1 Tàng cabô broq mangai panhìn, jò khoe tàng bàu thê haq hapah đòeq anoe trong đeh khoe hnoq khoe loq, mahaq haq ùh waq capoch qnoh, mangai aih ep pòq deh yiniq lui. 2 Tàng cabô bèq ƀài ngè leq Boc Plình ma khoe doe ùh hruah, yac ka hanang ngè ban tahnim, yac ka hanang jam gùng, yac ka hanang ƀài ngè moq ti qneq, yac ka ùh xài haq to bèq, aih èh haq loh ka ùh hruah ep pòq yiniq lui. 3 Ùh meh troq bèq kan ùh hruah da mangai qnoeq (kan ùh hruah aih qmang leq ùh dèh), yac ka haq ùh qnì, mahaq atìq èh haq loq, haq aih ep pòq yiniq lui jò haq loq bìac kô. 4 Tàng ùh meh loq i cabô troq hapah ùh tem hèm đòeq broq yac ka trong dù trong lem, yac ka qmang leq, adroe aih ùh qnì, khoe atìq èh cla haq loq đeh, mangai aih èh dua ep pòq yiniq lui yac trong kô qnì trong tau qnì.

5 Qmang aih, cabô loq ka rađeh khoe pòq moeq yiniq oe taƀài yiniq lui kô, aih ep anoe qnoh rađeh khoe broq yiniq lui cleq. 6 Khoe aih taiq yiniq lui đeh ma khoe broq, mangai aih ep aràng trùh enh ngèa Chuaq Jêhowa moeq toq trìu cadrì tàng ùh meh bubi cadrì, đòeq broq ramènh baxon yiniq lui; èh mangai pajàu hi broq ramènh baxon yiniq lui ka haq. 7 Tàng pi hlàt chaq loh mòeq toq trìu cadrì qnì loq bubi cadrì qnì, aih ep aràng ka Chuaq Jêhowa baiq toq trù braih ùh meh baiq toq trù kon: Moeq aih broq ramènh baxon yiniq lui, moeq aih broq ramènh bùh. 8 Haq aih ep aràng baiq toq trù aih trùh ka mangai pajàu, mangai pajàu hi yŏc toq ma adroe dèch broq ramènh baxon yiniq lui, khoe aih hràt gàu ajang ranong mahaq ùh catech loh khoe cachac 9 khoe aih da arat mahim kon ramènh baxon yiniq lui ta moeq apah prang tadreo; mahim ma oe i èh hanhot ta jènh prang tadreo, aih raq ramènh baxon yiniqlui. 10 Èh toq ma atìq tau, tiaq troeq ranenh ma khoe qnac adroe mangai pajàu yŏc dèch broq ramènh bùh, hu baxon yiniq lui da haq, aih èh yiniq lui haq jah caqnaih.

11 Tàng ùh plàih ka baiq toq trù braih qnì trù hnim qnì, mangai aih taiq yiniq lui đeh khoe broq, ep aràng mòeq phàn mòeq jàt êpha dàc habuàt lem đòeq broq ramènh baxon yiniq lui, ùh khòh ùc dàu enh qnhèq hadai ùh jah tah gahnàu xua thùm, majah qmang aih la ramènh baxon yiniq lui.

12 Haq aih hi aràng dàc aih ka pajàu; mangai pajàu hi cadop moeq cadop dàc đòeq broq kan bahmàng, rai baxù ta prang tadreo qmang ka baxù ramènh ma yŏc ùnh đòeq dèch ka Chuaq Jêhowa: aih la ramènh baxon yiniq lui. 13 Qmang aih, mangai pajàu hi baxon rìm yiniq lui haq ma khoe troq broq taƀài ranenh kô.

Aih èh yiniq lui haq jah caqnaih; dàc ma oe rah èh jah mangai pajàu tìah qmang ka ramènh xep diq.

14 Chuaq Jêhowa anoe hòm ka Môise qmang kô: 15 Jò cabô troq broq yiniq lui ka ƀài dahwèq hadròeh da Chuaq Jêhowa, mangai aih èh ep taiq yiniq lui rađeh, ep aràng ka Chuaq Jêhowa moeq toq trìu calô ùh i xìt habau rùp enh calùh tình tiaq maneh siaclo ƀac, tiaq jaq da siaclo da hnim hadròeh; aih la mòeq ramènh baxon yiniq lui. 16 Mangai aih ep padreo hlài ma troq jaq trai acop tam moeq phàn padam jaq ngè đeh khoe troq tanòe hadròeh, khoe èh aràng ngè aih ka mangai pajàu. Mangai pajàu yŏc trìu calô ma đòeq broq ramènh baxon yiniq lui đòeq broq ramènh baxon yiniq lui ka mangai aih, aih èh yiniq lui jah caqnaih.

17 Tàng cabô broq moeq yiniq lui oe taƀài ranenh Chuaq Jêhowa ùh lòh broq yac ka haq ùh loq, aih dua i yiniq lui, cla haq aih dua ep pòq dèh yiniq lui. 18 Mangai aih taiq yiniq lui đeh khoe broq ep aràng trùh ka mangai pajàu moeq toq trìu calô ùh i ka xìt habau rùp enh cadrong, tiaq manoh cla haq pajaq; khoe aih mangai pajàu broq ramènh baxon yiniq lui ka mangai khoe troq broq yiniq lui cla ma ùh qnì, aih èh yiniq lui jah caqnaih

19 Aih la ramènh baxon yiniq lui majah qmang aih mangai kô khoe broq yiniq ùh troq ka Chuaq Jêhowa.