1 Chuaq Jêhowa doe ka Môise: 2 Hì moeq da khê moeq, ìh hi paqnàng dèch hnim kùh waiq đò. 3 Ep đòeq ta-aih hom tajao, khoe èh yŏc bai hi prình hlài 4 Hanoh ep tòng qmùt prang, dèch padon ƀài ngè ta prang aih waq ka taƀoe tiaq troq deh tang yiniq. 5 Prang broq xi wang đòeq bùh gahnàu hanoh ep đòeq enh ngèa ka hom tajao, khoe èh atua bai prình ajang trong qmang da hnim kùh waiq đò. 6 Prang da ramènh bùh hanoh ep đòeq enh ngèa ka trong qmang hnim kùh waiq đò; aih la traiq taglàm, 7 èh hanoh ep đòeq cathùng oe qne adreo wa traiq taglàm wa prang tadreo; khoe èh ùc diac mùt ta-aih. 8 èh rong hamlang oe dudan rai atua bai prình ajang nòe trong mùt ta hamlang

9 Khoe ka aih, ìh yŏc dàu xùt đòeq xùt ka hnim kùh waiq đò, xam rìm yiniq enh dalam ka haq, khoe èh lah đòeq crài hnim kùh waiq đò xam ƀài ngè ta-aih, aih èh haq hi jah hadròeh. 10 Hadai xùt dàu ka prang ramènh bùh, xam ƀài ngè khop khip da prang ramènh; aih èh haq hi jah dìq jaq hadròeh. 11 Hanoh xùt dàu ka cathùng xam jènh cathùng, khoe aih tadreo dèch da au, aih èh haq jah hadròeh. 12 Khoe aih, aràng Arôn xam wì kon haq trùh jang trong qmang traiq taglàm, èh dahùm wì haq xi diac. 13 Khoe ka aih ìh ep caxùnh am ka haq eo hadròeh, xùt dàu hadròeh, tadreo dèch haq, đòeq haq jah broq pajàu patìh enh ngèa au. 14 Aràng ƀài kon haq trùh haten, khoe èh caxùnh eo hlaq ka wì haq. 15 Xùt dàu ka wì haq tìah ka ìh khoe xùt dàu ka baq wì haq, aih èh wì haq hi broq pajàu ramènh enh ngèa au. Bìac xùt dàu jah am wì haq broq pajàu ramènh hloe hloe enh qnhòng kô trùh qnhòng tau. 16 Môise broq rìm yiniq wop qmang ka bàu Chuaq Jêhowa khoe tanap tthê rađeh. 17 Trùh hi moeq khê moeq oe ta hanam baiq, aih hnim kùh waiq đò khoe jah paqnàng. 18 Jò dèch paqnàng hnim kùh waiq đò, Môise ta qmroq bài jo jrang, dèch panàt long ban, roh long pang, rai dèch jrang. 19 Khoe aih haq hlèch blah po enh qnhèq ka hnim kùh waiq đò, èh tang blah aih enh qnhèq, wop qmang ka bàu Chuaq Jêhowa khoe tanap thê Môise. 20 Haq yŏc ƀài capiac ranenh tajao, tah đòeq enh dalam ka hom, trôp qmùt tanòng tòng, gùp calàp baxon yiniq lui enh qnhèq. 21 Khoe aih haq qmùt hom tajao mùt ta hnim kùh waiq đò rai atua bai prình đòeq prình hom tajao, wop qmang ka Chuaq Jêhowa khoe tanap thê Môise. 22 Môise hadai qmùt đòeq prang enh dalam traiq taglàm, ƀè qngeo da hnim kùh waiq đò enh gùng ka bai prình; 23 khoe aih xap ƀênh dahren ta prang, enh ngèq ka Chuaq Jêhowa, wop qmang ka bàu Haq khoe tanap thê Môise. 24 Đòeq jènh đen ta traiq taglàm oe ƀè qma, tangèa ka prang tadreo. 25 Haq bùh đen enh ngèa ka Chuaq Jêhowa, wop qmang ka Chuaq Jêhowa khoe tanap thê Môise 26 Đòeq prang tadreo broq xi wang enh ngèa ka bai prình ta traiq taglàm; 27 Ta prang aih haq bùh gahnàu thùm, wop qmang bàu Chuaq Jêhowa khoe tanap thê Môise 28 Haq hadai tang bai prình nòe trong qmang da hnim kùh waiq đò. 29 Khoe ka aih, haq đòeq prang ramènh bùh ajang nòe trong qmang hnim kùh waiq đò, dèch ta aih ramènh bùh, ramènh chai, wop qmang ka bàu Chuaq Jêhowa khoe tanap thê Môise. 30 Hanoh đòeq cathùng oe ta adreo wa traiq taglàm wa prang tadreo, ùc diac ta aih đòeq hùm qnheo. 31 Môise, Arôn xam ƀài kon calô da Arôn, qnheo dèh jènh tì ta aih. 32 Jò leq wì haq qmùt ta traiq taglàm rai thia ten ka prang tadreo aih wì haq qnheo rađeh, wop qmang ka bàu Chuaq Jêhowa khoe tanap thê Môise. 33 Dudan ka hnim kùh waiq đò xam prang tadreo, haq rong đòeq hamlang, rai cadrai bai prình nòe trong qmang hamlang. Aih, Môise broq gêh qmang ai

34 Cato yùc glom ta traiq taglàm xam kan ranhòm da Chuaq Jêhowa bình bauq ta hnim kùh waiq đò. 35 Jaq Môise loh qmòe ka ùh jah mùt, majah qmang aih yùc glom enh qnhèq xam kan ranhòm da Chuaq Jêhowa bình bauq ta hnim kùh waiq đò.

36 Qmang aih, rìm yàng loh lam da Isorali, jò leq cato yùc enh hnim kùh waiq đò tadèch aih èh wì haq loh lam; 37 tàng joq yùc ùh tadèch tŏc aih wì haq hadai ùh lam, trùh hì leq yùc hi tadèch 38 Majah qmang aih rìm yàng loh lam da Isorali, aih yùc da Chuaq Jêhowa oe enh qnhèq ka hnim jùh waiq đò jò dahì, jò damang i ùnh oe tayùc enh ngèa ka Isorali.