1 Kô ƀài bìac ìh broq hulah đòeq crài Arôn xam ƀài kon calô haq jah hadròeh, đòeq wì haq broq pajàu dèch ramènh enh ngèa au.

2 Ep rùp mòeq toq ƀo calô bu hadròng xam baiq toq trìu calô ùh i ka habau xìt, yŏc dàc qmau mì ma habuàt broq ƀênh ùh i tah blo, ƀênh qyoh ùh i tah blo wàt xi dàu, xam ƀênh ratang tàm dàu ùh i tah blo; 3 èh đòeq ƀài ƀênh aih ta moeq toq talênh dèch pajùm ka ƀo calô hadròng aih xam baiq toq trìu calô.

4 Khoe aih ìh thê Arôn xam ƀài kon haq trùh haten ka qmang traiq taglàm, khoe èh yŏc diac dahùm wì haq. 5 Tìa aih, yŏc eo ramènh caxùnh am ka Arôn, aih la eo hlaq caxùnh enh dalam, eo yôh da êphot, xam capiac bac rada, khoe èh yŏc xi atan da êphot ma khoe atênh ka lem kàt da haq caqnam. 6 khoe yŏc calôp pacui da haq tagàu rai đòeq chèang lèang hadròeh ta calôp. 7 Yŏc dàu xùt ùc tagàu rai xùt ka haq. 8 Thê ƀài kon Arôn lam haten hu caxùnh eo yôh ka wì haq, 9 èh yŏc xi atan caqnam kàt rai pacui calôp ka Arôn xam wì kon calô haq. Aih èh, bìac dèch ramnènh hi da wì haq tiaq ranenh moeq đòe am ka wì haq. Ìh dèch patŏc Arôn xam ƀài kon calô haq qmang aih.

10 Khoe ka aih, hi dùi aràng ƀo calô hadròng trùh ten ka qmang traiq taglàm, Arôn xam ƀài kon haq hi roh deh tì tagàu ƀo aih. 11 Ìh hi pàc ƀo calô aih enh ngèa Chuaq Jêhowa, jang trong qmang traiq taglàm; 12 khoe èh yŏc mahim ƀo aih, tàm qmùt hadrang tì, xùt roc aki da prang tadreo, rai pùc jàp roc jo prang tadreo. 13 Hadai yŏc dŏng ƀài bòq cliac, yŏc praiq lom clèm, baiq toq plì crŏng xam bòq ta plì crŏng, aràng bùh ta prang tadreo. 14 Mahaq enh gùng traiq lình ep bùh dŏng xech akia, xam ìc da ƀo calô aih; aih raq ramènh baxon yiniq lui. 15 Ìh hanoh rùp mòeq ta baiq toq trìu calô, Arôn xam ƀài kon calô haq hi yŏc deh tì đòeq tagàu trìu; 16 khoe hi pàc trìu calô aih, yŏc mahim pùc dudan jàp ka prang tadreo. 17 Tìa aih xah trìu loh tang haqnech, qnheo ma hreo cliac xam jo, khoe aih đòeq enh qnhèq ka ƀài haqnech jam khoe xah xam gàu haq; 18 khoe hi bùh dìq ka trìu calô aih ta prang tadreo, aih raq ramènh bùh i kan xua thùm dèch ka Chuaq Jêhowa, aih la ramènh dèch xi ùnh am ka Chuaq Jêhowa.

19 Khoe èh ìh hi rùp trìu ma atìq, Arôn xam ƀài kon calô haq hi dèch deh tì đòeq tagàu trìu aih; 20 khoe ìh hi pàc trìu aih, yŏc mahim xùt jang hla don pah qma da Arôn xam ƀài kon calô haq, ta hadrang kan tì pah qma xam ta hadrang kan jènh pah qma; mahim ma oe rah ep ùc dudan ta prang tadreo. 21 Ìh ep yŏc mahim taprang tadreo đòeq xùt rai da-arat tachac xam eo cwàn Arôn xam tachac ƀài kon calô haq. Qmang aih, Arôn xam eo cwàn rađeh, ƀài kon calô haq xam eo cwàn jah lah đòeq crài ka hadròeh.

