1 Ẕenḻe'e nak X̱anžon', na' žaḻa' wká'n ẕénḻe'ežo Ḻe'

ḻo yež che Dios chežo, dan' žen' ḻaw ya'a la'y chie'.

2 Sión, ya'a ẕen che Dios, naken sibe, na' x̱tanḻe'e.

Naken yež che Benne' Wnná Bia' Ẕen,

da' žonnen yeḻa' žebele chegak benách dot yežlyó nga.

3 Dios bḻoe'ele' ḻaw ẕkache' chawe'e žo'o.

Zoe' ḻo yo'o zaka' ka' che yež chien'.

4 Bdobgak benne' wnná bia' ka',

na' bḻá'gake' nich tíḻ-ḻengake' benne' yežen' ka',

5 san kate' bḻé'egeklen', na' bebángekle'.

Bžébegake', na' bẕónnjgake'.

6 Wžé' zédḻe'egekle', na' wẕáka'ḻe'egake'

ka žak che to no'le za' gaḻj bi' že'n chie'.

7 Gókgake' ka barkw ka' žx̱íte'gaken

kate' žakḻe'e be' ḻo nisdo'.

8 Benlžo che da' ben Dios, na' na'a ba bḻe'elžon

ḻo yež che X̱anžon', Bennen' nape' dot yeḻa' wak.

Ḻe' wzóa chawe'e yež nga to chi'ize.

9 Ga nak ḻo yodo' chio' Le', Dios,

žezá' ḻáže'to' ka nak yeḻa' ži'i ḻaže' ẕen chio'.

10 Gáte'teze ẕka'n ẕengak benách ka' Le',

na' yeḻa' ẕen chio' ẕžinen do ẕente yežlyó.

Ka ẕnna bi'o naken chawe'.

11 Yebéḻe'egekle benne' ka' nníta'gake' yež Sión.

Yebégekle benne' ka' nníta'gake' yež ka' che Judá dan' ẕchi'a ḻáže'kzo' ḻégake'.

12 Ḻe'e, benne' ka' che Dios, le chechjle žoa'a yežen'.

Le wláb yo'o sibe ka', da' ka' žape chí'igaken yežen'.

13 Le wia nga ka nak ze'e ẕen da' nyechjlen yežen'.

Le wia binlo ka zej nak yo'o waḻe ka' chen,

nich wzénlele x̱kwide' chele ka' ka zej naken.

14 Dios ni nakkze' Dios chežo to chi'ize.

Ḻe' wḻoé'ekzle' žo'o nez chawe'.