1 Mangai Isorali hnoq Môise xòe loh enh wang, wì tagop dabau dudan ka Arôn rai doe: Beq! Drah broq ƀài kiac đòeq lam adroe ka nhèn, majah qmang aih da Môise kô, mangai ma khoe qnoh nhèn loh khoe ka gùng Êdip, nhèn ùh qnì i yiniq cleq khoe trùh ka haq.

2 Arôn tèu bàu: Doeh yŏc ƀài hatai wang halŏng roc don mai, kon calô xam kon cadrì pì beq, khoe aih aràng ka au tacô. 3 Dìq ka wì doeh dŏng deh hatai wang enh don rađeh hu aràng ka Arôn;

4 haq yŏc enh tì wì, yŏc ƀài ranac broq loh moeq toq kon ƀo. Wì doe: Dìq ka mangai Isorli! Kô ƀài kiac da pì ma khoe qnoh pì loh khoe ka gùng Êdip.

5 Arôn hnoq qmang aih, hi broq moeq toq prang tadreo enh ngèa radua qmù ƀo aih; khoe aih haq capoch cadêh: Sroq èh la hì ramènh dèch ka Chuaq Jêhowa! 6 Sroq atìq mangai Isorali rìu sroeh, dèch bài ramènh bùh xam ramènh waiq kan catèm; haqngui acaq ôq, khoe aih yòng đòeq racaih pagôq ti dabau.

7 Chuaq Jêhowa hi doe ka Môise: Drah loh beq, majah qmang aih ƀài wì ìh ma qnung loh khoe ka gùng Êdip khoe pi wìa cleq, 8 khoe rênh ka cađac trong au hnài thê, broq moeq toq kon ƀo xi wang, bla-op enh ngèa ƀo aih dèch ramènh ka haq rai doe: Dìq ka mangai Isorali! Kô ƀài kiac ma khoe qnoh pì loh khoe ka Êdip! 9 Chuaq Jêhowa hanoh doe ka Môise rameh: Au khoe ngan hnoq ƀài mangai kô, meh joq mòeq xinoe cadoq ranŏng. 10 Manòeq kô, dôq da au broq, đòeq kan nòeh au plôh loh ti wì haq, jêh đac dŏng wì haq; mahaq au jah broq ka ìh wìa mòeq diac kàn.

11 Môise hi cali calo deh ka Chuaq Jêhowa Boc Plình ma khoe qnung loh enh gùng Êdip xi cwìang itai kàn kaiq xam tì kŏng dêh padren.

