Luda yã takada kↄ̃n Bokobaru yão NARONA 12

Miriamu kↄ̃n Arunao Musa taari'ena

1 Miriamu kↄ̃n Arunao Musa taari è Etiopia nↄↄ kɛ̀ à sɛ̀ yã musu, zaakɛ à Etiopia nↄↄ sɛ̀. 2 Aↄ̃ bè: Musa adon Dii dìɛ à yã ò à gãzĩↄ́? Èe o wa gãzĩ seroo? Dii yã pì mà. 3 Musa nɛ́ gbɛ̃ busɛmɛ, à sáa kú anduna guuro. 4 Gwe gↄ̃ↄ Dii bè Musa kↄ̃n Arunao kↄ̃n Miriamuonɛ: À bↄɛ à gá dakↄ̃rɛki kuta kiia a gↄ̃ↄn aagↄ̃a. Ben aↄ̃ gàa ń gↄ̃ↄn aagↄ̃a ń píngi. 5 Dii pìta tɛ́luguu guu à zɛ̀ kutaa pì kpɛɛlɛa. À Aruna kↄ̃n Miriamuo sìsi, ben aↄ̃ sↄ̃̀zi ń plaa ń píngi. 6 À bèńnɛ: À ma yã ma. Tó ma annabi kee kú a tɛ́, mɛɛ̀ bↄ mà mↄ́zi wɛ́ɛgupu guu mɛɛ̀ yã onɛ nanaa guumɛ. 7 Mↄde à dɛ lɛ kↄ̃n ma zↄ̀bleri Musaoro. Zĩkɛri náanɛdeemɛ ma ua gbɛ̃nↄ tɛ́ ń píngi. 8 Weè yã bↄ kↄ̃ lɛ́n. Mɛɛ̀ yã onɛ mà à ke utɛnɛro. È wɛ́ɛ si ma takalɛ. À kɛ̀ dia ée ma zↄ̀bleri Musa taari'ena vĩa kɛroo? 9 Ben Dii pↄ fɛ̃̀ńzi, à a taa o.

10 Kɛ̀ tɛ́luguu pì gò kutaa pìla, kusu dà Miriamula gↄ̃ↄ, à pura kũ̀ lán buu bà. Kɛ̀ Aruna lìɛ à à gwà, à è kusu dààla, 11 ben à bè Musanɛ: N yã nna Baa! Ǹton tó wà mìsaiyã taarikɛna gbɛ̀ ero. 12 Ǹton tó àgↄ̃ dɛ lán nɛ́ kɛ̀ wà ì gɛ̀ à mɛ̀ kpadoo yakana bàro. 13 Musa wii pɛ̀ Diizi à bè: Luda, n yã nna! Ǹ à kɛ̃kↄ̃a. 14 Ben Dii bènɛ: Tó à de bé à lóu sù à uua, eé kɛnɛ wíyã ũ ai gurↄ swɛɛplaaroo? Wà bↄo bùra kpɛɛ gurↄ swɛɛplaa gĩa, gbasa wà à sí. 15 Miriamu kú bùra kpɛɛ ai gurↄ swɛɛplaa. Isarailinↄↄ e da zɛ́nlo sé kɛ̀ wà ɛ̀ara wà à sì. 16 Beee gbɛra aↄ̃ fɛ̀ɛ Azero aↄ̃ gàa wà bùra kàɛ Parani gbáan.