1 Tàng cabô enh dèch ramènh waiq kan catèm xi ƀo, yac ka calô yac ka cadrì, enh ngèa ka Chuaq Jêhowa haq ep dèch ƀo ùh i qmòe ka xìt habau 2 Mangai aih ep roh deh tì tagàu kon ramènh aih, khoe aih jêh haq tanòe trong qmang traiq taglàm; ƀài kon calô da Arôn aih ƀài pajàu, hi pùc mahim aih dudan ka prang tadreo. 3 Enh nòe ramènh waiq kan catèm kô, haq aih ma hi yŏc broq ramènh dèch xi ùnh ka Chuaq Jêhowa, praiq xam bòq cliac; 4 baiq toq plì crŏng xam bòq haten ka poc crŏng èh xam bla, mangai aih ep ralah yŏc pajùm ti plì crŏng.

5 Ƀài kon calô da Arôn hi bùh ƀài ngè aih taprang tadreo bùh ma khoe baxù ùnh; aih la ramènh dèch xi ùnh i kan xua thùm ka Chuaq Jêhowa.

6 Tàng cabô aih dèch ka Chuaq Jêhowa ramènh bùh xi trìu, yac ka calô qnì yac ka cadì qnì, trìu aih ùh jah i xìt habau. 7 Tàng ramènh aih xi kon trìu aih èh ep dèh haq enh ngèa ka Chuaq Jêhowa, 8 Roh deh tì tagàu kon ramènh aih, khoe èh jêh haq ajang trong qmang traiq taglàm; ƀài kon calô da Arôn hi pùc mahim dudan ka prang tadreo. 9 Enh nòe ramènh waiq kan catèm kô, mangai aih ep dèch ramènh xi ùnh ka Chuaq Jêhowa, bòq xam tênh oe raq ranoh apom, pot nòe pulùch da caxènh crŏng, praiq xam bòq cliac. 10 baiq toq plì crŏng, bòq haten ka poc, praiq clèm xam baiq toq plì crŏng, mangai aih ep doeh dŏng ƀài yiniq kô. 11 Mangai pajàu hi baxù ƀài yiniq aih taprang tadreo; aih ramènh dèch xi ùnh ka Chuaq Jêhowa. 12 Tàng ramènh da haq aih xi kon bubi cadrì, aih ep dèch enh ngèa ka Chuaq Jêhowa, 13 roh deh tì tagàu kon ramènh, khoe èh jêh haq ajang trong qmang traiq taglàm, ƀài kon calô da Arôn hi pùc mahim dudan ka prang tadreo. 14 Enh nòe ramènh waiq kan catèm kô, haq aih ep broq ramènh dèch xi ùnh ka Chuaq Jêhowa, aih la praiq xam bòq cliac. 15 baiq toq plì crŏng i bòq haten ka poc crŏng xam praiq clèm, aih ep doeh pajùm ka plì crŏng. 16 Mangai pajàu hi baxù ƀài yiniq aih taprang tadreo, aih la ramènh dèch xi ùnh i kan xua thùm. Dìq dŏng ƀài bòq aih dìq da Chuaq Jêhowa 17 Aih la ramènh mòeq đòe am ka xinoe pì, yac ka pì oe taleq: pì ùh khòh acaq yac ka bòq yac ka mahim.