Mine Jesus Kraist a
Pwärätä
ngeni Johannes
Kapas akom
I. Chon makkei ei puk: Ewe soukünö Johannes.
II. A mak ngeni iö: Ngeni ekewe fisu mwichefel lon Asia.
III. Itelapemongen ei puk: Jesus Kraist ach we king mi pwora a nemenem.
IV. Kapas aüchean ei puk: Mine Johannes a makkei usun met a fen küna, usun met a wor, pwal usun met epwe fis me mürin. (1.19)
V. Masouen ei puk: Ei puken Pwärätä Johannes a makkei lon ewe fansoun lupwen ekewe souläng ra küna ninni pokiten ar lükü Jesus Kraist pwe ar Samol. Aüchean än Johannes ekiek lupwen a makkei ei puk, an epwe awora ngeni ekewe chon aleani apilükülüköch me pöchökül lon ar souläng. A pwal pese ngeniir ar repwe likitü lon ar allükülük lupwen fansoun ar riaföü me ninni.
Arapakan unusen masouen ei puk a wor chomong kapasen pwärätä me künaan Johannes, a mak lon kapasen awewe ekewe souläng lon ena fansoun ra wewe ren, nge a monomonola ngeni ekewe aramas resap souläng. Usun ekewe ngingiin lon köl ra aliwin me aliwin, iei usun ekewe kapas aüchean lon ei puk ra aliwin me aliwin lon sokopaten lapalap ren künaan Johannes. Inamwo ika a wor sokopaten memef usun tichikin kapasen awewen ei puk, nge ewe aüchean a fat: Ren Kraist ach Samol, Kot epwe fokun unusen akufu ekewe chon oputan meinisin fiti Satan, epwe pwal ngeni nöün kewe aramas mi allükülük liwiniir ren ekewe feiöch lon ewe läng mi fö me ewe fanüfan mi fö, lupwen an win epwe unusöchüla.
VI. Tettelin masouen ei puk:
Kapas akom 1.1-8
Aeuin künaan Johannes me ekewe toropwe ngeni ekewe fisu mwichefel 1.9–3.22
Ewe toropwe mi wor fisu pwaun 4.1–8.1
Ekewe fisu rappwa 8.2–11.19
Ewe trakon me ekewe ruoman manmwacho 12.1–13.18
Sokopaten künaan Johannes 14.1–15.8
Ekewe fisu sepien än Kot song 16.1-21
Talan Papilon me än ewe manmwacho, pwal än ewe soufos chofona me än ewe Tefil kuf 17.1–20.10
Ewe kapwüngün lesopolan 20.11-15
Ewe läng mi fö, ewe fanüfan mi fö me ewe Jerusalem mi fö 21.1–22.5
Kapasen lesopolan 22.6-21
1
Kapas akom
1.1-3
1 Iei ewe kapasen pwärätä seni Jesus Kraist, Kot a ngeni an epwe pwäri ngeni nöün kewe chon angang usun met epwe müttir fis. Kraist a asile ngeni nöün we chon angang Johannes ekei mettoch ren an tinala nöün chon läng ren. 2 Iwe, Johannes a pwärätä meinisin mine a küna, iei än Kot kapas me ewe let Jesus Kraist a pwärätä. 3 A feiöch eman mi aleani ei puk, ra pwal feiöch chokewe mi rongorong ngeni ekei kapasen pwärätä o aleasochis ngeni mine a mak lon. Pun ewe fansoun a arap än ekei mettoch meinisin repwe fisitä.
Kapong ngeni ekewe fisu mwichefel
1.4-8
4 Kapong seni Johannes ngeni ekewe fisu mwichefel lon ewe fanü Asia: Ümöümöch me kinamwe seni Kot epwe nonom remi, ewe Kot mi nom iei, ewe a fen nonom me ewe epwe feito me mürin, pwal seni ekewe füman ngün mi nom mwen an we lenien motun king, ✡ Eks 3.14; Pwär 4.5 5 pwal seni Jesus Kraist ewe chon pwärätä mi allükülük, ewe mwänichi, Kot a amanauasefäli seni mäla, i ewe mi nemeni ekewe king won fanüfan.