22 Taiq trìu calô aih đòeq broq ramènh hulah đòeq crài mangai pajàu ka au dài ìh majah ep yŏc bòq, tênh, bòq cliac, praiq clèm, baiq toq plì crŏng, xam bòq plì crŏng xam cataih pah qma, 23 èh yŏc hloe moeq toq ƀênh mì, mòeq toq ƀênh nhim i dàu, xam moeq toq ƀênh calep oe ta talênh ƀênh ùh wàt blo đòeq enh ngeà ka Chuaq Jêhowa; 24 khoe aih, ìh yŏc ƀài ngè aih đòeq ta tì Arôn, xam tì ƀài kon calô haq, đòeq hnhè lam hnhè hlài enh ngèa Chuaq Jêhowa. 25 Hi khoe, ep doeh enh tì wì haq aràng bùh taprang tadreo, xam ramènh bùh, đòeq i kan xua thùm enh ngèa Chuaq Jêhowa; aih raq ramènh yŏc ùnh hu dèch am ka Chuaq Jêhowa. 26 Hanoh ep yŏc canòh da trìu calô đòeq broq ramènh padèch Arôn broq pajàu đòeq hnhu lam hnhu hlài enh ngèa Chuaq Jêhowa. Canòh aih èh phàn da ìh. 27 Qmang aih, ìh hi lah đòeq crài canòh xam cataih da trìu calô ma khoe yŏc đòeq broq ramènh padèh atŏc Arôn xam wì kon calô haq, aih la canòh ma khoe hnhu lam hnhu hlài, xam cataih ma khoe dèch. 28 Dahwèq ramènh kô loh enh nòe mangai Isorali dèch èh jah axong am ka Arôn xam ƀài kon calô haq tiaq ranenh khoe paqnoh mòeq đòe, phàn kô enh mangai Isorali tagop jò wì haq dèch ramènh waiq kan catèm ka Chuaq Jêhowa.

29 Ƀài eo hadròeh da Arôn jah đòeq hlài dèh ka ƀài kon calô ma haqmot tiaq atìq ka haq, đòeq wì caxùnh eo aih, jah xùt dàu rai padèch broq pajàu, 30 Taqne ƀài kon calô haq mangai ma leq jah broq pajàu hatìa haq, jò mùt traiq taglàm đòeq patìh tanòe hadròeh, ep caxùnh eo aih ta tapèh hì 31 Khoe aih, ìh ep rùp moeq toq trìu calô khoe taqmroq ka bìac padèch atŏc pajàu èh pai jam aih tanòe hadròeh. 32 Arôn xam ƀài kon calô haq hi acaq jam trìu calô aih, xam ƀênh ta talênh jang trong qmang da traiq taglàm. 33 Qmang aih, wì haq ep acaq ƀài ngè khoe jah dèch kô, aih èh hujah baxon da wì haq yiniq lui, đòeq padèch atŏc wì haq broq pajàu; mahaq mangai qnoeq ùh khòh acaq, majah qmang aih ƀài dahwèq aih khoe jah baphàn đòeq hadòeh. 34 Tàng jam ramènh xam ƀênh loq oe rah trùh sroq èh, ìh ep bùh ta-ùnh, ùh dùh kaq, majah qmang aih ƀài ngè kô khoe jah baphàn đòeq hadròeh 35 Qmang aih, tiaq rìm yiniq au khoe tanap thê, ìh ep broq ka Arôn xam ƀài kon calô haq, ramènh padèch atŏc wì haq ep broq ta tapèh hì. 36 Rìm hì dèch mòeq toq ƀo calô bu hadròng đòeq broq ramènh baxon yiniq lui, rai dèch ka prang tadreo mòeq ramènh baxon yiniq lui rai xùt dàu dôq prang tadreo jah basròeh. 37 Ta tapèh hì ìh ep broq ramènh baxon yiniq lui ka prang tadreo rai dèch haq am ka Chuaq Jêhowa; prang aih èh jah dìq jaq hadròeh, waq toq i cleq ma troq ta-aih dìq jah wìh wìa hadròeh.

38 Kô ƀài ngè ìh ma dèch taprang aih: Baiq toq trìu bu moeq hanam, rìm hì dìq qmang aih. 39 Ìh ep dèch mòeq toq jò disroq, mòeq toq matau aih jò dixèq dra drìt. 40 Kon trìu ma adroe, ep dèch mòeq phàn mòeq jàt êpha dàc qmau mì ma habuàt jràu xam moeq phàn pôn hin dàu padit enh plì ôliu, xam mòeq phàn pôn alac nho đòeq broq ramènh diac lŏc. 41 Da kon trìu ma atìq ep dèch jò dixèq dra drìt xam ramènh diac lŏc wop qmang ka ramènh disroq; aih la moeq ramènh bùh, i kan xua thùm dèch am ka Chuaq Jêhowa. 42 Aih la mòeq ramènh bùh pì ep dèch yôt, enh qnhòng kô trùh qnhòng tau, jang trong qmang traiq taglàm enh ngèa Chuaq Jêhowa, aih la nòe au loh đòeq capoch ti pì. 43 Aih èh, jang aih au hanoh taglàm ka mangai Isorali; kan ranhòm au hi broq ka traiq kô jah hadròeh. 44 Au lah đòeq traiq taglàm xam prang tadreo jah hadròeh; hanoh lah đòeq crài Aron xam ƀài kon calô haq, đòeq wì broq mangai pajàu enh ngèa au. 45 Au hi oe taqne mangai Isorali, broq Boc Plình da wì haq. 46 Wì haq hi jah loq au kô raq Jêhowa Boc Plình da wì haq, khoe qnoh wì haq loh khoe ka gùng Êdip đòeq hu oe taqne wì haq. Au kô raq Jêhowa Boc Plình da wì haq.