1 Chuaq Jêhowa doe hòm ka Môise: 2 Jò cabô leq broq yiniq lui xi manoh ùh hnhoh jang ka Chuaq Jêhowa, aih la jò haq qnùt dèh mangai haten hatìa trong ngè wì gòe jao ka haq, ùh meh canòm ka haq wèq biaq da wì, yac ka atùng qnì, yac ka qnùt mangai haten hatìa. 3 yac ka haq toch ngè wì cađac hnhung yàng èh khoe aih haq chôiq đac, ùh meh haq hapah paqnùt, yac ka broq mòeq yiniq lui troeq wì ma xan loq broq, 4 Jò khoe broq yiniq lui qmang aih, haq aih ep padreo hlài dahwèq đeh khoe atùng qnì, ngè đeh khoe qnùt yŏc qnì, dahwèq wì ma khoe gòe jao, yac ka ngè wì hnhung đeh ma khoe jah toch. 5 Yac ka ƀài ngè haq khoe hapah paqnùt đòeq blah yŏc: haq aih ep padreo hlài tôm taih rai acop tam mòeq phàn padam maneh jaq đòeq am hlài da cla wì ma i ƀài hang aih tahì rađeh dèch ramènh đòeq baxon deh yiniq lui. 6 Tiaq manheh ìh khoe pajaq, mangai aih ep rùp dèh ta cadrong moeq toq trìu calô ùh i xìt habau, aràng trùh ka mangai pajàu đòeq dèch ka Chuaq Jêhowa đòeq broq ramènh baxon deh yiniq lui. 7 Mangai pajàu hi broq ramènh baxon da haq aih enh ngèa ka Chuaq Jêhowa, aih èh yiniq lui haq jah caqnaih.

8 Chuaq Jêhowa doe hòm ka Môise: 9 Anoe hlài ka Arôn hloe xam ƀài kon haq qmang kô: Kô ranenh trong ramèn bùh: Ngè dèch broq ramènh bùh ep oe enh crŏng ùnh taprang tadreo qngah ka mang trùh ta sroq atìq, ùnh ta prang tadreo ep wèq dôq jah khàng yôt. 10 Mangai pajàu hi sràp qmùt tachac cla eo atênh xi bai lan habuàt xam cwàn hanoh broq xi bai lan, khoe aih hacom yŏc loc ma khoe baxù ramènh bùh taprang tadreo, qnoh đòeq haten ka prang tadreo. 11 khoe aih lêh eo kô, caxùnh ònh eo qnoeq, aràng loc kô loh ùc enh gùng ka traiq lình, ùc tanòe hadròeh lem. 12 Ùnh taprang tadreo ep wèq dôq haq cheo yôt yôt, ùh khòh pat. Rìm sroq mangai pajàu yŏc ra-ùnh bùh tam ta aih, tah ramènh bùh enh qnhèq, rai bùh ramaq bòq da ramènh waiq kan catèm ta-aih 13 Ùnh khàng yôt taprang tadreo, ùh khòh pat.

14 Kô ranenh trong ramènh xep: Ƀài kon calô da Arôn ep dèch ramènh kô oe enh ngèa Chuaq Jêhowa. 15 Wì yŏc moeq cadop dàc habuàt lem ta ramènh xep xam dàu, xam dìq dŏng gahnàu enh qnhèq aràng bùh taprang tadreo broq kan bahmàng ramènh i kan xua thùm ka Chuaq Jêhowa 16 Èh ƀài ma oe rah, Arôn xam ƀài kon calô haq hi kaq ùh tah blo, oe tanòe hadròeh, aih la acaq ti hamlang da traiq taglàm 17 Wì ùh jah phiang dàc aih pajùm ka blo; aih raq phàn au am ka wì haq, yŏc enh bài ramènh jah dèch xi ùnh; aih joq ƀài hadwèq dìq jaq hadròeh tìah ka ranènh baxon yiniq lui xam ramènh baxon yiniq lui. 18 Waq toq mangai calô oe ta xinoe Arôn, aih èh jah kaq ƀài ngè kô; enh qnhòng kô trùh qnhòng tau, phàn kô aih đòeq hloe da wì haq oe taƀài ramènh dèch ka Chuaq Jêhowa. Waq toq mangai leq hi troq ta-aih, mangai aih èh jah hadròeh

19 Chuaq Jêhowa doe hòm ka Môise rameh: 20 Kô ramènh da Arôn xam ƀài kon haq ep dèch ka Chuaq Jêhowa oe tahì wì haq jah xùt dàu: Mòeq phàn mòeq jàt êpha dàc habuàt broq ramènh xep wì xan broq, di sroq mòeq qne, di xèq mòeq qne. 21 Ramèn aih ep khoe jràu pajùm xi dàu adrênh ta gŏc, jò khoe chìn, wì goh loh tang haqnech padon đòeq hubroq ramènh dèch i kan xua thùm ka Chuaq Jêhowa. 22 Kon calô leq da Arôn jah xùt dàu đòeq hu thai haq broq pajàu hadai ep dèch ramènh kô. Aih la ranenh mòeq đòe oe enh ngèa Chuaq Jêhowa: wì haq ep bùh ka dìq dŏng ramènh kô. 23 Ramènh xep da ƀài pajàu aih èh ep bùh dŏng, ùh khìn kaq. 24 Chuaq Jêhowa doe hòm ka Môise qmang kô: 25 Thê doe ka Arôn xam ƀài kon calô haq rameh: Kô ranenh trong ramènh baxon yiniq lui: ep jêh kon ramènh baxon yiniq lui enh ngèa Chuaq Jêhowa tanòe wì ma jêh ƀài kon ramènh bùh; aih raq ngè dìq jaq hadròeh. 26 Mangai pajàu yòng dèch kon ramènh baxon yiniq lui, ep acaq jam haq tanòe dìq jaq hadròeh, aih la hmlang traiq taglàm. 27 Cabô bèq trùh jam kon ramènh aih èh jah hadròeh, tàng mahim haq haprah ta eo, aih èh ìh ep rùh eo aih tanòe hadròeh. 28 Gŏc taneh ma pai jam aih ep tùq đac, tàng awìh tagŏc đùng aih ep xet rai haliang qnheo ka hreo. 29 Rìm ngai gucalô tahnim mangai pajàu, dìq jah kaq jam ramènh aih: Trong aih dìq jaq hadròeh 30 Mahaq ùh khòh acaq jam kon ramènh baxon yiniq lui i manhim haq qmùt ta traiq taglàm đòeq broq ramènh baxon yiniq lui tanòe hadròeh: ep bùh đac.