22
Balaki Wasa Tau Lawendi ya Fatamali Lawedi Balam lisina
Namba 22:1-14
1 Habahim Isalaela sa aulaha sa lau Mowabi Gonna be palai sa pei hitinidi Diyodan Hoꞌowana sadaina yai. Na Diyeliko taonna mate hoꞌowa ni tefana yai.
2 Na, Isalaela somo sa ginauli Amoli lebedi yai mate Dipo natuna Kin Balaki ya ita. 3 Isalaela sa ouli wananaha be Mowabi dodogadi sa ꞌwasabu heyaya!
4 Yo fede Mowabi dodogadi Midiyan babadadi sa falibadi tiyen,
Baiwa te, haba ginauli mahudoꞌina sadaida yai sa faheyaya, doha bulumakau hawahawa sa an faꞌofidi.*Gonogonowana doha pampam kanuwa lugudi sa an faꞌofidi na kanuwa sa hohoya.
Fuyanna yai Dipo natuna Balaki mate Mowabi edi kin. 5 Wasa tau lawendi ya fatamali lawedi Beyo natuna Balam lisina. Sa lau ee–, sa mahano Ifeleti Hoꞌowana sadaina yai ena nuꞌu wananahana Peto yai. Sa faliba tiyen,
Sulu hesa Idipi yai ya laoma. Ya tadada heyaheyaya be nuꞌu sadaigu yai sa miya fafamohafu. 6 Aho te, u laoma be dodoga te u kaumananaedi paꞌana sa adidili wananaha. Yena doha ite wa ginauli, nuwana yau gonowana haba E lei hafihafitidi, be E weꞌaidi. Logena, E siba mate safalumadi wa liba faloholohodi mate, wananaha haba loholoho sa lobahi na safalumadi wa kaumananaedi mate haba heyaya sa fahoina.
7 Habahim Mowabi yo Midiyan babadadi mate Balam ena kaumanana maisa sa abi be sa lawen lisina. Fuyanna sa mahano, somo Balaki ya falibadi, mate sa faliba.
8 Balam ya falibadi iyen,
Iꞌipa te aiteꞌi au eno. Na bobon Guyau ena bui somo ya felegu, haba E falibamiu.
Be, Mowabi babadadi maꞌedi Balam sa miya.
9 Yaubada ya laoma Balam lisina be ya fatiꞌoi iyen,
Tatau lisim yai te, safaluma?†Yaubada ena laolaoma hige ta siba, nuwana eno suwai yai.
10 Balam, Yaubada alinana ya bui iyen,
Dipo natuna Balaki. In mate Mowabi edi Kin na wasa te ya fatamaliyama: 11 Sulu hesa Idipi yai ya laoma, mate sa tadada heyaheyaya, be nuꞌu sa lau fafamohafu. Aho u laoma be dodoga te lisigu yai u kaumananaedi. Kaumanana ni lisina yai nuwana haba E lei hafihafitidi be E weꞌaidi.
12 In moho Yaubada ya libalau Balam lisina iyen,
Tabu ma afa haidam au lau! Tabu Isalaela dodogadi u kaumananaedi paꞌana egu loholoho haꞌa E feledi.
13 Hwalahwalalana, Balam ya obiyo. Babada, Balaki ya duidima wa ya falibadi iyen,
Au fuyo emi nuꞌu paꞌana Guyau ya laugagayoꞌegu be ibege yau maꞌemiu ta lau.
14 Na Mowabi babadadi sa fuyo Balaki lisina be tiyen,
Balam ya waiyoꞌo wananaha, be hige maꞌemai ai laoma.
Habahim Balaki dodoga sonosonogadi ya fatamalidi, be sa lau Balam lebena. Ya liba, mate, in haba ainauya laꞌilaꞌi Balam ya felen yena ya laoma Isalaela dodogadi ya kaumananaedi. Atabahim Yaubada Balam ya laliyen be ma afa haidana tatau lalaꞌi sa lau Balaki lisina. In moho Yaubada somo ya faliba, bena ya ginauli watan. Balam ya gado moni, logena Guyau ya laliyen.
