1 Chuaq Jêhowa doe hòm ka Môise: 2 Drah lam anoe ka mangai Isorali qmang kô: Jò leq i cabô troq broq mòeq yiniq lui taƀài ranenh da Chuaq Jêhowa, troq broq trong ùh khòh broq; 3 tàng aih la mangai pajàu khoe jah xùt dàu mahaq oe raq broq yiniq lui, dài aih broq ka tagop Isorali ep pòq yiniq lui, taiq yiniq lui đeh khoe broq, haq aih ep dèch ka Chuaq Jêhowa mòeq toq kon ƀo hadròng ùh i ka xìt habau, đòeq broq ramènh baxon deh yiniq lui. 4 Mangai aih aràng ƀo hadròng aih trùh ajang trong qmang da traiq taglàm eh ngèa Chuaq Jêhowa, roh deh tì tagàu ƀo aih, khoe èh pàc enh ngèa ka Chuaq Jêhwa. 5 Mangai pajàu khoe chìuq xùt dàu hi yŏc toq ƀiaq mahim kon ƀo hadròng aih qmùt ta traiq taglàm, 6 tàm deh hadrang tì ta mahim, da arat tapèh yàng enh ngèa Chuaq Jêhowa, enh ngèa ka bai prình nòe dìq jaq hadròeh. 7 Khoe aih, mangai pajàu hi xùt mahim roc ƀài haki da prang bùh kan xua thùm oe ta traiq taglàm, enh ngèa Chuaq Jêhowa. Mahim ma oe i aih mangai pajàu aih hi ùc roc jènh prang tadreo bùh, oe enh ngèa ka qmang traiq taglàm. 8 Haq ep ralah dŏng bòq da kon ƀo đòeq broq ramènh baxon yiniq lui, aih la praiq xam bòq tanòe pù cliac 9 Baiq toq plì crŏng xam bòq ma oe ten ka poc, hla clèm, aih la ƀài yiniq haq ep doeh pajùm ti plì crŏng. 10 Tìah ka haq ma ralah doeh ƀài yiniq kô da ƀo ma đòeq broq ramènh baxon yiniq lui; khoe aih mangai pajàu hi bùh ƀài yiniq aih ta prang tadreo bùh. 11 Mahaq akia, xam dìq dŏng ƀài jam ma oe, gàu, jo, cliac xam ìc. 12 Aih la, ƀài yiniq ma oe i enh kon ƀo, mangai aih ep qnoh ma khoe ka traiq lình trùh ajang nòe hreo lem, ai la nòe wì ma ùc loc, khoe hi srom ra-ùnh hu bùh đac: aih la bùh tanòe ùc loc.

13 Tàng joq tagop Isorali troq broq mòeq yiniq lui ta ranenh da Chuaq Jêhowa, broq yiniq ma ùh lòh broq, yàng cla wì haq ùh qnì, enh aih ma loh ka ep pòq yiniq lui. 14 trùh jò wì haq ma hiloq rađeh khoe broq yiniq lui, aih èh tagop Isorali ep dèch moeq toq ƀo hadròng đòeq broq ramènh baxon yiniq lui, aràng trùh ajang qmang traiq taglàm. 15 Ƀài gucraq ta tagop aih ep dèch tì rađeh roh tagàu ƀo hadròng, khoe èh pàc ƀo aih enh ngèa Chuaq Jêhowa; 16 Mangai pajàu ma khoe jah xùt dàu hi qmùt mahim aih mùt ta traiq taglàm, 17 poh deh hadrang tì ta mahim, da arêh tapèh yàng enh ngèa Chuaq Jêhowa, enh ngèa ka bai prình. 18 Khoe èh, haq hi xùt mahim ta haki prang tadreo ta traiq taglàm enh ngèa Chuaq Jêhowa, khoe aih ùc mahim roc jo prang tadreo ramènh bùh, oe enh ngèa ka qmang traiq taglàm 19 Haq hadai ep xah dŏng ƀài ramaq aràng bùh ta prang tadreo. 20 Haq tadreo dèch ƀo hadròng kô hadai tìah ka haq dèch kon ƀo đòeq broq ramènh baxon yiniq lui: qmang aih, pajàu hi baxon yiniq lui ka tagop mangai Isorali èh yiniq lui da wì haq hi jah caqnaih. 21 Khoe èh, haq ep aràng ƀo hadròng aih loh enh gùng ka traiq lình, bùh tìah ka haq khoe bùh kon ƀo hadròng ma adroe: aih raq ramènh baxon yiniq lui ka tagop mangai Isorali. 22 Tàng joq i moeq ngai broq cla craq, troq broq yiniq lui leq taƀài ramenh da Chuaq Jêhowa, aiah la Boc Plình haq, broq trong ùh lòh broq, enh aih ma loh ka pòq yiniq lui; 23 Jò wì doe ka mangai cla craq aih loq deh ka yiniq lui đeh khoe broq, haq aih ep qnàng moeq toq bubi broq ramènh, moeq toq bubi calô ùh i xìt habau. 24 Roh dèh tì tagàu bubi calô aih, khoe èh jêh haq enh ngèa Chuaq Jêhowa tanòe wì ma jêh ƀài kon ramènh bùh; aih raq ramènh baxon yiniq lui. 25 Mangai pajàu tàm deh hadrang tì ta mahim kon ramènh baxon yiniq lui, xùt roc haki prang da ramènh bùh, èh ùc mahim roc nòe jo prang. 26 Khoe èh bùh dŏng ƀài bòq ramaq tìah ka bùh bòq ramaq da ramènh baxon yiniq lui. Qmang aih mangai pajàu hi baxon da haq yiniq lui, èh yiniq li da haq hi jah paclaih. 27 Tàng moeq ngai leq ta tagop mangai Isorali, troq broq moeq yiniq lui taqne ƀài ranenh da Chuaq Jêhowa broq yiniq ùh khòh broq, èh loh ka pòq yiniq lui; 28 jò leq wì anoe ka haq loq deh ka yiniq lui, mangai aih taiq yiniq lui rađeh ep aràng moeq

toq bubi cadrì ùh i xìt habau cleq, đòeq broq ramènh, 29 roh deh tì tagàu kon ramènh baxon yiniqlui, khoe èh pàc haq ajang nòe pàc ƀài kon ramènh broq ramènh bùh. 30 Mangai pajàu hi tàm deh hadrang tì ta mahim, xùt taƀài haki prang tadreo ramènh bùh, rai ùc mahim ta jo prang tadreo, 31 khoe èh ralah doeh dŏng ƀài bòq da ramènh waiq kan catèm, aràng lam bùh ta prang tadreo, broq ramènh i kan xua thùm ka Chuaq Jêhowa. Aih èh, mangai pajàu hibaxon da haq aih yiniq lui, qmang aih yiniq lui haq jah caqnaih. 32 Tàng ramènh da haq aih xi kon trìu, aih ep dèch moeq toq kon trìu cadrì ùh i ka xìt habau, 33 roh deh tì tagàu kon ramènh baxon yiniq lui, khoe èh jêh haq tanòe ma jêh bài kon ramènh bùh. 34 Khoe aih, mangai pajàu hi tàm dèh hadrang tì ta mahim, xùt roc haki prang tadreo bùh, rai ùc mahim roc jo prang tadreo; 35 doeh dŏng bòq tìah ka doeh da kon trìu broq ramènh waiq kan catèm, ràng bùh taprang qmang ka ƀài ramènh yŏc ùnh đòeq dèch ka Chuaq Jêhowa. Mangai pajàu hi baxon da haq yiniq lui, aih èh yiniq lui da haq hijah caqnaih.