1 Jò cabô tadreo dèch ka Chuaq Jêhowa mòeq ramènh xep, ramènh da mangai aih ep broq xi dàc habuàt i dàu, rai tah gahnàu enh qnhèq. 2 Mangai aih hi aràng trùh ka ƀài kon calô da Arôn, aih la ƀài pajàu, pajàu aih hi yŏc moeq cadop dàc habuàt i dàu xam dìq dŏng gahnàu, aràng lam bùh broq kan bahmàng enh qnhèq ka prang tadreo; aih la ramènh tadreo dèch xi ùnh, i kan xua thùm ka Chuaq Jêhowa.

3 Phàn ma oe i enh ramènh bùih aih èh jah da Arôn xam wì kon da haq; aih la ngè dìq jaq hadròeh oe taqne ƀài ramènh dèch xi ùnh am ka Chuaq Jêhowa.

4 Jò pì dèch ramènh xep ùh wàt blo ma bùh ta tanùh, aih ep yŏc dàc habuàt lem broq ƀênh habàu tabat jràu xi dàu ôliu, tàng ùh meh ƀênh ratang ùh wàt blo, i xùt dàu. 5 Tàng ramènh xep da pì jah phiang xi giaq, aih ep broq xi dàc habuàt lem jràu xi dàu, ùh wàt blo. 6 goh loh tang haqnech rai ùc dàu enh qnhèq. Aih raq ramènh xep. 7 Tàng joq ramènh xep da pì jah adrênh xi griang kàn, aih ep broq xi dàc habuàt lem i jràu toq ƀiaq dàu ôliu

8 Ramènh xep ma khoe jah padon tiaq qmang kô, pì hi aràng dèch ka Chuaq Jêhowa, jao am ka pajàu, èh haq hi qnàng trùh ajang prang tadreo. 9 Mangai pajàu hi yŏc phàn ma ep tadreo dèch đòeq broq kan bahmàng, bùh baxù taprang tadreo; aih la ramènh dèch xi ùnh i kan xua thùm ka Chuaq Jêhowa. 10 Phàn le q ta ramènh xep ma oe i aih èh hi jah Arôn xam wì kon calô haq; aih la ngè dìq jaq hadròeh ta ƀài ramènh dèch xi ùnh am ka Chuaq Jêhowa

11 Waq toq ramènh xep pì tadreo dèch am ka Chuaq Jêhowa, aih paq dèch pajùm xam blo, majah qmang aih pì apaq yŏc blo qnì diac xùt qnì đòeq bùh pajùm ti ramènh leq ma yŏc ùnh tadreo dèch ka Chuaq Jêhowa. 12 Pì jah dèch ƀài yiniq aih ka Chuaq Jêhowa tìah ka ramènh gàu jò mùa; mahaq ùh khòh bùh taprang tadreo tìah ka ramènh i kan xua thùm. 13 Ep tah boh ta ƀài ramènh xep, ùh jah ùh tah boh; majah qmang aih boh aih kan hadro tajao da Boc Plình khoe broq ti pì, ta bài ramènh pì ep dèch boh.

14 Tàng pì yŏc riang plì gàu mùa đòeq broq ramènh xep tadreo dèch ka Chuaq Jêhowa, aih ep xi hadròc qmau neo adrênh xi ùnh, khoe jah pêh loh dàc gròq. 15 ùc dàu rai tah tam gahnàu. Aih raq ramènh xep. 16 Khoe aih, pajàu ramènh yŏc moeq phàn dàc khoe pêh pajùm xi dàu xam gahnàu đòeq bùh broq kan bahmàng. Aih raq ramenh xep yŏc ùnh dèch am ka Chuaq Jêhowa.