Balam yo ena Donki
Namba 22:21-35
21 Yo fede hwalahwalala Balam ya obiyo be ena aba taꞌai donki taulina yai ya abi nonohai. Habahim maꞌena Mowabi babadadi sa lau Balaki lebena. 22 Fuyanna ya lau mate Yaubada ya manabala heyaheyaya be ena aba lau Guyau ena anelu ya obiyo bulubuluhi. Balam ena donki yai ya awa na sa laulau maꞌena ena tau paisowa luwaga.
23 Na donki ya itaꞌita lau be Guyau ena anelu ya ita ma baibainetina ya obiꞌobiyo edaꞌeda yai, be donki ya timuli bui be ya lau gabu ganahewana. Yo fede, Balam ya talai be bena ya fafuyoyama edaꞌeda.
24 Habahim Guyau ena anelu ya sigilau wain gabudi luwaga umeꞌehu yai sa katandi atiꞌatipudi yai, somo yai edaꞌeda ena aba mwakoko yai be ya obiyo. 25 Fuyanna donki Guyau ena anelu ya ita mate ya sigilau gana sadaina yai be Balam ahe laulauna ya eli hafiti gana yai be Balam, donki ya tala bodai.
26 Habahim anelu begana ya sigilau be somo yai solasola ya mwatiti heyaya, amainiya ya obiyo fuyo. Hige gonowana bena i timuli bui ai sibana e ai seulina. 27 Fuyana donki anelu ya ita mate ya hoba tanohi yai na Balam mate hewana yai. Yo fede manana ya bala be ena tuꞌe yai ya talai.
28 Habahim Guyau ena gigibwali yai donki ya libalau Balam lisina iyen,
Somo E ginauli lebem yai be ma faihona wa talaigu?
29 Balam donki ena bui ya felen iyen,
Em abiꞌabigu doha yau yauyaule! Ibe baineti nimagu yai aho te E wunuim.
30 Donki wa Balam ya faliba iyen,
Yau em donki! Fuya ouꞌouli wa awaꞌawaigu ee–, aho ite. Hige doha ite egu abiꞌabim beyabeyana!
Balam iyen,
Iꞌi–, Higeꞌe!
31 Habahim Guyau Balam matana ya falaladi be anelu ya ita ya obiꞌobiyo ma baibainetina edaꞌeda yai, yo fede, makai, ma luwaga! Na ya hoba lidi tanohi yai.
32 Na Guyau ena anelu Balam ya faliba iyen,
Sidohana be em donki wa talai ma faihona? Am lali wa lawelawen te E ita faheyaya be E laoma bena em edaꞌeda E naha buluhi.‡Hebelu alinadi yai lausoisoina te fuwana hige i mahata. 33 Donki ya itagu be ya gebaegu ma faihona. Ibe higeꞌe, nuwana aho te haꞌa ya wunuim na donki moho haba E biya afulen.
34 Alinana Balam ya bui iyen,
Heyaya E ginauli! Hige ya siba mate, um edaꞌeda yai wa naha buluhigu. Yena nuwam hige i loholoho haba E fuyo.
35 Anelu, Balam ya faliba iyen,
Dodoga te ma afa haidam au lau. In moho somo E libaen lisim yai moho bena wa libaen.
Habahim Balam ma afa haidana sa lau.
Balam yo Balaki antalasam sa ginauli ma faihona be bena Balam Isalaela dodogadi ya kaumananaedi. In moho fuya hesa - fuya hesa Balam hige gonowana Isalaela i kaumananaedi.
In mate Yaubada sidohana Isalaela ena faloholohodi moho, gonowana ya libalibaen.
Balam Isalaela wasadi Yaubada lisina yai ya abi, be ya libalibaen ma fati. Peina 23 yai mate fuya fafaluwagana Balam ya libaen.