1 Taqne mangai Isorali, ìh ràih yŏc Arôn, daq ìh, xam ƀài kon calô haq, aih la Nađap, Abihu, Êlê-asa, xam Ythama, dèch wì aih broq pajàu enh ngèa au. 2 Ìh ep broq eo cwàn hadròeh ka Arôn, daq ìh, waq ka haq jah ranhòm.

3 Doe ka ƀài mangai ma loq abroq, aih la mangai au ma khoe am ka wì haq kan rabiaq, hu broq eo cwàn ka Arôn, lah haq đòeq crài hu broq pajàu patìh enh ngèa au.

4 Kô èh ngè wì haq ma hubroq: Capiac bac rada, êphot, eo yôh enh gùng; atênh eo hlaq enh dalam, mù kàt gàu èh hloe xam caxi caqnam. Aih èh wì hibroq eo hadròeh ka Arôn, daq ìh, xam ƀài kon calô haq, đòeq wì aih broq pajàu enh ngèa au.

5 Wì ep yŏc brai hnhuc hnhiac tìah ka wang, brai nget, gòh ngùi, gòh yrùng, xam bai lan ma habuàt.

6 Wì broq êphot xi wang, brai nget, gòh ngùi, gòh grùng, xam bai lan atênh ma geo. 7 Baiq ƀè êphot broq baiq hadrang caxi atan plêh hatop ka baiq toq mùm, đòeq jah kàt rahnit. 8 Atan đòeq kàt êphot enh gùng, ep broq ma geo hanoh yŏc wang, brai nget, brai gòh ngùi, gòh yrùng xam brai lan habuàt. 9 Ìh yŏc baiq capiac ngŏc mainao hu achìh yiniq ƀài kon calô da Isorali ta-aih: 10 Tadràu yiniq jang pliang ngŏc kô, tadràu yiniq jang pliang ngŏc tau, taƀoe troq tiaq dèh hì ha-uang da wì haq. 11 Ep pùng achìh ƀài yiniq da kon calô Isorali ta baiq pliang ngŏc aih, tiaq dua ka mangai thòq jò wì haq pùng ngè pateo, èh tah ta khuàn wang. 12 Khoe aih qmùt baiq pliang ngŏc aih ta baiq nòe atan jang plêh êphot, đòeq broq ngŏc bahmàng trùh kon xau Isorali; Arôn hi bac wê yiniq wì haq jang baiq toq plêh rađeh đòeq broq bahmàng enh ngèa Chuaq Jêhowa. 13 Ìh hadai ep broq ƀài khuàn xi wang, 14 đênh baiq hadrang caxi wang qyoh troeq caxi nùng, khoe aih taqmac baiq hadrang caxi aih ta khuàn wang. 15 Capiac bac jang rada aih đòeq paqnoh bìac hadrah khoe jah dì, ìh hanoh ep broq dìq jaq geo, qmang ka êphot; aih la xi brai hnhuc hnhiac, brai nget, gòh ngùi, gòh yrùng xam caxi brai lan habuàt. 16 Capiac kô broq haq hìn buàng, dang yôh moeq hada, dagat mòeq hada, ep jìp racop baiq lòp. 17 Ta capiac bac rada kô ìh ep pacap qmùt pôn brong ngŏc: brong baxèm qmùt moeq pliang ngŏc mainao, ngŏc ruƀi, ngŏc nget 18 brong baiq, moeq pliang ngŏc hliang, ngŏc saphia xam ngŏc kim kuàng;

19 brong piq, ngŏc gòh, ngŏc mainao taboc, ngŏc hmo ramŏng gam. 20 brong pôn ngŏc, ngŏc mainao gòh drinh, xam ngŏc nget hla, Ƀài ngŏc aih pacap qmùt ta khuàn wang 21 Ƀài ngŏc aih dìq dŏng la mòeq jàt baiq pliang, mac tiaq yiniq ƀài kon calô da Isorali; ta mòeq pliang ngŏc i pùng achìh yiniq moeq ta mòeq jàt baiq xinoe Isorali; qmang ka wì pùng ngè achìh pateo.

