1 Khoe ka aih, Bêtsalê-ên broq hom xi long sitim, dang yôh baiq hagat qne, dang gat moeq hagat qne, haqnhèq moeq hagat qne. 2 Haq glom wang lem enh dalam xam enh gùng, rai broq trong grôi dudan. 3 Broq pôn toq gwiang wang nòe pôn toq mùm: Baiq toq ka ƀè kô, baiq toq ka ƀè tau. 4 haq hadai raxoh ƀài long tanòng xi long sitim, glom wang, 5 khoe aih trôp tanòng aih mùt ta baiq toq gwiang enh ƀè pinh, đòeq tòng hom.

6 Haq hadai broq mòeq toq calàp baxon yiniq lui xi wang lem, dang yôh baiq hagat qne, dang gat mòeq hagat qne. 7 Broq baiq toq radua qmù chêrubim xi wang tùq ratang đòeq ajang baiq ƀè gàu calàp baxon yiniq lui, 8 mòeq chêrubim oe gàu ƀè kô èh moeq chêrubim oe gàu ƀè tau, wa hatop wìa moeq ti calàp baxon yiniq lui 9 Baiq chêrubim hlìa panan tù jàp enh qnhèq ka calàp baxon yiniq lui, tangèa ka dabau rai wìh ngèa ta calàp baxon yinq lui.

10 Haq hadai broq mòeq toq prang xi long sitim; dang yôh baiq hagat, dang gat mòeq hagat qne, haqnhèq mòeq hagat qne; 11 Glom xi wang lem, èh broq mòeq trong grôi cadàu dudan. 12 Èh dèch panàt tap pôn ƀè ka crŏng prang haqnhèq toq tapôn, èh broq dudan aih moeq trong grôi xi wang. 13 Haq broq pôn toq rawiang wang pacap qmùt ta toq pôn mùm, nòe jo prang 14 ƀài rawiang oe ten ka grôi đòeq trôp tanòng, hu tòng prang; 15 Haq raxoh long tanòng xi long sitim, glom wamg, đòeq tòng prang. 16 Èh hadai yŏc wang lem broq ƀài ngè khop khip padon ta prang: dòt, chrŏng, doe mŏng xam khai, padon đòeq ka jò broq ka ramènh diac lŏc.

17 Haq hadai broq jènh đen xi wang lem, jènh đen, chac đen, bôp, xam riang dìq broq xi wang tùq ka ratang. 18 Baiq ƀè chac đen i tadràu toq hamenh, piq toq hamenh oe ƀè kô xam piq hamenh oe pah tau. 19 Ta tadràu toq hamenh loh enh chac đen, rìm hamenh dìq i piq toq doe mŏng tìah ka qmang ka riang apriac, hloe xam bôp xam riang. 20 Ta chac jrang đen hadai i pôn toq doe mŏng tìah qmang ka riang apriac hloe xam bôp xam riang. 21 Ta tadràu toq hamenh loh enh chac jrang đen, hi baiq toq hamenh, aih hi i moeq toq bôp. 22 Bôp xam hamenh da jènh đen aih dìq xi wang lem tùq ka ratang. 23 Haq hadai broq tapèh toq đen, cleq đòeq rawìt tìm xam ngè đòeq haqnac loc xi wang lem. 24 Haq hanoh yŏc moeq talàng wang lem, đòeq broq jènh đen xam ƀài ngè khop khip da jènh đen.

25 Haq hanoh broq moeq toq prang bùh gahnàu xi long sitim, broq hìn buàng, dang yôh mòeq hagat, dang gat moeq hagat, èh dang haqnhèq baiq hagat. Ƀài haki da haq jah broq hatop wìa mòeq ka prang. 26 Haq glom wang lem enh qnhèq, pôn ƀè dudan xam ƀài haki, pôn ƀè i grôi xi wang. 27 Enh qneq ka grôi aih, ajang baiq toq mùm, haq broq baiq toq rawiang wang đòeq trôp tanòng, đòeq tòng. 28 Haq raxoh long tanòng xi long sitim khoe aih glom xi wang.

29 Haq hadai broq dàu xùt hadròeh, xam kan xua thùm hliang lem, aih bìac da thòq broq dàu thùm.