1 Bêtsalê-ên, Ôholi-ap xam ƀài mangai rabiaq ma qnoeq, aih la mangai Chuaq Jêhowa khoe ùc ka wì haq kan rabiaq xam kan loq hu abroq ƀài yiniq đòeq hu waq trong dèch ramènh nòe hadròeh, dìq broq rìm bìac Chuaq Jêhowa khoe tanap thê. 2 Qmang aih, Môise creo ka Bêtsalê-ên, Ôholi-ap, xam ƀài mangai rabiaq ma qnoeq Chuaq Jêhowa khoe ùc am kan loq, xam ƀài mangai khoe jah menh manoh trùh haten, đòeq patìh broq. 3 Enh ngèa Môise, wì haq tigop yŏc ƀài ramènh enh mangai Isorali khoe aràng, hu broq ƀài ngè đòeq waq trong dèch ramènh hadròeh.

Mahaq rìm sroq, ƀài wì aràng đeh hòm bài dahwèq 4 Qmang aih, ƀài mangai ma rabiaq ka abroq rìm bìac tanòe hadròeh, dìq padài đò ka bìac wì haq qnang broq. 5 Đòeq trùh anoe ka Môise rameh: Wì qnàng bàc yeo hnau ka pajaq đòeq broq bìac Chuaq Jêhowa khoe tanap thê 6 Tiaq bàu da Môise thê, wì loh lam anoe jàp ta traiq lình qmang kô: Yac ka gucalô qnì gucadrì qnì, pi i cabô oe jah aràng dèch tam ramènh cleq hu broq tanòe hadròeh hòm! Qmang aih wì pi lòh cabô jah aràng tam cleq hòm. 7 Majah qmang aih khoe tàu dahwèq đòeq hu abroq, jaq mech loh ka oe i rah hòm.

8 Ƀài mangai rabiaq taqne ƀài mangai ma abroq, yŏc mòeq jàt blah bai prình xi bai lan habuàt, brai nget, brai gòh yrùng, gòh ngùi, atênh qmù chêrubim lem dìq jaq, đòeq paqnàng hnim kùh waiq đò.

9 Mòeq blah bai prình yôh baiq jàt rahem hagat, kàn pôn hagat; rìm blah daq adàng ka dabau. 10 Wì haqmot padam blah pajùm ti dabau; 11 Broq rawiang xi brai nget roc haqmai ti kênh da blah ma atìq lùch da pù ma baxèm, èh hadai broq qmang aih ka haqmai da blah pulùch da pù ma atìq. 12 Wì broq padam jàt toq rawiang ti haqmai da blah ma baxèm da pù adroe, xam padam jàt toq rawiang ti haqmai da blah pulùch da pù ma atìq; ƀài rawiang aih tangèa ka dabau. 13 Khoe aih broq padam jàt toq glêh xi wang, yŏc ƀài glêh aih đòeq tadùng ƀài bai prình ti dabau đòeq hnim kùh waiq đò jah xìa loh mòeq.

14 Khoe ka aih, wì yŏc xàc bubi atênh loh mòeq jàt mòeq blah bai prình, đòeq broq kùa po hnim ranòh kùh waiq đò 15 Mòeq blah dang yôh piq jàt hagat, dang gat pôn hagat: mòeq jàt mòeq blah dìq daq adàng ka dabau. 16 Wì haqmot đòeq crài padam blah; èh đòeq crài tadràu blah ma qnoeq 17 Broq padam jàt toq rawiang roc haqmai blah pulùch da pù kàn ma adroe, xam padam jàt toq rawiang roc blah ma kàn ma atìq. 18 Broq padam jàt toq glêh xi đùng, đòeq tadùng gwac ka blah kùa po dôq haq tajìp loh moeq.

19 Wì hanoh broq ka hnim ranòh kùh waiq đò moeq blah đòeq po xi akia trìu calô nhum gòh xam moeq blah đòeq po xi akia lem tù tam enh qnhèq.

20 Wì yŏc long ban xi long sitim broq panàt hnim ranòh kùh waiq đò. 21 Mòeq capiac dang yôh mòeq jàt hagat, dang gat mòeq hagat qne. 22 Mòeq capiac long ban i baiq toq calêh ta hatìa: dìq dŏng long ban hnim ranòh kùh waiq đò dìq broq hatìah ka dabau.

23 Qmang aih, wì broq long ban ka hnim ranòh kùh waiq đò: baiq jàt capiac bè qma; 24 enh qneq ka baiq jàt capiac long ban broq pôn jàt toq trom calêh: enh qneq rìm capiac long ban i baiq toq trom calêh đòeq pacap ka dabau. 25 Wì hanoh broq baiq jàt toq long ban pah qngeo ka hnim ranòh kùh waiq đò. 26 xam pôn jàt toq trom calêh xi ƀac, enh qneq rìm capiac i baiq toq trom calêh. 27 Oe enh rù da hnim kùh waiq đò, aih la bè mahì clìh, wì broq tadràu toq capiac long ban, 28 xam baiq toq mùm enh rù aih broq baiq capiac long ban. 29 Baiq capiac long ban mùm hatin ka dabau enh qneq trùh taqnhèq xi moeq toq rawiang oe ajang gàu; baiq ƀè mùm dìq broq qmang aih. 30 Qmang aih i rahim toq long ban xam mòeq jàt tadràu toq trom calêh xi ƀac, rìm capiac i baiq toq trom calêh; 31 Wì broq pang xi long sitim, padam toq pang ka ƀài long ban enh kô da hnim ranòh kùh wiaq đò, 32 padam toq pang ka long ban da ƀè tau, xam padam toq pang maqnoeq hòm ka ƀè rù hnim kùh waiq đò, aih la ƀè qngeo. 33 Wì broq pang oe trong qne, đòeq rahlòng taqne ƀài long ban enh gàu kô trùh gàu tau, 34 rai lom wang ƀài capiac long ban. Wì broq ƀài rawiang da ƀài long ban xi wang, đòeq hu trôp long pang cwa ti aih, rai lom ƀài long pang xi wang.

35 Wì broq mòeq blah bai prình xi brai nget, brai gòh yrùng, gòh ngùi èh xam bai lan habuàt, atênh qmù chêrubim dìq jaq lem. 36 Èh broq pôn toq long jrang xi long sitim glom wang, xam ƀài đình xi wang; broq pôn toq trom jrang xi ƀac ka ƀài long jrang aih.

37 Wì hanoh broq ka qmang mùt ta traiq mòeq blah bai prình xi brai nget, gòh yrùng, xam brai lan habuàt: aih bìac da mangai thòq achìh atênh 38 Wì hadai broq padam toq jrang i glêh ka bai prình, khoe èh lom wang tagàu long jrang, xam long tanang atua, padam toq jènh jrang aih xi đùng.