18
Ẕbia yi' yež Babilonia
1 Wdé na' bḻe'ela' betj yetó wbás che ya'abá, wbasen' bžoje' ya'abá che Dios, na' nzi' ḻo ne'e yeḻa' wnná bia' ẕen, na' wyép yes baní' ḻo yežlyó ni'a che yeḻa' ẕen che wbasen'. 2 Wbás che ya'abán' wnníe' zižje, na' wnné':
Ba wžía yi'. Ba wžía yi' Babilonia, yež ẕen na'.
Ba beyaken latje che da' x̱iwe', na' chegak be' x̱iwe' ka'.
Byinne sníaḻe'e ka' ḻen byinne sban ka', ba béngakba' x̱ó'ngakba' ga na'.
3 Ka' goken ni'a che da' bengak benne' ka' che yežen'.
Yógo'te benne' yež yoble ka' béngake' tẕen ḻen ḻégake' da' wzé ḻáže'gake'.
Benne' wnná bia' ka' béngake' tẕen ḻen ḻégake' da' sban.
Yógo'te benne' ža'w žote' ka' gota' yeḻa' wnni'a chégake',
dan' bdan ḻáže'gak benne' wláž ka' da' záka'ḻe'en.
4 Naž benla' ẕchaḻj yetó benne' zoe' ya'abá che Dios, na' wnné':
Le žoj ḻo yežen', ḻe'e nakle chia' neda',
nich bi gonle doḻa' tẕen ḻen ḻégake',
na' nich bi gak chele da' saka' zi'le tẕen ḻen ḻégake'.
5 Nyanḻe'e doḻa' da' zej nbage'e, na' ba néntelen ya'abá,
san Dios žejsá' ḻaže'e da' kegle da' béngake'.
6 Le yebí'i chégake' kan béngake' chele.
Le yebí'i chégake' chope kwe' ka da' béngake'.
Le yebí'i chégake' chope kwe' ka da' ẕia da' béngake' chele.
7 Le gon ga sáka'ḻe'egake', na' kwež nyáche'gake'
kan zej nak yeḻa' ba la'ne, na' yeḻa' ẕen da' bka'n kwíngake'.
Wzá' ḻáže'gake', na' wnnágake':
“Že'to' nga, na' ẕnna bia'to'.
Bi nakto' wzebe, na' batkle kwež nyáche'to'.”
8 Che ḻen, to žaze žingak da' ka' wsaka' zí'gaken ḻégake',
yeḻa' got, na' yeḻa' ẕbeže nyache', na' yeḻa' ẕdon.
Chéygake' ḻo yi'.
X̱anžo Dios, Bennen' bchoge' chégake' ki, napkze' dot yeḻa' wak ẕen.
9 Naž wnné': “Kwežgak benne' ka' ẕnna biá'gake' yežlyó nga, benne' ka' béngake' da' kegle tẕen ḻen ḻégake', na' bebéḻengekle' da' zej naken chégake', na' kwež nyáche'gake' katen' ḻé'egekle' žen che yež ẕen na' da' žeyen. 10 Zí'to'le yelnnite'e dan' ẕžébegake' da' wsaka' zi' Dios benne' yežen', na' nnágake':
Da' nyáche'ḻe'e žaken che Babilonia, yež ẕen nga.
Gokḻe'e Babilonia yež blo, na' to žaze bžia yin'.
11 ’Ḻezka' kwežgak benne' ža'w žote' ka', benne' ka' nníta'gake' yežlyó nga, na' kwež nyáche'gake' ni'a che yežen', dan' biž soa no benne' ga'we' da' góte'gake' ga na'. 12 Biž soa no benne' ga na', benne' ga'we'
da' naken ya oro, na' ya plat,
na' yej zaka' ka', na' bga ka',
na' laže' da' záka'ḻe'en, na' laže' x̱na,
na' laže' cháwe'do', na' laže' x̱naḻe'e,
na' yag da' ẕḻa' ẕix̱,
na' da' naken žit da' záka'ḻe'en,
na' da' naken yag da' záka'ḻe'en,
na' da' naken ya kobre, na' da' naken ya,
na' da' naken yej jese.
