18
Babilon khuapui rorangnah
1 Ma khy taico, vaiming ahringpaw vaicung taitah a za cungpaw khah hmuh neh ka, ama cawh nawhnuinah alai ngeteipaw khah hnui ka, alui cawh a rungnawná tah a khai thlu. 2 A thaw duná tah y ka,
“Babilon khuapui rungnawpaw cawh rorang a cang myca! Rorang a cang myca!
Khachia sahlo ungnah le
thlawpaw pialuipaw cinglainah tah le
a pathai lypaw pavaw sahlo*A pathai lypaw pavaw sahlo cawh, pahmu le langtaw le ra-aw sahlo, a cang he. ungnah takhei a tua myca.
3 Zecawtamaw tatah raangting tah
a hohenah misur zu khah ding he ka, aa rui thlu.
Alui siangpahrang sahlo tah ama khaco canu capaw suanah tua he ka,
alui chohrawng sahlo cawh ohluikhaw tei a hohenah hnuichia khei aa rung thlu myca he,”
a tah.
4 Mataico vaicung taitei o hringpaw ka thuipaw taco,
“Ka cawngsaw sahlo, ama no taikhei va piachua la,
mataico a suanah letah a hlo bei he ceh,
ruhanah rawrungpaw zong khah ing hra bei ceh.
5 Zecawtamaw tatah a suanah taco avai tong myca ka,
a chahlynah sahlo khah Khazing tah a thui thlang.
6 A ca tuatypaw he hrakhei ama cawh palei kaw my lo.
A tuapaw cawtah khei a lehning tah palei kaw my lo.
A ny lekhei a lehning tah a chongpaw zu khah tlaipah kaw my lo.
7 Rungnawnah le anawngnah zia khah ama teitah a pehpaw zékhei taithuinah le
lung reithuinah khah pei my lo.
A lungchung tah a palai a patui ka,
‘Siangpahrang no hratah a typaw ka cang,
lahme cang bei neh, ngechianah a tong by bei neh,’ a tah.
8 Macawtaco ningkheh chung tah
thihnah le mangchiasahnah le cakaangná tah dangtah a cang a.
Me tah a kang thlu a, zecawtamaw tatah ama bia a pacepaw cawh
a thawtlungpaw Abuipaw Khazing khah a cang.
9 Ama khatah canu capaw suanah tua he katei, a nawngse tah a ung hruipaw alui siangpahrang sahlo takhei ama a kangpaw mekhu khah aa hmuh tihtah ngechia tah aa cawkhui a. 10 Taithuinah a ingpaw khah aa cinah cawtah langpa tah a daw he ka,
‘Na cing a ping! Vy khuapui rungnaw, na cing a ping!
Vy Babilon hmingtuakhynah khuapui!
Suimehlang pakheh chung letah dangtahnah tah a ca tlungso hi!’
aa tah.
11 Alui chohrawng sahlo taco ama cawh cawkhui he ka, mangchia aa sah khui a, zecawtamaw tatah aa cho a co ruapaw ung khaw bei he. 12 Aa cho cawh sui, ngung, lungva a mai a rupaw le lungnaw sahlo; pai anaipaw, a saidungpaw, pupai le asaipaw pai, ringthopaw thing a phingphing le alai nua, a mai a rupaw thing, daa, thaw le lungrang tei tuapaw hming a phingphing, 13 thingesing, masala, ringthopaw, a ringthopaw a tahpaw mura le frankinsen, misur zu le oliv sathy le vedi le changvuh, co le tuu, rang le ranglai, sae le ahringpaw cawngsaw a cang he.
14 Aaning sahlo taco, ‘Na dupaw hmingchaw vytei cawh a ly thlu myca he. Na rungnah vytei le na rungnawnah huhang vytei zong a ly thlu myca he. Ma hming sahlo heh zening tahmai va chuh kaw khaw bei he,’ aa tah a. 15 Ma hming a zuatu chohrawng sahlo, ama thong tei a hnuirungpaw sahlo takhei a taithuinah khah ci he ka, langhlaw taitah cai he ka, cah he ka, mangchia aa sah a, 16 taico,
‘Na cing a ping! Na cing a ping! Vy khuapui rungnaw,
pai anaipaw, a saidungpaw le asaipaw pai khei a pasang ceh ka,
a tlypaw sui le a mai a rupaw lungva le lungnaw tei a pasang teipaw cawh!
17 Ma tluh hnuirungnah khah suimehlang pakheh chung letah a lyde thlang!’
tatah a cah he.
Tuilawng hotu le tuilawng tei khua a tlawng teipaw sahlo, tuilawng khaetu sahlo, rili taitei po cawngnah hlo a hmuhpaw vytei cawh langhlaw pui tah aa ung. 18 Aa ronahpaw mekhu khah aa hmuh tihtah, ‘Ma khuapui rungnawpaw hapaw khuapui heh a ung bang maw?’ aa tah a. 19 Aa ngechianah palang pawtah luipadih khah aa lu letah a bia he ka, caw hmo le mangchiasah hmotah y he ka,
‘Na cing a ping! Na cing a ping! Vy khuapui rungnaw,
rili letah tuilawng a hnuipaw maikaw cawh
na hnuirungná khei aa rung thlu he!
Suimehlang pakheh chung lekhei khuapui cawh rorang a cang thah!
20 Vy vaicung letah a ungpaw le
mehpathai sahlo le apostol sahlo le Khazing khuavang sahlo, a lawng tua o!
Naa cung letei a tuasenah vytei rawng takhei ama cawh Khazing tah bia a cepah myca hi!’
aa tah a,” tatah a tah he.
21 Mataico, a thawtlungpaw vaiming takhei saangrianah lungtung alaipaw pui hapaw alung khah cui ka, rili lang vathlang ka,
“Ma hrahei Babilon khuapui rungnaw cawh
ringthimi tah rorang cang ka,
hmuh kaw cang khaw be.
22 Tingtang a tung thaipaw sahlo le hlaw a sahpaw sahlo o le phipahli a tung thaipaw sahlo le hmoka a tung thaipaw sahlo tei aa tungpaw py cawh
na chung letah thui cang khaw be.
Rai a hrepaw sahlo
na chung letah hmuh cang khaw bei he.
Sangrianah py cawh
na chung letah thui cang khawh by be.
23 Me-ing a khainah cawh na chung letah khai khaw be.
Nupui a chuipaw satle le pasae a hnuipaw laisaw o cawh
na chung letah thui cang khaw be.
Na chohrawng sahlo cawh khazaw mehlai sahlo a cang he.
Na ca-ia khei mingphing vytei cawh lang lypaw lang hrui a cang thlu myca he.
24 Khazing khuavang sahlo le mehpathai sahlo le
aluicung letei thawpaw sahlo vytei thisai khah nama letah hmuh a cang he,”
a tah.