1.Samuel
Kapas akom
I. Iten ei puk: Aeuin Samuel. Ei puk a angei itan seni iten ewe aramas mi aüchea a mak pworausan lon. Wewen ei it Samuel: Kot a aüseling.
II. Chon makei ei puk: Esap fat iö a makei.
III. Itelapemongen ei puk: Ach aleasochis ngeni Kot a mürina seni ach asor (15.22).
IV. Kapas aüchean ei puk: Än eman aleasochis ngeni Kot a atoto feiöch ngeni, nge än eman aleasolap ngeni Kot a atoto feiengau ngeni. Ei fos a wesewesen fat lon än ewe Samol mi Lapalap kapas ngeni ewe souasor Eli lon sopun 2.30: “Chokewe mi asamoluei üpwe asamoluur, nge chokewe mi turunufaseei repwe küna turunufas.”
V. Masouen ei puk Aeuin Samuel: Lon ei puk a mak usun än ewe mwün Israel siwil seni mwün soukapwüng ngeni mwün king. Ei siwil lon Israel a fis, lupwen fansoun manauen Samuel, Saul me Tafit. Samuel ewe amwüchülan soukapwüng mi iteföüla, Saul ewe aemanün king lon Israel, nge Tafit ätewe manauan a riri ngeni manauen Samuel me Saul lupwen fansoun an alüal mwen an tolong lon wisan wisen king. Ei puk a apworausa pwe püsin ewe Samol mi Lapalap i wesewesen ewe kingen Israel. Nge pokiten ekewe aramas ra tüngor eman nöür king, ewe Samol mi Lapalap a filätä eman nöür king. Nge mine a kon aüchea, pwe ewe king me ekewe aramasen Israel ra nom fän nemenien Kot me an apwüng (2.7-10). Än ekewe chon pisekisek me än ekewe chon wöüngau pwüng repwe pwönüetä, nge fän än Kot kewe allük.
VI. Tettelin masouen ei puk:
Samuel a soukapwüng lon Israel 1.1–7.17.
Saul a tolong lon wisan wisen king 8.1–10.27
Ekewe ier lepoputän än Saul nemenem 11.1–15.35
Pworausen Tafit me Saul 16.1–30.31
Saul me nöün kewe mwän ra mäla 31.1-13
1
Samuel a uputiu
1.1-28
Mi wor eman mwän lon Ramataim-sofim seni chukuchukutän ewe fanü Efraim itan Elkana nöün Jeroham we mwän, Jeroham nöün Elihu, Elihu nöün Tohu, nge Tohu nöün Suf seni ewe ainangen Efraim. Iwe, a wor ruoman pwülüen Elkana, iten eman Hana, pwal iten eman Penina. Iwe, a wor nöün Penina kana, nge Hana esap wor nöün.
Iwe, iteiten ier Elkana e sou feitä seni an telinimw pwe epwe fel o asor ngeni ewe Samol mi Unusen Manaman me lon Silo. Ikenan nöün Eli kewe ruoman mwän iter Hofni me Pineas ra wisen souasorun ewe Samol mi Lapalap. Iwe, iteiten fansoun, lupwen Elkana a asor, a ngeni Penina pwülüan we pwal nöün ät me nengin en me an kinikin seni ewe asor. Elkana a mwo tongei Hana, nge a chök ngeni eu kinikin, pun ewe Samol mi Lapalap esap awora nöün. Nge Penina a akuf ngeni Hana, a fokun sou asonga o ämängaua, pun ewe Samol mi Lapalap esap awora nöün. Iei usun a fis iteiten ier. Iteiten fansoun, lupwen Hana a feitä ren imwen ewe Samol mi Lapalap, Penina a asonga. Iei mine Hana a kechü, nge esap mochen mongö. Iwe, Elkana pwülüan we a aisini, “Hana, pwota ka kechü? Pwota kosap mochen mongö? Nge pwota ka letipeta? Üsap aüchea me reöm lap seni engol noum mwän?”
