1 Haq hanoh broq prang dèch ramènh bùh xi long sitim, hìn buàng, dang yôh padam hagat, dang gat padam hagat haqnhèq piq hagat. 2 Ajang pôn toq mùm haq broq ƀài haki ngèa loh tagùng, glom xi đùng. 3 Khoe aih broq ƀài ngè khop khip da prang xi đùng: abôq tah loc, kùac xŏng, long xŏc jam, xam khai tah ra-ùnh. 4 Èh broq tam mòeq toq xìaq ka prang, taliac haq broq xam caxi đùng, đòeq enh qneq ka caloeh prang, oe taqne lò enh qnhèq trùh taqneq, 5 èh broq rawiang ka pôn toq mùm xìaq xi đùng, đòeq qmùt long tanòng. 6 Khoe aih raxoh long tanòng xi long sitim, èh glom xi đùng; 7 Trôp tanòng mùt ta rawiang baiq ƀè prang, đòeq tòng lam. Haq broq prang xi long ban, enh dalam rahuàng.

8 Haq yŏc guàng ƀài mangai cadrì ma patìh tanòe traiq taglàm, broq loh mòeq toq khai xam jènh khai xi đùng.

9 Haq hanoh broq hamlang: ƀài blah bai prình enh ƀè pah qma dìq broq xi bai lan habuàt, yôh moeq hrinh hagat; 10 baiq jàt toq long jrang xam baiq jàt toq jo jrang broq xi đùng, i ƀài glêh đòeq gwac qmùt ta long jrang xam ƀài canep atua xi ƀac. 11 Enh pah qngeo hanoh i mòeq hrinh hagat bai prình, baiq jàt toq jrang xam baiq jàt toq jo jrang xi đùng ƀài glêh pacap talong jrang xam ƀài long canep xi ƀac. 12 Ƀè mahì clìh, padam jàt hagat bai prình, mòe jàt toq jrang, xam mòeq jàt toq jo jrang xi đùng, ƀài glêh xam canep atua dìq xi ƀac. 13 Enh ƀè ngèa, aih ƀè mahì tŏc, dang yôh da hamlang hanoh padam jàt hagat: 14 qmang aih enh qma da hamlang mòeq jàt padam hagat bai prình, piq toq jrang xam piq toq jo jrang; 15 enh ƀè qngeo ka trong qmang da hamlang hanoh mòeq jàt padam hagat bai prình, piq toq jrang xam piq toq jo jrang. 16 Dìq dŏng bai prình da hamlang oe dudan dìq broq xi bai lan habuàt; 17 Ƀài jo jrang dìq xi đùng, glêh, canep xi ƀac, gàu long jrang glom wang. Dìq dŏng ƀài jrang da hamlang dìq glom xi ƀac. 18 Blah bai prình ajang trong qmang da hamlang atênh xi brai nget, gòh yrùng, gòh ngùi, xam bai lan habuàt; dang yôh baiq jàt hagat, ƀè yàng (tiaq deh maneh da bai) padam hagat, mòeq maneh ka dang haqnhèq da ƀài bai prình dudan ka hamlang. 19 Pôn toq jrang xam pôn toq jo jrang xi đùng, glêh xam ƀài dahwèq glom gàu jrang, xam ƀài canep dìq xi ƀac. 20 Ƀài tanàp da hnim kùh waiq đò xam hamlang dudan dìq xi đùng.

21 Kô sôh arèn dìq dŏng da hnim kùh waiq đò, aih la hnim kùh waiq đò da ranenh tajao tiaq bàu Môise thê mangai Lêwi broq loh, canòm ka Ythama, kon calô pajàu kàn Arôn, broq mangai pagàu. 22 Bêtsalê-ên, kon calô da Uri, xau Huro, oe ta xinoe Jiuđa, broq tiaq rìm trong Chuaq Jêhowa khoe tanap thê ka Môise, 23 èh mangai ma wiang ti haq aih la Ôhôli-ap, kon da Ahisamŏc, oe ta xinoe da Đan, broq thòq pùng achìh, thòq rabiaq tì kŏng, thòq atênh xi brai xênh, brai nget, gòh yrùng, gòh ngùi hloe xam brai lan habuàt. 24 Dìq dŏng ƀài wang khoe pajùm broq tanòe hadròeh (aih dìq wang dèch am) jah baiq jàt hachìn talàng, tapèh hrinh piq jàt siac-lo, tiaq maneh siac-lo da nòe hadròeh. 25 Ƀac enh wì mangai ta aih i sôh achìh dìq dŏng jah mòeq hrinh talàng, mòeq muàn tapèh hrinh tapèh jàt padam siac-lo, tiaq maneh siac-lo da nòe hadròeh. 26 Dìq dŏng mangai leq khoe jah achìh yiniq ta sôh, pang baiq jàt hanam dang tŏc, aih la tadràu hrinh piq muàn padam hrinh padam jàt ngai, mòeq ngai ep dèch qne siac-lo, tiaq maneh siac- lo da nòe hadròeh. 27 Qmang aih ep dìq mòeq hrinh talàng ƀac đòeq broq ƀài xèm jènh da nòe hadròeh, xam jènh jrang bai prình, mòeq hrinh talàng ka mòeq hrinh toq jènh long jrang, aih mòeq talàng ka mòeq toq jènh jrang. 28 Mòeq muàn tapèh hrinh tapèh jàt padam siac-lo ma oe rah, aih đòeq broq ƀài glêh ka long jrang, glom gàu jrang, èh broq canep atua ka long jrang dôq jah tadùng ka dabau. 29 Đùng wì aràng dèch am rèn jah tapèh jàt talàng, baiq muàn pôn hrinh siac-lo. 30 Wì yŏc đùng aih broq jo radua qmang mùt ta traiq taglàm, prang tadreo xi đùng, cađap xi đùng, xam ƀài ngè rakhop rakhip da prang tadreo. 31 Ƀài jo jrang da hamlang dudan, ƀài jo jrang da qmang hamlang, ƀài long tanàp da hnim kùh waiq đò, hloe ƀài tanàp da hamlang dudan.