1 X̱anto' Dios, ¿wléj yichjo' neto' to chi'ize?

¿Ẕžo'o neto', ẕila' chio' ka'?

2 Bsa' ḻaže' benne' chio' ka', benne' ka' wẕi'o ža ni'te, benne' ka' beya'wo'

nich gono' ḻégake' benne' chekzo' ka',

benne' ka' zej zoe' ḻaw Ya'a Sión nga, ga ni zoakzo' Le'.

3 Da ka' gaze yedjḻe'elo' ka nbia yi' yež nga,

na' ka nak da' ẕinnj da' bengak benne' ka' che latje la'y chio'.

4 Ẕbéžeya'agak benne' ka' bi ẕḻé'egekle' Le' chawe'

gachje ḻawle gan zej ndobe benne' chio' ka'.

Bdá'gake' nga da' ẕḻoe'elen yo'oto' ḻo ná'gake'.

5 Bchínnjgake' yež ni,

ka žon to benne' ẕchoge' yógo'te yag ka' zej zen to ḻaw ya'a.

6 Ḻen ya wag chégake' ka', na' ḻen yag chégake' ka',

bchínnjgake' yógo'te da' x̱tan ka' che yodo' chio'.

7 Bzéygake' latje la'y chio'.

Bká'ngake' ka'ze ližkzo' Le'. Bchínnjgaken'.

8 Wnnágake': “¡Wžía yi'žo ḻégake' to chi'ize!”

Bzéygake' yógo'te yo'o gan bká'n ẕento' Le' dot ḻo yežlyó chio'.

9 Biž bi ẕḻe'elto' da' nak la'y, dan' bchisto' ḻo yežlyó cheto'.

Biž zoa no benne' wchaḻje' ḻo wlazo' Le',

na' bi zoa no benne' ladjw neto', benne' nnezle' batx̱ yelato'.

10 X̱anto' Dios, ¿to chi'ize wchix̱gak benne' ka' neto', benne' ka' žsaka' zí'gake' neto'?

¿To chi'ize nnegak benne' ka' bi ẕḻé'egekle' Le' chawe' che La la'y chio' Le'?

11 ¿Biẕ chen' bi be žono' chegak benne' ka'?

¿Biẕ chen' bi ẕžia yi'o benne' wen da' ẕinnj ka'?

12 San Le', Dios, nako' Benne' Wnná Bia' chia' ža ni'te.

Le' bžia yi'o benne' ka' dot ḻo yežlyó nga.

13 Ḻen yeḻa' wak ẕen chio' beno' nisdo' chope ḻa'a.

Wló'o yichj bia ẕenḻe'e ka' ḻo nisdo'.

14 Bzoẕjo' yichj bia ẕenḻe'e, bian' leba' lebiatán,

na' beno' ga bdawgak bia yix̱e' ka' ḻeba', bia ka' zej zoaba' ḻo yo biž.

15 Beno' ga golj nis bej ka', na' nis yegw ka'.

Besbižo' yegw ẕen ka'.

16 Chio' Le' nak ḻawe' ža, na' ḻezka' chio' nak yele.

Le' bnnito'o byo', na' wbíž gan zej zoan.

17 Bnnitkzo' to chi'ize yógo'te da' zej že' yežlyó nga.

Le' beno' byo' wbá ka', na' byo' zag ka'.

18 Bejsá' ḻaže' da' ni:

benne' ka' bi ẕḻé'egekle' Le' chawe' ben dítjgekle' Le', X̱anto' Dios,

na' benne' yaḻ ḻaže' ka' wnnégake' che La la'y chio' Le'.

19 Bi gaḻ ḻažo'o neto', benne' chio' ka', to chi'ize.

Bi wká'n neto', benne' ka' nži'ikzlo', ḻo na'gak benne' ka' zej nake' ka bia snia ka'.

Zoato' ḻáwgake' ka zej nak gogoldo' ka'.

20 Bejsá' ḻaže' diža' da' bénḻeno' neto',

dan' gáte'teze nníta'gak benne' wen da' ẕinnj ka'.

Ẕdágake' do ẕente yežlyó nga.

21 Bi go'o latje yedoé'egekle benne' gax̱jw ḻaže' ka'.

Benne' ka' ẕzáka'ḻe'egake', na' benne' ka' žiážjegekle'

we ḻáwgake' La la'y chio' Le'.

22 Wzó ža', Dios. Ben kan wnnakzo' gono'.

Bejsá' ḻaže' kan žongak benne' yaḻ ḻaže' ka',

benne' ka' ẕká'ngake' ka'ze La la'y chio' tža tža.

23 Bi gaḻ ḻažo'o da' wnné zi'gak benne' wen da' ẕinnj ka' chio' Le'.

Néntezle žo'osbé da' žongak benne' ka' ẕží'igake' chio' Le'.