1 Chuaq Jêhowa oe enh dalam ka traiq taglàm creo doe ka Môise rameh: 2 Drah anoe ka mangai Isorali qmang kô: Tàng jò leq taqne pì i cabô dèch ramènh ka Chuaq Jêhowa aih ep dèch ngè pì ma aban, yac ka bo, yac ka trìu.

3 Tàng ramènh da haq aih la ramènh bùh xi ƀo, aih ep yŏc ƀo calô ùh ka xìt habau, dèch ajang qmang traiq taglàm, enh ngèa Chuaq Jêhowa, đòeq Haq jah lem manoh dì yŏc. 4 Mangai aih ep roh deh tì tagàu kon ramènh aih, aih èh haq hi jah dì yŏc thai, đòeq jah baxon yiniq lui da mangai aih. 5 Khoe aih, haq jêh kon ƀo aih enh ngèa Chuaq Jêhowa, èh ƀài kon da Arôn, aih la ƀài pajàu, hi tadreo dèch mahim, rai pùc dudan ka prang tadreo ajang nòe traiq taglàm. 6 Tìa aih, wì lôq akia kon ramènh aih, rai xah loh tang haqnech jam. 7 Ƀài kon calô da pajàu Arôn hi patep ùnh tanòe prang tadreo khoe aih chàt ra-ùnh enh qnhèq ka ùnh aih. 8 èh ƀài kon calô Arôn, aih ƀài pajàu hi tah ƀài haqnech jam aih, xam gàu xam bòq enh qnhèq ka ra-ùnh khoe bùh ta prang tadreo. 9 Mangai aih hi yŏc diac qnheo ƀài cliac clèm xam jo, èh pajàu aràng dìq dŏng bùh tanòe prang tadreo, aih raq ramènh bùh, aih la mòeq ramènh tadreo dèch xi ùnh, i kan xua thùm ka Chuaq Jêhowa

10 Tàng joq ramènh da haq aih la ramènh bùh xi ngè aban qyoh, yac ka trìu yac ka bubi, aih ep yŏc mòeq toq ma calô ùh hìaq i xìt habau, 11 jêh ngè aih enh ƀè qngeo da prang tadreo, enh ngèa ka Chuaq Jêhowa; èh ƀài kon calô da Arôn, aih la ƀài pajàu, hi pùc mahim dudan enh crŏng prang tadreo; 12 Xah jam aih loh tang haqnech, gàu xam bòq đòeq crài, mangai pajàu yŏc ƀài ngè aih tah enh qnhèq ka ra-ùnh ma khoe bùh ùnh enh qnhèq ka prang tadreo. 13 Mangai aih hi yŏc diac qnheo pù cliac clèm xam jo, khoe èh mangai pajàu bùh dŏng rìm yiniq ma oe crŏng prang tadreo, aih raq ramènh bùh, ramènh tadreo dèch xi ùnh i kan xua thùm ka Chuaq Jêhowa. 14 Tàng ramènh da haq dèch ka Chuaq Jêhowa aih la ramènh bùh xi chìm, aih ep yŏc trùh braih tàng ùh trù kon. 15 Mangai pajàu aràng ajang nòe prang tadreo, wech catech ka gàu, khoe èh bùh taprang tadreo, hanhot ma dìq ka mahim haq pùc dudan ka prang tadreo. 16 Mangai aih hi doeh padìu rai lôih xàc, èh khwênh haten ka prang tadreo, oe enh ƀè mahì clìh, aih la nòe ùc blo; 17 khoe èh hit ajang baiq toq panan, mahaq ùh jah catech hloe, khoe èh mangai pajàu aràng bùh tanòe prang tadreo, nòe khoe baxù đòeq ra-ùnh; aih la ramènh bùh, ramènh tadreo dèch xi ùnh i kan xua thùm ka Chuaq Jêhowa.