo' wyase Jesusen', kate' ne nak choḻ. Bežoje' ḻo yežen', na' wyeje' to latje dach, gan bcháḻjḻene' Dios. 36 Smon ḻen benne' ka' nníta'ḻengake' ḻe' bejdíljgake' Jesusen'. 37 Kate' bejx̱áka'gake' Ḻe', belyi'e Ḻe':
—Yógo'te benách žeyíljgake' Le'.
38 Naž Jesusen' gože' ḻégake', na' wnné':
—Le cho'o yež gawze ka', nich wchaḻja' x̱tiža' Dios ga na'. Che ḻen bežoja'.
39 Ka' goken, wdé Jesusen' dot gan nbab Galilea, na' bchaḻje' ḻo yo'o ka' gan ẕdobgak benne' judío ka' nich yéngekle' x̱tiža' Dios, na' bebeje' be' x̱iwe' ka' yo'ogak benách ka'.
Žeyón Jesús to benne' da' beḻa' žen chie' yižwé' leže
(Mt. 8:1‑4; Lk. 5:12‑16)
40 To benne' da' beḻa' žen chie' yižwé' leže bžine' gan zoa Jesusen'. Bzoa ẕibe' ḻawe', na' góta'yoele' Ḻe', na' wnné':
—Cha' žénelo', wak yeyono' neda'.
41 Jesusen' beyache' ḻáže'le' bennen'. Bḻi ne'e, na' wdane' ḻe', na' gože' ḻe':
—Žénela'. Ba beyako'.
42 Katen' wnné' da' ni, ḻa' benitte yižwén' dan' de'e, na' beyake' cháwe'do'. 43 Naž Jesusen' bchi'le' bennen', na' ḻa' beséḻa'tie' ḻe'. 44 Ki gože' ḻe':
—Bi wzenlo' no benne' kan bena' chio', san wyéj, bejḻoé'el kwino' ḻaw bx̱oz, na' bejneẕjw che da' beyako' le' che yodo' kan wnná Moisés, dan' wḻoe'elen benách ka' ba beyako'.
45 Bežój bennen', na' wzó ḻawe' ẕzenle' benne' zan dan' goken chie'. Dan' bzie' diža' ni, biž gok chaz Jesusen' kwáselo ḻo yež, san wzoaze' na'le gan nak latje dach. Benách yógo'te yež bžíngake' gan zoe' Ḻe'.