4
Kaina yo Abela
Aba Fatubu 4:1-12
1 Adam ma lahuna Iwa sa eno bili, yo fede Iwa ya boga be natuna Kaina ya yosi. Na ya liba iyen,
Guyau ena faisagusagu yai natugu taumoho E yosi.*Alina Hebelu yai, daguguna doha: Guyau ya feledi be ya tubu.
2 Muliyai natuna hesa hesana Abela ya yosi.
Fuyanna sa lalaꞌi, Abela mate yosiyosi tau itaꞌita watanidi, na Kaina mate gabu tau paipaisowa. 3 Fuya hesa Kaina kalahe ya umahidi, anꞌandi ya abidi ya lau Guyau ya felen ena antalasam. 4 Abela hinaga sipi natuna halahala fwauna tubu loholohona ya wunui be tefana ya lau Guyau ya felen, ena antalasam. Guyau Abela ya ita faloholoho yo ena antalasam hinaga. (Hebelu 11:4)
5 In moho Kaina ena antalasam Guyau hige i ita faloholoho. Yo fede Kaina ya manabala be ya dulu. 6 Habahim Guyau ya libalau Kaina lisina iyen,
Paꞌana somo be wa manabala? Sidohana be wa duludulu? 7 Ibe wa sibai somo wa ginauli ya loholoho, haba wa kwade. Na paꞌana heyaya wa ginauli, heyaheyaya haꞌa em edaꞌeda ya dulu tawan be ya tanuwagaim. In moho bena wa anfalen.
8 Habahim Kaina tasina Abela ya faliba iyen,
Te lau, te laulau tiga.
Fuyana sa laulau tiga Kaina tasina ya tohai be ya wunui.
9 Habahim Guyau ya libalau Kaina lisina iyen,
Hidam Abela somo yai?
Alinana Kaina ya bui iyen,
Hige ya sibai. Yau hige hidagu ya itaꞌita watan.
10 Guyau iyen,
Somo wa ginauli? Tasim ꞌwasinana tanohi yai ya yogayoga hasaema lisigu. 11 Aho ite E kaumananaem. E duwim nuꞌu yai te. Hidam ꞌwasinana ya tabuliwa, itaꞌitana doha tanohi te moꞌana i tasoꞌe be ꞌwasinana i tofi, fuyana wa lau funuhi. 12 Yena ai tanohina ni wa paisowa, gabuna ibege anꞌanna. Um haba tau laulau gaibu ai tanoꞌubu.
Seti yo Inosi
Aba Fatubu 4:25-26
25 Adam ma lahuna Iwa sa eno bili fuyo, natudi taumoho, na hesana sa tole: Seti.
Iwa iyen,
Yaubada ya ainauya fuyoꞌigu. Natugu Abela falau damahina, fuyanna hidana ya wunui.†Alina Hebelu yai Seti aniyona doha ainauya.
26 Seti hinaga natuna taumoho. Hesana ya tole: Inosi. Fuyanna yai mate dodoga sa fatubu Guyau hesana sa fadebasae.