25
Mowabi, Isalaela sa Bwalabwalaidi
Namba 25:1-13
1 Fuyanna Isalaela dodogadi, Akasiya nuꞌuna yai sa miyamiya tatau maꞌedi Mowabi wawahindi bena sa eno bili.*Akasiya hesana hesa mate Sitim Hebelu alinadi yai. Na Akasiya mate oyagi loholohona hinaga.
2 Wawahin te Isalaela tataudi sa yogaidi be antalasam sa lau ginauli edi yaubada bwalabwaladi lisidi yai be ma afa haidadi sa kalahe, na edi yaubada bwalabwala sa fadebasaedi.
3 Yo fede, Isalaela sa falau esegahi lawedi Mowabi dodogadi lisidi yai be edi yaubada bwalabwalana hesana Baꞌala-Peo sa fadebasae. Be Guyau ya manabala wananaha lisidi yai.†Au ita lau Namba 25:8-9.
4 Habahim Guyau, Mose ya faliba iyen,
Dodoga tau foyafoyahidi kawakawa yagaladi u abidima u wunuidi be mahata tautau yai u toledi ai matagu, haba Yau egu manabala Isalaela lebedi yai E nuwatuhu afuledi.
5 Mose Isalaela edi tau lau fakasa ya falibadi, iyen,
Umi hesa - hesa emi tatau safalumadi sa falau esegahidi Baꞌala-Peo lisina yai mate au wunuidi.
6 Lahaina yai Mose yo dodoga mahudoꞌidi Aba Fadebasaena Gwaꞌuna luhuluhu launa yai sa tantan. Yo fede Isalaela taumohona hesa, Midiyan waihinna ya foyahi leyama ana boga edi gwaꞌu yai sa ita. 7 Fuyana tau antalasam Elon natuna Eliyesa natuna Finiyasi mate laulau te ya ita be oigogo ya lau afulen, na ya lau alahiya ya abi. 8 Habahim taumohona ya lau watan ya lau ena gwaꞌu ganahewana yai, be ya difa dagi, be waihin ya gwali esegahi. Yo fede, iwala heyaheyayana Isalaela lisidi yai wa, ya fatautau. 9 In moho dodoga ouꞌoulidi 24,000 haꞌa sa peꞌi.
10 Na Guyau, Mose ya faliba iyen,
11 Ibege ya manabala fuyo!
Finiyasi laulau somo ya ginauli mate yau haꞌa egu nuwanuwatuhu doha. In ibege i ita afuledi be yaubada hahaisa ti fafadebasaedi; Yau moho emi Yaubada haba ami fadebasaegu. Logena, egu manabala in ya fatuwa funuhi, be Isalaela hige ya faheyayadi.
12 Finiyasi u faliba mate in lisina yai egu miya daumwali yalina E ginauli.
13 Haba yau yo Finiyasi yali ꞌe ginauli be laulauwewena haba antalasam paisowana sa ginauli lau ee–, hige anadan paꞌana hige i ita afuledi, be yaubada hahaisa ti famuli watandi. Ena fanuha bena yau moho edi Yaubada be ena laulau ni debana yai haba dodoga edi heyaya E nuwa afuledi.
*25:1 Akasiya hesana hesa mate Sitim Hebelu alinadi yai. Na Akasiya mate oyagi loholohona hinaga.
†25:3 Au ita lau Namba 25:8-9.