1 Á de yã gɛ̀nↄ ũ Ludanɛ á taarinↄ kũ á durunnanↄ yãi. 2 Á tɛ́ andunia díkĩna ágbai, a mìi nàtɛ ĩa gbãnadenↄ kínanɛ, Setan kũ à kpɛ́ dona ludayãdarisarinↄnɛ arɛ pìi. 3 Ó pínki ó de lán ń bà yã se. Odì pↄ́ kũ ó mɛ̀ yeii kũ yã kũ à ó pↄ gbào kɛ. Ó inaa gũn ó de gbɛ̃ kũ Luda ni pↄfɛ̃ kipaḿmanↄ ũ lán dakenↄ bà, 4 ama Luda sùru zↄ̃kↄ̃, à yenyĩ vĩwɛrɛ manamana. 5 Gↄrↄ kũ ó de gɛ̀nↄ ũ ó taarinↄ yãi, à ó fútɛ kũ Kirisio lɛɛlɛ. À á sura bà a gbɛ̃kɛ gũn. 6 Kirisi Yesu gũn à ó sɛ́ à ó vútɛ kãao zaa musu, 7 de à le à a gbɛ̃kɛ zↄ̃kↄ̃ bonsarɛ mↄńnɛ andunia kũ ani su gũn yãi yã mana kũ à kɛ̀wɛrɛ Kirisi Yesu gũn musu. 8 Luda á sura bà a gbɛ̃kɛ gũn Yesu náani kũ a kɛ̀ yãi. Abire dí bo á kĩnaanlo, Luda mɛ́ à á gbá. 9 Á surabana dí bo á yãkɛna gãinlo, de gbɛ̃ke sún ĩa dãoro yãi. 10 Luda ↄgbɛn ó ũ. Kirisi Yesu gũn à ó kɛ́ de ògↄ̃ kú kũ yã mana kũ à gĩnakɛ à dìtɛwɛrɛ kɛnaao.

11 Ákↄ̃nↄ kũ á de buri pãndenↄ ũ inaa gũn, à laasun lɛ́ á kunna yãa. Tↄ̃̀zↄ̃nadenↄ dì á sísi gyↄfↄrↄdenↄ, ama ń tↄ̃̀zↄ̃na de bisãsiri ↄgbɛ ũmɛ. 12 Gↄrↄ birea á kun Kirisi sari, á de gbɛ̃ zĩ̀tↄnↄ ũ Isarailanↄnɛ. Á baka kú Luda bàka kunna kũńwo kũ a lɛ́sɛnnɛnaaoo gũnlo. Á kú andunia gũn tãmaa sari ludadↄ̃naa sari. 13 Kirisi Yesu gũn tera, ákↄ̃nↄ kũ á zã̀ kũ Ludao yãnↄ a nai kãni kũ Kirisi aru gbãnao. 14 Àkũmɛ ó kunna kũ kↄ̃o nna ũ, à tò Yudanↄ kũ buri pãndenↄ gↄ̃̀ mɛ̀ dokↄ̃nↄ ũ. A mɛ̀ɛ gũn à ibɛrɛ kũ à da ń dagura bĩni ũ gbòro, 15 à Musa doka nà gui kũ a yãditɛnanↄ de à tó ń pla ń pínki gↄ̃ kãao gbɛ̃ dufu mɛ̀n do ũ. Lɛn à tò ò kɛ̀ kũ kↄ̃o nna lɛ. 16 À ibɛrɛ làka, à ń pla ń pínki kɛ̀ nna kũ Ludao mɛ̀ dokↄ̃nↄ pìi gũn a gana lía yãi. 17 À sù à kɛna nna kũ Ludao baaruu kpà ákↄ̃nↄ kũ á zã̀ kũ Ludaonↄnɛ kũ gbɛ̃ kũ ò kãni kãaonↄ dↄ. 18 Kirisi yãi ó pínki ó zɛ́ vĩ ò na De Ludai kũ a Nini dokↄ̃nↄ gbãnao.

19 Abire yãi á de gbɛ̃ zĩ̀tↄnↄ ke bòasunↄ ũ doro, a gↄ̃ bedenↄ ũ kũ Luda gbɛ̃nↄ, a ↄndenↄ ũmɛ. 20 Ákↄ̃nↄmɛ kpɛ́ kũ Luda bò ɛ̃ kũ zĩ̀rinↄ kũ annabinↄ nàaa ũ, akũsↄ̃ Kirisi Yesumɛ à ɛ̃pɛtɛgbɛ ũ. 21 A gũnn kpɛ́ pↄ́ sĩnda pínki dì kↄ̃ kũn, àdigↄ̃ gbã Luda kpɛ́ ũ Dikiri gũn. 22 A gũn ákↄ̃nↄ se, á de kpɛ́ pì bobↄnↄ ũ, ákↄ̃nↄmɛ Luda Nini kúki ũ.