1 Uny sahlo naaning khaco Thlawpaw sawtei sahlo letei hratah bia rei khy ly neh tah khazaw sawtei sahlo letei hratah ka rei hri kho. Khri lekhei nysai naa cangning thlang cawtah a cang. 2 Batui hmuisui e naa zaw balang lynah cawtah bu cang lytah meimeitui ka ca peh he kho. Ahmang tei co, ato tai heh hmai zaw balang bei he ceh. 3 Naaning cawh ato tingtai heh khazaw sawtei hratah naa cangning thlang. Zecawtamaw tatah naa hrong letah hnachuanah le a hrychaenah a ungchung cawh khazaw sawtei cang thlang bei he ceh maw? Khazaw cawngsaw sahlo hratah tua se thlang hrah bei he ceh maw? 4 Zecawtamaw tatah pakheh tah, “Kama cawh Paul phu ka cang,” tah ka, ahringpaw tah, “Kama cawh Apolo phu ka cang,” a tah tihtah hei khazaw cawngsaw hratah cang thlang bei he ceh maw?

5 Ma vytei khy taihei Apolo cawh zemaw a cang? Taico Paul zawng cawh zemaw a cang? Sae pui kaa cang ky caw, naaning Khazing a ca zing sahpaw he Abuipaw tei a rai a ma thiapaw cacy hratah. 6 Kama tah thleci ka tu, Apolo tah tui a bia, canghrasala a chang sahtu cawh Khazing a cang. 7 Macawtaco thleci a tupaw le tui a biapaw cawh zehmai aa cang tlung be, canghrasala a chang sahtu Khazing cypaw heh a biapuipaw cawh a cang. 8 Thleci a tupaw le tui a biatupaw cawh tingchipaw sangkheh hnui he ka, aa hrepaw rai naning hrakhei lahsong peh a cang tae he a. 9 Zecawtamaw tatah kaaning cawh Khazing a rai a hrehruipaw ka cang peh, naaning cawh Khazing a ly, Khazing a ing na cang he ceh.

10 Khazing tei a pa pehpaw a ningdonah thongtah zung a thai ngeteipaw ingsahtu hratah a hrang bing neh ka, pakheh kheh takhei a cung letah a sah. Canghrasala a sahpaw maikaw takhei a raering a hy. 11 Zecawtamaw tatah bing ciapaw a hrang, Zisu Khri hlui taikhei co, a hrang hringpaw cawh ahotahmai bing khy bei he. 12 Cawngsaw pakheh kheh tah ma bing ciapaw a hrang leco sui, ngung, lungmaisung, thing le ngedi a cang ly leh sapae hmang tah a sah caco, 13 a raihrepaw zemaw a lo tah cawh a lang tae thlang a, zecawtamaw tatah ning tah ma cawh a palang tae a. Me tah pase cang ka, pakheh cy aa rai zemaw a lo takhah me taco a langsah tae a. 14 A sahpaw ing cawh a bing thlang caco, a sahtu taco a longmai khah a hmuh tae a. 15 A kang caco, a sahtu cawh a sung thlang a, canghrasala me chung taitah a ka saichuapaw hratah ama cawh pachah a cang thlang a.

16 Khazing behnah ing naa cangpaw le naa chung letah Khazing Thlawpaw a ungpaw khah hnih thlang bei he ceh maw? 17 Pakheh kheh tah Khazing behnah ing cawh a rorang caco, Khazing tah ama cawh a rorang hra a; zecawtamaw tatah Khazing behnah ing cawh a pathaipaw cang ka, ma behnah ing cawh naaning heh na cang he ceh.

18 Naaning le naaning a dungkhei khe o. Naaning lehei pakheh kheh tah atocai singnah phung tah kama cawh ka sing bang thlang tatah a rawh caco, a hruhpaw tah a tua seh la, ma pawsui co mehsing tah a cang khy a. 19 Zecawtamaw tatah ma khazaw singnah heh cawh Khazing mehmuh leco hrunah a cang. Capathai letei, “Khazing taco mehsing sahlo khah, aa ziathainá khei a tle he,”✡Job 5:13 tatah ciapaw hratah le, 20 “Abuipaw taco mehsing aa khuarawnah cawh a longpaw a cang takhah a hni,”✡Hlaw 94:11 tatei a ciapaw vytei hratah a cang hmuisui. 21 Macawtaco ahotahmai tah cawngsaw pachaw khawh khe o. Hming vytei heh naaning naa tei a cang he. 22 Apolo a cang zong, Paul a cang zong, Piter a cang zong, khazaw a cang zong, thih zong, hring zong, ato cai zong, hmelang cai zong aa zongmingtei hei naa tei cang he ka, 23 naaning cawh Khri a tei na cang he ceh, Khri cawh Khazing a tei a cang.