1 Ìh hadai broq mòeq toq prang tadreo xi long sitim, đòeq bùh gahnàu. 2 Mat prang aih broq buàng, dang yôh mòeq hagat, dagat mòeq hagat, dang yàng baiq hagat, i pôn toq aki loh ƀè gùng. 3 Ìh ep yŏc wang lem đòeq lom prang aih, enh crŏng haq, pôn ƀè pinh èh xam ƀài haki; ìh ep broq mòeq trong grôi xi wang dudan tap ka prang aih. 4 Enh qneq ka trong grôi aih, ajang baiq ƀè, broq baiq toq rawiang wang, đòeq trôp tanòng hu tòng. 5 Ep raxoh long tanòng tòng xi sitim, lom wang. 6 Ìh ep đòeq prang aih enh ngèa ka bai prình hom tajao. Tangèa ka calàp baxon yiniq lui enh crŏng hom, aih raq nòe au glàm ìh 7 Rìm sroq Arôn ep bùh gahnàu taprang aih, jò haq ti wèq ngan ƀài đen. 8 Dixèq ten clam, jò Arôn bùh đen, haq hanoh ep bùh gahnàu, aih raq kan xua thùm ep bùh yôt enh ngèa Chuaq Jêhowa, enh qnhòng kô trùh qnhòng tau. 9 Taprang kô ùh jah bùh kan xua thùm qnoeq, ùh meh dèch ramènh bùh ramènh diac lŏc ta-aih. 10 Moeq hanam mòeq yàng, Arôn ep broq ramènh baxon yiniq lui nòe haki prang tadreo kô. Ramènh baxon yiniq lui rìm hanam kô ep broq xi mahim da ngè tadreo baxon yiniq lui am ka rìm qnhòng ma padon trùh ta atìq kô èh. Aih la bìac dìq jaq hadròeh ka Chuaq Jêhowa.

11 Chuaq Jehowa doe ka Môise qmang kô: 12 Jò ìh rèn đòeq ngan hlài sôq mangai Isorali, rìm ngai ep dèch am ka Chuaq Jêhowa ƀac baxon rađeh, aih dôq kan jìq dài ùh plôh loh jò kon arèn sôq wì haq. 13 Một siếc-lơ bạc giá chừng ba quan tiền Lang-sa, một ghê-ra giá chừng một tiền rưỡi Mangai leq i yiniq ta sôh haq ep am qne siac lo, tiaq siac lo da nòe hadròeh, moeq siac lo aih trap baiq jàt gêra; qmang aih qne siac lo, aih la dèch ka Chuaq Jêhowa 14 Rìm ngai i yiniq ta sôh pang baiq jàt hanam dang tŏc dìq ep dèch ramènh kô ka Chuaq Jêhowa.

15 Jò dèch ramènh kô ka Chuaq Jêhowa đòeq baxon deh kan rìh, mangai kan ùh jah am yeo bàc ka qne siac lo, mangai pa ùh jah am yeo biaq ka qne siac lo. 16 Qmang aih, ìh yŏc ƀac baxon deh kan rìh da mangai Isorali hu đòeq patìh bìac tanòe traiq taglàm. Aih la bìac bahmàng da mangai Isorali enh ngèa Chuaq Jêhowa, đòeq baxon deh kan rìh.

17 Khoe aih Chuaq Jêhowa doe hòm ka Môise qmang kô: 18 Ìh broq moeq toq thùng xam jènh thùng dìq xi đùng, đòeq hu qnheo ta aih, khoe aih đòeq ta adreo traiq taglàm xam prang tadreo, rai ùc diac ta aih 19 Arôn xam wì kon haq hi qnheo deh tì xam jènh xi diac enh aih. 20 Jò leq mùt ta traiq taglàm wì haq hi yŏc diac đòeq qnheo rađeh, dôq wì haq ùh hìaq cachìt; èh jò thia ten prang tadreo đòeq patìh, aih la dèch ramènh bùh ka Chuaq Jêhowa hadai qmang aih. 21 Qmang aih, wì haq ep qnheo deh tì xam jènh aih èh wì haq ùh cachìt. Aih raq ranenh mòeq đòe moeq tui ka Arôn xam xinoe haq enh qnhòng kô trùh qnhòng tau.

22 Chuaq Jêhowa doe hòm ka Môise: 23 Yŏc ƀài ngè xua thùm ma lem dìq jaq: diac jan xua thùm padam hrinh siac lo; baiq hrinh qne siac lo cwèq xua thùm, baiq hrinh qne siac lo cachiq phùc. 24 Caqmoc cwèq padam hrinh siac lo, dìq tiaq maneh siac lo da nòe hadròeh, xam moeq hin dàu ôliu. 25 Ìh yŏc ƀài ngè xua thùm aih èh broq tiaq dua broq dàu thùm, broq loh moeq yiniq dàu xua thùm đòeq broq dàu xùt hadròeh. 26 Khoe aih, xùt ka traiq taglàm xam hom tajao, 27 Prang tadreo xam ƀài ngè khop khip, jènh đen xam ƀài ngè khop khip, prang bùh kan xua thùm 28 Prang tadreo ramènh bùh xam ƀài ngè khop khip, thùng xam jènh thùng. 29 Qmang aih ìh ep don đòeq crài ƀài ngè kô ka hadròeh, đòeq jah broq dìq jaq hadròeh, waq toq i cleq troq ta aih dìq jah hadròeh. 30 Ìh hadai xùt dàu ka Arôn xam wì kon da haq, lah đòeq wì haq crài da au, dôq wì haq broq pajàu patìh enh ngèa au. 31 Doe ka mangai Isorali: Kô raq dàu xùt hadròeh khoe jah don lah đòeq crài ka Chuaq Jêhowa hloe tarìm qnhòng atìq pì. 32 Ùh khòh ùc ta xech akia kon mangai, hanoh ùh khòh broq dàu leq tiaq dua dàu aih, dàu kô la dàu hadròeh, hadai hadròeh am ka pì. 33 Waq toq cabô broq dàu qnoeq tìah ka dàu kô, èh ùc dàu kô ta chac mangai ùh xài pajàu, mangai aih ep hnan qnoh đac khoe ka mangai Isorali. 34 Chuaq Jêhowa doe hòm ka Môise: Ep yŏc taƀài ngè xua thùm, aih la jan xua thùm, tô hìp huàng, phong chi huàng, gahnàu, rìm yiniq ep taq atoq ka dabau. 35 Tiaq dua ma broq ngè xua thùm broq loh gahnàu xua thùm, nhim boh, lem, hliang, hadròeh. 36 Ep ken padit dôq haq loh dàc habuàt, khoe èh đòeq enh ngèa hom tajao ta traiq taglàm, aih la nòe au glàm ìh: pì kon ep ngan haq dìq jaq hadròeh ka au.

37 èh ngè xua thùm pì ma broq ka rađeh hu waq, pì ùh jah broq tiaq dua ma kô, aih la ngè ìh ep don đòeq crài hadròeh ka Chuaq Jêhowa. 38 Waq toq cabô broq tiaq dua kô đòeq hìp ka xua thùm, ep qnoh đac khoe ka Isorali.