Lon ewe rän, lupwen ra wes me mongö o ün me lon Silo, Hana a ütä o feila fän mesen Kot. Lon ei otun ewe souasor Eli a mot won eu lenien mot ünükün üren asamalapen imwen ewe Samol mi Lapalap. 10 Iwe, a fokun weires lon letipen Hana, a fokun iotek nge kechü ngeni ewe Samol mi Lapalap. 11 A eäni eu pwon o apasa, “Ai Samol mi Unusen Manaman, kose mochen kopwe nenengeniei. Kopwe küna ai riaföü o chechemeniei, kosap manlükieila ngang noum chon angang fefin. Are ka mochen ngeniei eman ät, ngang üa pwon pwe üpwe ngonuk ewe ät lon ükükün ränin manauan meinisin, esap pwal fich möküran.” Num 6.5
12 Iwe, lupwen Hana a sopwela le iotek, Eli a nenengeni awan. 13 Pun Hana a iotek nge möngününgün, tinawan chök ra mwökütüküt, nge esap wor mwelielian. Iei mine Eli a ekieki pwe i eman fefin mi pulas. 14 Iwe, Eli a üreni Hana, “Ifa ükükün fansoun om kopwe pulas? Kopwe ükütiu le ün wain.” 15 Nge Hana a üreni, “Apwi, ai samol, ngang üsap ün wain ika sakau mi pwichikar, ngang eman fefin mi fokun riaföü. Iei üa pwärawu mine a nom lon lelukei fän mesen ewe Samol mi Lapalap. 16 Kosap ekieki pwe ngang noum chon angang fefin eman mi manauangau, pun lon unusen ei fansoun üa iotek lon ai weires me riaföü mi lapalap.” 17 Mürin, Eli a üreni, “Kopwe feila fän kinamwe, ewe Koten Israel epwe ngonuk pälüen om tüngor.” 18 Iwe, Hana a üra, “Amwo ngang noum chon angang fefin üpwe küna ümöümöch me reöm.” Mürin a feila o mongö, nge won mesan esap chüen wololilen.
19 Iwe, sorotän ewe rän Elkana me an famili ra pwätä lesosorusich o fel ngeni ewe Samol mi Lapalap. Mürin ra liwiniti lenier lon Rama. Iwe, Elkana a kon ren Hana pwülüan we, nge ewe Samol mi Lapalap a chechemeni än neminewe tüngor. 20 Nge lupwen a tori fansoun, Hana a pwopwo o nöüni eman ät. Iwe, a aita ngeni Samuel, pun a apasa, “Üa tüngor ätei seni ewe Samol mi Lapalap.”
21 Iwe, lupwen a tori fansoun ar we asor, Elkana me chon leimwan meinisin ra feitä Silo pwe repwe eäni ewe asor mi fis iteiten ier ngeni ewe Samol mi Lapalap, epwe pwal apwönüetä an pwon. 22 Nge Hana esap etiir le feitä. A üreni pwülüan we, “Lon ewe otun ewe semirit epwe mwü seni oupw, üpwe uweela lon imwen ewe Samol mi Lapalap, pwe epwe nonom ikenan fansoun meinisin.” 23 Iwe, Elkana pwülüan we a üreni, “Kopwe föri mine a mürina me reöm. Kopwe chök nonom tori ka mwüti ewe semirit seni oupw. Amwo ewe Samol mi Lapalap epwe apwönüetä an kapas.” Iei mine Hana a chök nonom lon imwan o tümwünü nöün we ät. 24 Nge mürin än Hana mwüti seni oupw, a uwala Silo fiti eman ätemwänin kow ülüngat ierin, ilik paun pilawa mi amas me eu rumen wain. Iwe, a uwala ewe semirit lon imwen ewe Samol mi Lapalap lon Silo, nge a chüen kükün. 25 Mürin ar niela ewe ätemwänin kow, ra uwala ewe semirit ren Eli. 26 Iwe, Hana a üreni, “Ai samol, ka chüen chechemeniei? Ngang ewe fefin mi ütä ikei, ka künaei, lupwen üa iotek ngeni ewe Samol mi Lapalap. 27 Üa tüngor ei semirit. Iwe, ewe Samol mi Lapalap a ngeniei pälüen ai tüngor. 28 Iei mine üa fang ngeni ewe Samol mi Lapalap ei ät. Lon unusen manauan i epwe nöün ewe Samol mi Lapalap.” Mürin ra fel ngeni ewe Samol mi Lapalap ikenan.

1:11: Num 6.5