22 Ìh ep yŏc wang lem broq ƀài caxi đênh troeq wì ma đênh caxi nùng ka capiac bac rada; 23 broq ka haq baiq toq rawiang wang èh kàt ajang baiq toq mùm da capiac bac rada 24 kàt baiq hadrang caxi wang ta baiq toq rawiang wang ajang baiq toq mùm capiac bac rada, 25 èh gàu ƀè tau da baiq hadrang caxi wang gwac jang khuàn wang, khoe aih haqmac ta baiq toq atan plêh êphot oe enh ngèa rada. 26 Ìh hadai broq tam baiq toq rawiang wang hòm, đòeq jang baiq toq mùm enh qneq da capiac bac rada, oe enh dalam êphot. 27 Broq tam baiq toq rawiang wang qnoeq hòm, qmùt ta baiq gàu enh qneq ka atan plêh ƀè ngèa êphot, gìt ti haqmai da caxi caqnam êphot. 28 Khoe èh moeq hadrang caxi nget đòeq kàt baiq toq rawiang da capiac rada xam baiq toq rawiang da êphot, waq ka capiac rada xam êphot ùh hìaq talaq ka dabau. 29 Aih èh, jò leq Arôn mùt tanòe hadròeh, hi bac wê tacliac rađeh yiniq ƀài kon calô Isorali ajang capiac bac rada da bìac hadrah, đòeq broq kan bahmàng hlài enh ngèa ka Chuaq Jêhowa. 30 Ta capiac bac rada da bìac hadrah, ìh pacap qmùt urim xam thumim, đòeq jò Arôn trùh enh ngèa Chuaq Jêhowa ƀài ngè aih jah oe tacliac haq. Qmang aih, eh ngèa Chuaq Jêhowa, Arôn jah wê kan hadrah da kon calô Isorali hloe hloe. 31 Ìh hadai jìp moeq blah eo yôh đòeq sràp enh gùng ka êphot dìq xi brai nget. 32 Taqne eo i moeq toq trom đòeq qmùt gàu, ep atênh gap dudan ka trom kô đòeq haq ùh hìaq tapah. 33 Jang haqmai qneq broq moeq toq plì lìuq nget, gòh yrùng, gòh ngùi, xam moeq toq clinh ninh qyoh xi wang tênh dasràc ka dabau roc rawiang ti haqmai, 34 aih la mòeq toq clinh ninh èh hi trùh moeq toq plì lìuq, oe tap ka hamai eo. 35 Jò Arôn patìh trong ramènh, èh haq hi sràp eo aih; èh jò haq mùt loh nòe hadròeh enh ngèa Chuaq Jêhowa, wì jah tàng atêh clinh ninh qyoh xi wang, qmang aih èh loq Arôn ùh hìaq cachìt. 36 Ìh hanoh ep broq moeq capiac chèang lèang xi wang lem, ta aih pùng achìh qmang ka wì pùng achìh ngè đòeq pateo: Hadròeh ka Chuaq Jêhowa 37 Khoe èh yŏc moeq hadrang caxi nget kàt chèang lèang aih oe enh ngèa ka calôp. 38 Chèang leàng aih hi oe hloe hloe ajang ngòng Arôn, đòeq mangai Isorali jah lem manoh ka Chuaq Jêhowa.

39 Ìh broq moeq blah eo hlaq caxùnh enh dalam xi bai lan habuàt, moeq toq calôp xi bai lan habuàt rai atênh moeq hadrang xi caqnam. 40 Ìh hanoh broq eo yôh, mù kàt gàu xam caxi qnam ka ƀài kon calô Arôn, đòeq wì haq jah kan nhòm ta dahwèq anì atàc. 41 Jò kon khoe caxùnh eo cwàn ramènh aih ka Arôn, daq ìh, xam ƀài kon calô haq; kon xùt dàu rai dèch wì haq đòeq wì haq broq pajàu patìh enh ngèa au. 42 Ep broq ka wì haq cwàn atàc enh dalam xi bai lan, đòeq ùh hìaq hnoq kan rahòng, atàc pang caqnam trùh poeh. 43 Arôn xam ƀài kon calô haq hi atàc cwàn aih jò mùt ta traiq taglàm qnì thia haten ka prang đòeq patìh dèch ramènh tanòe hadròeh, aih èh ùh hìaq pòq yiniq lui èh ùh hìaq cachìt. Aih la ranenh moeq đòe ka Arôn xam xinoe haq.