12 Hagleq majah dôq mangai Êdip doe: Ìh qnoh wì haq loh khoe ka gùng đòeq broq ka wì kan haƀo, jêh đac tawang, rai palùng đac wì haq khoe ta crŏng taneh? Waiq Chuaq, rangep ka kan nòeh rai cađac kan ranàc ìh ma padon tabroq ka mangai da ìh. 13 Waiq Chuaq hmàng hlài ka Apraham, Isac, Isorali, aih la ƀài hapŏng ìh, ìh ma khoe patô qmòe cla rađeh đòeq hapah ka wì haq: Au broq ka xinoe pì jah bàc tìah ka halŏng ta trŏc, au am ka xinoe aih jah dŏng gùng au ma khoe anoe trùh kô, èh wì haq hi jah gùng aih broq kùng hang mòeq đòe. 14 Chuaq Jêhowa hi cađac kan ranàc haq ma doe hu caqnìh ka mangai da haq. 15 Khoe aih, Môise tawìh loh enh bui wang, tì haq wê baiq capiac panhìn i achìh baiq ƀè, enh kô xam enh tau. 16 Baiq capiac aih la bìac da Boc Plình broq loh; chù aih hanoh chù da Boc Plình pùng achìh ta aih. 17 Jò Jôsuê tàng kan tagruàng enh bàu wì ta aih cachech, haq doe ka Môise: I bàu tajêh tablah ta traiq lình. 18 Môise padreo bàu: Ùh xài bàu cachech da mangai khoe blêq, hadai ùh xài bàu da mangai ma ùh blêq; mahaq au tàng bàu mangai calêu. 19 Jò trùh ten ka traiq lình, Môise hnoq i kon ƀo wang xam kan wì aplôh cađoeq, haq plôh nòeh, khwênh đac baiq capiac panhìn enh tì haq, padah tajènh wang. 20 khoe aih haq yŏc kon ƀo wì ma khoe broq aràng lam bùh ta ùnh, khoe èh tùq bahech wìa qmòe blo, rai ta riang diac, èh yŏc am ka mangai Isorali ôq. 21 Môise doe ka Arôn qmang kô: Wì kô khoe broq ka ìh cleq, ìh majah baxrùq dôq wì haq broq yiniq hlàc hlai qmang kô? 22 Arôn padreo bàu: Craq au paq nòeh, ìh loq ƀài mangai kô toq broq trong dù! 23 Wì doe ka au qmang kô: Broq ka nhèn ƀài kiac lam adroe ka nhèn; majah qmang aih da Môise kô, mangai ma khoe qnoh nhèn loh khoe ka gùng Êdip, nhèn ùh loq i bìac cleq trùh ka haq. 24 Au hi doe ka wì: cabô i wang drah lêh beq! Wì hi am ka au, au tah ta ùnh, enh aih ma hiloh kon ƀo kô. 25 Môise hnoq mangai Isorli khoe loh ka piwìa piwech, taiq Arôn khoe dôq wì loh ka pi wìa, loh qmòe ka ep chìuq kan camaih xep taqne ƀài mangai ma git ka wì haq. 26 aih haq hi yòng nòe qmang traiq lình rai doe: Mangai leq da Chuaq Jêhowa, drah trùh ti au kô! Dìq dŏng ka mangai Lêwi thia haten ka haq. 27 Haq doe ka wì: Jêhowa, aih la Boc Plình da mangai Isorali, i doe qmang kô: Rìm ngai taqne pì drah teo chang jang caqnam, lam hlài ta traiq lình, enh qmang kô trùh qmang tau, mangai leq mangai meh drah jêh đac deh oh daq, deh bua, xam mangai haten hatìa ka rađeh.

28 Mangai Lêwi hi broq tiaq wop qmang ka bàu Môise; hì aih jah qnah ta piq muàn mangai cachìt. 29 Môise doe ka mangai Lêwi: Hì kô oh daq khoe jah dèch đòeq hu patìh ka Chuaq Jêhowa, majah qmang aih rìm ngai khoe ùh talùi tì kŏng enh ngèa deh kon calô xam oh daq cla, dài Chuaq Jêhowa jah am la pì xôq ramot hì kô. 30 Hì atìq Môise doe ka mangai Isorali rameh: Pì khoe broq loh yiniq lui dìq jaq kàn; mahaq manòeq au tŏc ta Chuaq Jêhowa, broq braiq au loq jah baxon da pì yiniq lui qmòh.

31 Qmang aih, Môise wìh tŏc ta Chuaq Jêhowa rai doe: Wùi! Ƀài mangai kô i broq moeq yiniq lui kàn, broq ka rađeh ƀài kiac xi wang. 32 mahaq manòeq kô au cali calo ka Chuaq caqnaih da wì haq yiniq lui! Tàng ùh meh xùt đac yiniq au loh khoe ka hset ìh ma khoe achìh beq. 33 Chuaq Jêhowa doe ka Môise: Mangai leq loh yiniq lui ka au, au xùt đac yiniq haq loh khoe ka hset au. 34 Manòeq, drah lam, qnung mangai Isorali trùh nòe au ma khoe patô. Kô ƀình plình au lam adroe ka ìh; mahaq trùh hì leq au phŏc aih èh au hi phŏc taiq yiniq lui wì haq. 35 Chuaq Jêhowa caqnìh kan jìq dài ka wì haq majah qmang aih wì haq khoe broq loh radua kon ƀo wang, kon ƀo Arôn ma khoe broq.