13 ’Biž soa no benne' ga na', benne' ga'we'
kanel, na' da' ka' ẕḻa' ẕix̱, na' yale,
na' da' ẕḻa' ẕix̱ che mirra, na' che yeje olíbano,
na' x̱is uba waḻ, na' set ẕix̱,
na' yezje cháwe'do', na' ẕoa' stribe,
na' búrrodo' ka', na' ẕila' ka',
na' bia ka', na' karret ka',
na' benne' wen žin ka', na' yebaḻe benách ka'.
14 ’Benne' ža'w žote' ka' yé'gake' ḻégake', na' nnágake':
Ba begá'a da' ka' wdán ḻáže'le.
Ba wdé chegak yeḻa' wnni'a ka',
na' da' ka' zej naken x̱tan chele,
na' biž si'le da' ka'.
15 ’Kwežgak benne' ža'w žote' ka', benne' ka' gota' chégake' yeḻa' wnni'a dan' béte'gake' ḻo yežen', na' gá'ngake' zí'to'le dan' chébegake' kan gak ẕia da' gaken che yežen', na' kwež nyáche'gake', 16 na' nnágake':
Da' nyáche'ḻe'e žaken che yež ẕen nga.
Goken ka to no'le nakwe' laže' da' záka'ḻe'en,
na' laže' x̱na, na' laže' x̱na gole,
na' wžiagak da' x̱tan ka' chie' da' zej naken
ya oro, na' yej zaka' ka', na' bga ka'.
17 To žaze wžía yi' yeḻa' wnni'a che yež nga.
’Yógo'te benne' x̱an barkw ka', na' benne' ka' žóngake' žin ḻo barkw ka', na' benne' ka' žsá'gake' barkw ka', na' benne' ka' žóngake' žin ḻo nisdo', wzégake' zí'to'le, 18 na' kate' bḻé'egekle' žen che yežen' da' žeyen, na' wžéžegake', na' wnnágake': ¿Biẕ yež yoble goken ẕen kan gok yež ni?
19 ’Bžíagake' bix̱te yo yíchjgake', na' wžéžegake', na' wžéž nyáche'gake', na' wnnágake':
Da' nyáche'ḻe'e žaken che yež ni da' goken ẕen.
Yeḻa' wnni'a che yež ni benen ga gota' yeḻa' wnni'a
chegak yógo'te benne' zej nake' x̱an barkw ḻo nisdo'.
To žaze wžía yi' yež ẕen ni.
20 Le yebél ni'a che da' goken che yež ẕen ni, ḻe'e zoale ya'abá.
Le yebél, ḻe'e nakle che Dios,
na' ḻe'e, benne' wbás chie' ka',
na' ḻe'e, benne' ẕchaḻjle ḻo wlaze' Ḻe'.
Le yebél dan' ba bchog Dios che yež nga kwia yin'
ni'a che da' bsáka'gak benne' yež nga ḻe'e.”
21 Naž to wbás waḻe che ya'abá bchise' to yej ẕen da' žoten, na' bžo'nen' ḻo nisdo', na' wnné':
Ḻa' kikze gaken chio', yež Babilonia,
yež ẕen da' naken yež blo.
Biž ḻe'el nitó benne' le'.
22 Biž yéngekle benách cha' zoa no benne' ḻo yež nga,
nitó benne' žinne' ḻe'e da' žoḻen,
na' nitó benne' ẕkweže' bžejw,
na' nitó benne' ẕkweže' loz bia yix̱e',
na' biž žeḻ-le nitó benne' wen žin ga na',
na' biž yéngekle' žax̱to' da' žon yej da' žoten ga na'.
23 Biž wza'ní' nitó yi' ḻo yežen',
na' bi yéngekle' chi'i no benne' ẕchag ne'e ga na',
na' bi yéngekle' chi'i to x̱kwide' no'le ẕchag na'be'.
Ki gaken ḻa'kze gokle benne' zaka' ka', ḻe'e na' žá'wle, na' žóte'le ḻo yež ni,
na' ben ḻáže'lele benách ka' dot yežlyó nga, ḻen yeḻa' wžá' chele.
24 Naž wnné: “Bḻalj x̱chengak benne' ka' ḻo yež ni, benne' ka' bcháḻjgake' ḻo wláz Dios, na' x̱chengak benne' ka' zej nake' che Dios, na' ḻezka' x̱chengak yógo'te benách ka' wnníta'gake' yežlyó nga, benne' ka' betgak benne' wláž ka' ḻégake'.”