I a echenikich o angasakich seni ach tipis ren chaan, ✡ Ais 55.4; Kölf 89.27 6 a pwal föri senikich eu mwün souasor, pwe sipwe angang ngeni Kot Saman. Jesus Kraist epwe küna ling me manaman tori feilfeilachök! Amen. ✡ Eks 19.6; Pwär 5.10
7 Nengeni, epwe feito won ekewe kuchu! Aramas meinisin repwe küna i, pwal chokewe mi posu. Iwe, aramas meinisin won fanüfan repwe ngüngüres ren met ra föri ngeni. Epwe iei usun met epwe fis. Amen. ✡ Tan 7.3; Mat 24.30; Mark 13.26; Luk 21.27; 1.Tes 4.17; Sek 12.10; Joh 19.34,37
8 “Ngang ewe Aemanün me Amüchülan,” iei alon ewe Samol, ewe Kot mi Unusen Manaman, i ewe a nom iei, ewe a fen nonom me ewe epwe feito me mürin. ✡ Pwär 22.13; Eks 3.14
Künaan Johannes usun Kraist
1.9-20
9 Ngang Johannes, pwiimi we lon Jesus, üa chienenikemi lon ämi likitü fän mosonotam lon ewe riaföü mi tori chokewe ir chon mwün Kraist. Ra anomuei won ewe fanü Patmos pokiten üa arongafeili än Kot kapas me ewe let Jesus a pwärätä. 10 Lon ewe Ränin ach Samol üa nom lon Ngün, iwe, üa rongorong eu möngüngü mi leüömong a wewe ngeni efoch rappwa, a kapas me lükisöküri. 11 A apasa, “Kopwe makkeetiu lon toropwe mine ka küna o kopwe tinala ngeni ekewe fisu mwichefel: Efisos, Smirna, Perkamon, Tiatira, Sartis, Filatelfia me Laotisea.”
12 Mürin üa kuluei pwe üpwe nengeni iö we a kapas ngeniei. Iwe, üa küna fisu lenien atittin seni kolt, 13 nge lukalapen ekewe fisu lenien atittin a wor eman a usun chök lapalapen eman nöün aramas, a üföüf echö üf mi tametiu tori apachapachan o a riri ngeni fän mwärin efoch riri seni kolt. ✡ Tan 7.13; 10.5 14 Meten möküran a pwechepwech usun pwechen ülen sip, ika pwech usun pwechepwechen sno. Föün mesan ra wewe ngeni pulopulen ekkei, ✡ Tan 7.9; 10.6 15 pachapachan ra meriweriw usun chök piras mi limelim me amis, nge möngüngün a usun chök ngüngün noon won woch. ✡ Is 1.24; 43.2 16 A amwöchü füföü fü lon pöüifichin, nge efoch ketilas mi seisei me ruupekin a itiwu seni lon awan. Won mesan a saramaram usun saramen akkaren leoloas. 17 Iwe, lupwen üa küna i, üa chapetiu arun pechen, nge üa usun chök eman aramas mi mäla. Mürin a wätä pöüifichin woi o apasa, “Kosap niuokus! Ngang ewe Aemanün me ewe Amüchülan. ✡ Ais 44.6; 48.12; Pwär 2.8; 22.13 18 Ngang ewe mi manau! Üa mäla, nge iei üa manau tori feilfeilachök. A wor ai nemenem won mäla me ewe lenien sotup. 19 Iei kopwe makkei ekewe mettoch ka küna, ekewe mettoch a wor iei, pwal ekewe mettoch repwe fis me mürin. 20 Iei wewen ewe monomonen ekewe füföü fü ka küna me lon pöüifichi, pwal wewen ekewe fisu lenien atittin seni kolt: ekewe füföü fü, ir ekewe chon künöön ekewe fisu mwichefel, nge ekewe fisu lenien atittin, ir ekewe fisu mwichefel.