1 Chuaq Jêhowa doe tam ka Môise: 2 Ngan kô, au khoe creo yiniq Bêsalê-ên, kon calô da Uri, xau da Huro, ta xinoe da Juđa. 3 Au khoe ùc bình ka haq Yiang da Boc Plình, kan rabiaq, kan hacat bai, kan loq đòeq tì haq rabiaq ka broq bàc yiniq. 4 đòeq broq loh ƀài dua lem rai broq ƀài ngè xi wang xi ƀac xam xi đùng. 5 Đòeq ti pùng achìh rai pacap qmùt ngŏc, trah long rai broq rìm trong da mangai thòq. 6 Kô, au am tam moeq ngai đòeq wiang patìh broq, yiniq haq Ôhôli-ap kon calô da Ôhôsa-mŏc, ta xinoe Đan. Au hadai khoe am ka haq kan hacat bai trong leq dua loq, đòeq wì haq broq ƀài trong au khoe tanap ka ìh 7 aih la traiq taglàm; hom tajao, calàp baxon yiniq lui enh crŏng hom, xam ƀài ranac ta traiq taglàm; 8 prang tadreo xam ƀài ngè khop khip, jo đen wang xam ngè khop khip, prang bùh ngè xua thùm, 9 prang dèch ramènh bùh xam ƀài ngè khop khip, thùng kàn xam jènh thùng; 10 eo ramènh, eo hadròeh ka Arôn pajàu kàn, xam ƀài eo ka wì kon haq, ma khoe jah lah đòeq crài ka au đòeq wì haq broq pajàu patìh ka au. 11 Dàu xùt, dàu thùm da nòeh hadròeh. Wì aih ep broq dìq dŏng tiaq bàu au khoe tanap thê ìh.

12 Chuaq Jêhowa doe hòm ka Môise: 13 Anoe ka mangai Isorali, pì ep wèq hì saƀat au, majah qmang aih aih raq teo hadro taqne au xam pì, trùh rìm qnhòng, đòeq phù cròng loq au kô raq Chuaq Jêhowa, broq ka pì wìh wìa hadròeh. 14 Qmang aih, ep wèq hì saƀat, majah qmang aih aih la hì hadròeh am ka pì. Cabô broq amùa ka hì aih ep jêh đac ka cachìt; cabô abroq cleq ta hì aih, hadai ep hnan qnoh khoe ka mangai Isorali. 15 Wì abroq achap ta tadràu hì, mahaq trùh hì tapèh aih la hì saƀat, aih la hì padài, khoe lah đòeq hadròeh da Chuaq Jêhowa. Hì aih waq toq cabô abroq moeq yiniq cleq dìq ep jêh đac ka cachìt. 16 Aih èh, mangai Isorali ep wèq hì saƀat rìm qnhòng da wì haq, qmang ka moeq tajao mòeq đòe. 17 Aih la moeq teo moeq đòe ka au xam mangai Isorali, majah qmang aih Chuaq Jêhowa khoe broq loh trŏc xam taneh ta tadràu hì, yàng èh trùh hì tapèh haq padài jah lem bùi prau prình. 18 Jò Chuaq Jêhowa khoe gêh ka anoe ka Môise tawang Sina-i, hi am ka haq baiq capiac hmo panhìn, achìh xi hadrang tì Boc Plình.