13
Gu'asiigwari gↄ̃ↄn kuri awɛɛplaaanↄ zĩna
1 Dii bè Musanɛ: 2 Ǹ gbɛ̃nↄ zĩ aↄ̃ gá Kanaa bùsu kɛ̀ mɛ́ɛ kpaa Isarailinↄa gwa. Ǹ ń dezinↄ bori gbɛ̃ kɛ̀ aↄ̃ↄ dɛ dↄn'aɛdee ũunↄ sɛ́ mɛ̀n doodo ǹ ń zĩ. 3 Ben à ń gbáɛ lɛ bↄna Parani gbáan lán Dii ò nà. Gbɛ̃ pìnↄ nɛ́ Isaraili dↄn'aɛdeenↄmɛ ń píngi. 4 Aↄ̃ tↄ́nↄn yɛ̀:
Rubɛni boriinↄ guu Zaku nɛ́ Samua,
5 Simɛↄ boriinↄ guu Ori nɛ́ Safata,
6 Yuda boriinↄ guu Yefunɛ nɛ́ Kalɛbu,
7 Isaka boriinↄ guu Yusufu nɛ́ Igali,
8 Ɛflaimu boriinↄ guu Nuni nɛ́ Osea,
9 Bɛyãmi boriinↄ guu Rafu nɛ́ Paliti,
10 Zɛbuluni boriinↄ guu Sodi nɛ́ Gadiɛli,
11 Yusufu nɛ́ Manase boriinↄ guu Susi nɛ́ Gadi,
12 Dani boriinↄ guu Gɛmali nɛ́ Amiɛli,
13 Asa boriinↄ guu Mikaɛli nɛ́ Setu,
14 Nafatali boriinↄ guu Vofosi nɛ́ Nabi,
15 Gada boriinↄ guu Maki nɛ́ Guɛli.
16 Gbɛ̃ kɛ̀ Musa ń zĩ bùsu gwaanↄn gwe. Musa tↄ́ kpà Nuni nɛ́ Oseanɛ Yↄsua.
17 Kɛ̀ Musa e ń zĩi Kanaa bùsu gwa, à bèńnɛ: À bↄɛ kↄ̃n Nɛgɛvi gbáao à di bùsu gusĩsĩdeea. 18 À gwa lán bùsu pì dɛ nà, tó à gbɛ̃nↄↄ gbãa kesↄ̃ aↄ̃ↄ busɛ, tó aↄ̃ↄ pari kesↄ̃ aↄ̃ↄ pariro, 19 tó aↄ̃ bùsu maa kesↄ̃ à zaa, tó aↄ̃ wɛ́tɛnↄ bĩi vĩ kesↄ̃ à vĩro, 20 tó à tↄↄtɛ gbãa kesↄ̃ à bùsa, tó à línↄ vĩ kesↄ̃ à vĩro. À aĩa kɛ à bùsu pì líbɛɛnↄ sɛ́ɛ à suo. Zaakɛ geepi bɛ káakunↄ magurↄↄn yɛ̀. 21 Ben aↄ̃ gàa wà bùsu pì asii gwàgwa zaa Zini gbáan ai Reobo, Lebo Amata kpa. 22 Kɛ̀ aↄ̃ bↄ̀ɛ kↄ̃n Nɛgɛvi gbáao, aↄ̃ kà Ɛblↄnu, guu kɛ̀ Anaki boriinↄ Aima kↄ̃n Sesaio kↄ̃n Talamaio kún. Ɛblↄnu kaɛna Zoã kɛ̀ kú Igipiti ã wɛ̃̀ swɛɛplaamɛ. 23 Kɛ̀ aↄ̃ kà Ɛsɛkↄlu guzurɛn, aↄ̃ geepi yↄ̃ doo zↄ̃̀ gwe aↄ̃ↄ lògo lía, ben gↄ̃ↄn plaaanↄ sɛna. Aↄ̃ biisioo kↄ̃n kãkãpuraao sɛ̀ dↄ. 24 Wà tↄ́ kpà guu pìnɛ Ɛsɛkↄlu guzurɛ, geepi yↄ̃ kɛ̀ Isarailinↄↄ zↄ̃̀ gwe yãnzi. 25 Kɛ̀ aↄ̃ bùsu pì yakɛ̀ gurↄ baplaa, ben aↄ̃ ɛ̀ara wà sù.
Gu'asiigwarinↄ baarukpana
26 Kɛ̀ aↄ̃ sù Kadɛsi, Parani gbáan, aↄ̃ gàa Musa kↄ̃n Arunao kↄ̃n Isarailinↄ kiia píngi. Aↄ̃ sù kↄ̃n baaruo Isarailinↄnɛ ń píngi, ben aↄ̃ bùsu pì líbɛɛnↄ ↄ̀dↄańnɛ. 27 Aↄ̃ yã pì gbã̀ Musanɛ wà bè: Wa gaa bùsu kɛ̀ n wa zĩin. Zwi kↄ̃n zↄ́'io di gwe. À líbɛɛnↄn yɛ̀. 28 Mↄde bùsu pì deenↄ gbãa. Aↄ̃ wɛ́tɛnↄ bĩi vĩ bensↄ̃ aↄ̃ wɛ́tɛ pìnↄ bíta maamaa. Wa Anaki boriinↄ è gwe se. 29 Amalɛkinↄↄ kú Nɛgɛvi gbáan. Itinↄ kↄ̃n Yebusinↄ kↄ̃n Amↄrinↄↄ kú bùsu gusĩsĩdeen, bensↄ̃ Kanaanↄↄ kú ísiaa saɛ kↄ̃n Yoda saɛo. 30 Kalɛbu gbɛ̃nↄ lɛ́ yĩ̀tɛ Musa aɛ, ben à bè: Wà gá wà bùsu pì sí, zaakɛ wé fↄ̃ wà zĩ̀ bleḿma. 31 Ben gbɛ̃ kɛ̀ aↄ̃ gàaonↄ bè: Wé fↄ̃ wà lɛ́ɛ gbɛ̃ pìnↄaro, zaakɛ aↄ̃ gbãaa dɛwala. 32 Ben aↄ̃ bùsu kɛ̀ aↄ̃ↄ yakɛ̀ pì fabò Isarailinↄnɛ wà bè: Bùsu kɛ̀ wá yakɛ̀ pì nɛ́ bùsu kɛ̀ è a gbɛ̃nↄ mↄ́mↄmɛ. Gbɛ̃ kɛ̀ wa ń é gweenↄ ń píngi nɛ́ gbɛ̃ gbã̀anↄmɛ. 33 Wa gbɛ̃ gbã̀agbãanↄ è gwe Anaki boriinↄ ũ. Wa a zĩnda è lán babanɛnↄn bà, lɛn wá dɛ lɛ ń wɛ́ɛn se.