1 Abire mɛ́ à tò makũ Pↄlu, má de purusuna ũ Kirisi Yesunɛ ákↄ̃nↄ buri pãndenↄ yãi. 2 Ádi ma lákũ Luda a gbɛ̃kɛkɛnnɛna zĩ dàmɛnɛ mà kɛ á tɛ́roo? 3 Luda a asiriyã mↄ̀mɛnɛ, ma kɛ̃̀árɛ fíti kↄ̀. 4 Tó a a kyó kɛ̀, áni fↄ̃ à dↄ̃ lákũ ma wɛ́ kɛ̃̀ nà Kirisi asiriyã musu. 5 Luda dí yã pì o gbɛ̃kenɛ yãro, akũ tera sà à mↄ̀ a zĩ̀rinↄ kũ a annabinↄnɛ kũ a Nini gbãnao. 6 Yã kũ à utɛna yã pìn dí: Kirisi Yesu gũn baaru nna mana yãi buri pãndenↄ gↄ̃̀ Luda túbiblerinↄ ũ lɛɛlɛ kũ Yudanↄ, ò gↄ̃̀ kũńwo mɛ̀dokↄ̃nↄdenↄ ũ. Ń baka kú lɛ́ kũ Luda sɛ̀ɛ gũn. 7 Ma gↄ̃ baaru nna pìi kpàri ũ gba kũ Luda dàmɛnɛ, a gbãna tɛ́n zĩ kɛ ma gũn yãi. 8 Makũ kũ má kĩana Luda gbɛ̃nↄ tɛ́, Luda gba pìi dàmɛnɛ, akũ matɛn Kirisi aruzɛkɛ lakanasari baaru kpá buri pãndenↄnɛ, 9 matɛn asiriyã kũ Luda tɛn wɛtɛ gbɛ̃ sĩnda pínkinɛ bońnɛ gupuraa. Asiriyã pì utɛna Luda kũ à pↄ́ sĩnda pínki kɛ̀ kĩnaa zaa káaku, 10 akũ tera sà à tò kpatablerinↄ kũ ikode kũ ò kú musunↄ a ↄ̃ndↄ̃ buri dasinↄ dↄ̃̀ sↄsi gbɛ̃nↄ gãi. 11 Luda pↄyenyĩna kũ à kun zaa káaku pì lɛ́ pàpa Kirisi Yesu ó Dikiri gãi. 12 A gũn ó zɛ́ vĩ ò na Ludai kũ swɛ̃̀ɛo kpatɛna a náanikɛna yãi. 13 Abire yãi ma wɛ́ kɛ̀áwa, àsun tó á nɛ̀sɛ yaka wari kũ matɛn kɛ á musu yãiro. Á kpetana yãimɛ.

14 Abire yãi madì kútɛ De Ludanɛ. 15 A kĩnaa a bede kũ ò kú musu kũ zĩtɛonↄ ń tↄ́ lèn ń pínki. 16 Madì wɛ́ kɛa à á gba gbãna á nɛ̀sɛɛ gũn kũ a Nini gbãnao a aruzɛkɛ gakuride lɛ́n, 17 de Kirisi vutɛ á swɛ̃̀n a náani kũ átɛn kɛ yãi, á zĩnipɛtɛna gↄ̃ gbãna yenyĩ gũn, 18 de à le à a yenyĩ yàasa kũ a gbã̀nao kũ a leio kũ a lòkotooo gbá dↄ̃ kũ Luda gbɛ̃nↄ pínki, 19 de à le à a yenyĩ kũ oni fↄ̃ ò a lɛ́ dↄ̃ pínkiro dↄ̃, Luda papana pínki pɛkɛrɛáwa.

20 Luda zↄ̃kↄ̃! Ani fↄ̃ à kɛwɛrɛ de lákũ odì a wɛ́ kɛ ke odì a laasun lɛ́ nàla manamana kũ gbãna kũ àtɛn zĩ kɛ ó gũnwo. 21 Ògↄ̃ a tↄ́ kpá sↄsi gbɛ̃nↄ kũ Kirisi Yesuoo gũn wɛ̃̀ kũ wɛ̃̀ɛo ari gↄrↄ sĩnda pínki! Aami.